ءسان يندۋسترياسىندا بۇل بايقاۋدىڭ سالماعى جوعارى, بەدەلى اسا مىقتى. ماسەلەن, 1954 جىلى جاپ-جاس يۆ سەن لوران مەن كارل لاگەرفەلد وسى بايقاۋدىڭ العاشقى جەڭىمپازدارى بولعانىن ايتساق تا جەتكىلىكتى.
ءسان يندۋسترياسىنىڭ الەمدىك قاۋىمداستىعى Aika Alemi ماركاسىن تەكتەن تەككە تاڭداپ وتىرعان جوق. ءسان ساراپشىلارى ايكانىڭ قوي جۇنىنەن كوز توقتاتار كيىم ۇلگىلەرىن جاساپ جۇرگەنىن دەر كەزىندە باعالادى. ونىڭ الەمدىك بايقاۋعا قاتىسۋىنا لوندوندىق ساراپشىلار حيللاري الەكساندر مەن مارتين روبەرتس ىقپال ەتكەن. بۇلار ءوز كەزەگىندە ءسان الەمىندەگى تالانتتاردى ىزدەيتىن Fashion
Scout مەن Graduate Fashion Week تۇلەكتەرى ءسان اپتالىقتارىنىڭ ساراپشىلىق كەڭەسىنىڭ مۇشەلەرى بولىپ تابىلادى.
سونىمەن, Aika Alemi برەندى الدىمەن INTERNATIONAL WOOLMARK PRIZE الەمدىك بايقاۋىنىڭ ايماقتىق جارىسىندا «ايەلدەر ءسانى» مەن «ەرلەر ءسانى» نوميناتسيالارى بويىنشا باعىن سىنايدى.
ايماقتىق بايقاۋعا الەمنىڭ ءار شالعايىنان 65 ديزاينەر ىرىكتەلىنىپ الىنعان. بايقاۋ شارتى بويىنشا ءاربىر قاتىسۋشىعا 1500 اقش دوللارى بەرىلەدى. ديزاينەرلەر بۇل سوماعا قۇرامىندا اۆستريا ءجۇنى 80 پايىزدان كەم ەمەس ءبىر ءسان ۇلگىسىن تۋدىرۋى ءتيىس.
ال اياجان جاقسىباي قويدىڭ ءجۇنىن قالاي پايدالانۋدى وتە جاقسى بىلەدى. جۇننەن توقىلعان ماتالاردى, كيىزدەن جاسالعان فاكتۋرالار مەن قۇراق قۇراۋدى ءجيى پايدالاناتىن وعان قويدىڭ ءجۇنى تاڭسىق ەمەس.
ءبىزدىڭ ديزاينەرىمىز الەمدىك ءسان بايقاۋىندا ەۋروپا ايماعىنان باعىن سىنايتىن 10 ديزاينەردىڭ قاتارىندا ونەر كورسەتپەك. ايماقتىق اقتىق جارىس شىلدە ايىندا ميلاندا وتەدى. سودان كەيىن جاھاندىق جارىسقا جولداما العان ديزاينەرلەردىڭ ارقايسىسىنا 45 مىڭ اقش دوللارى بولىنەدى. ولار بۇل قاراجاتقا جۇننەن توقىلعان 5 ءتۇرلى ءسان ۇلگىسىن جاساۋى ءتيىس.
سوناۋ 1953 جىلدان بەرى ۇيىمداستىرىلىپ كەلە جاتقان كونكۋرسقا وتكەن جىلى ۆيكتوريا بەكحەم, Lanvin-ءنىڭ كرەاتيۆ ديرەكتورى بۋشرا دجاررار قازىلىق قۇرعان. ال اياجان جاقسىباي – WOOLMARK جارىسىنا قاتىسىپ تۇرعان تۇڭعىش قازاق ديزاينەرى.
اقيقاتىن ايتقاندا, ول بۇل جارىسقا ىلىگۋدەن اسا دامەلى بولماپتى. بىراق ءوز ۇلگىلەرى مەن ونىڭ جاسالۋ تەحنولوگيالارىن سۋرەتتەپ, ءسان بيكەشتەرى كيگەن كويلەكتەرىن بايقاۋعا جىبەرىپ كورۋگە بەل بايلايدى.
قىسقاسى, قۇرامىنا 35 مەملەكەت كىرەتىن ەۋروپالىق فيناليستەر بۇل كۇندەرى يتاليادا ءجۇر. بۇلار مامىر ايىنىڭ العاشقى كۇندەرى اۆستريالىق قويدىڭ جۇنىنەن ەڭ ساپالى ءجىپ, ماتا, فەتر شىعاراتىن تاڭداۋلى يتاليالىق فابريكالاردىڭ جۇمىسىمەن تانىسقان. بۇل فابريكالار Cerruti, Gucci, Prada الەمگە ايگىلى برەندتەرمەن جۇمىس ىستەيدى.
ديزاينەردىڭ ويىنشا, سولتۇستىك قازاقستاندىق قويلاردىڭ ءجۇنى اۆستريالىق «تۋىسقاندارىنىڭ» جۇنىنەن ساپاسى كەم ەمەس. بۇعان دەيىنگى 7 كيىم توپتاماسىن ءوزىمىزدىڭ جۇننەن جاسالعان ماتالاردان تىككەن اياجان جاقسىباي كەلەشەكتە وسى الەمدىك بايقاۋدان العان تاجىريبەسىن كاسىپقوي تۇرعىدا وتاندىق ءسان يندۋسترياسىنىڭ العا جىلجۋىنا پايدالانباق.
ايناش ەسالي,
«ەگەمەن قازاقستان»
الماتى
