- جاستاردى ەلگە قايتارۋدا ولاردىڭ وتباسىلارىمەن جۇمىس جۇرگىزىپ قانا قويماي, بارلىق مۇمكىندىكتى, ءتىپتى قارجىلىق ماسەلەنى دە شەشۋ جولدارىن قاراستىرىپ جاتىرمىز, - دەدى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ءدىن ىستەرى باسقارماسىنىڭ باسشىسى قايروللا كوشقاليەۆ.
ايماقتا اقپاراتتىق-ءتۇسىندىرۋ جۇمىستارىمەن اينالىساتىن 15 توپ بار. ولاردىڭ قۇرامىنا قۇقىق قورعاۋ ورگاندارىنىڭ, اۋعان سوعىسىنىڭ ارداگەرلەرى مەن بەلسەندى جاستار تارتىلعان. باسقارما ەندى وقۋ ورىندارىندا ءدىني ساۋاتتىلىقتى ارتتىراتىن ارنايى كۋرستار اشۋدى جوسپارلاپ وتىر. وتكەن جىلى 980 ادام ءدىني, پسيحولوگيالىق, قۇقىقتىق كەڭەستەر العان. ءدىني قىزمەت تۋرالى زاڭدى بۇزعان 11 ادام اكىمشىلىك جاۋاپكەرشىلىككە تارتىلدى. ال جىل باسىنان بەرى زاڭسىز ميسسيونەرلىك قىزمەت جۇرگىزگەن ءۇش ادامعا, يمامداردىڭ ءدىني جۇمىستارىنا كەسەلدىك كەلتىرگەن ەكى, زاڭسىز ءدىني ادەبيەت تاراتقان ءتورت ادامعا حاتتاما تولتىرىلعان. پروكۋراتۋرا ورگاندارى ينتەرنەتتە ەكسترەميزمدى ناسيحاتتاعان 10 سايتتى بۇعاتتادى.
تەرروريزم باپتارىمەن جازالارىن وتەپ جاتقان 35 اداممەن وڭالتۋ ءجۇمىستارى جۇرگىزىلۋدە. «ولارمەن پسيحولوگ, تەولوگ ماماندار جۇمىس ىستەيدى, ەندى تاريحشى, ادەبيەتشى مامانداردى دا وسى ىسكە تارتامىز, سەبەبى تەمىر توردىڭ ار جاعىندا وتىرعانداردى تۋعان ەلىنىڭ سالت-ءداستۇر, تاريحىن, ادەبيەتىن دۇرىس تانىپ بىلمەگەندىكتەن شالىس باسقان دەپ ويلايمىن», - دەدى ق.كوشقاليەۆ. سونداي-اق, تەرىس ءدىني اعىمداردان جاپا شەككەندەرگە كومەك كورسەتەتىن داعدارىس ورتالىعى اشىلادى. جالپى وبلىستا 29 يسلامدىق, ءۇش پراۆوسلاۆتىق, ەكى كاتوليكتىك جانە جەتى پروتەستانتتىق ءدىني بىرلەستىك تىركەلگەن.
باقىتگۇل باباش,
«ەگەمەن قازاقستان».
اتىراۋ.
