كەشەلى بەرى قاراعاندى وبلىسى بۇقار جىراۋ اۋدانىنداعى سامارقان سۋ قويماسىنىڭ قاتتى ءنوپىرى چكالوۆو اۋىلىندا 49 ءۇيدى, 70 اۋلانى شايىپ ءوتىپ, 137 ادام مەن 466 باس مال قاۋىپسىز ايماققا كوشىرىلدى.
توتەنشە جاعداي قارقارالى جانە اباي اۋدانىنىڭ جەكەلەگەن ەلدى مەكەندەرىندە دە بولدى. اتالعان اۋدانداردىڭ اكىمدەرى جەرگىلىكتى كولەمدە تابيعي سيپاتتاعى توتەنشە جاعداي جاريالاۋ تۋرالى شەشىم قابىلدادى.
قازىرگى كەزدە قاراعاندى وبلىسىنا قاراستى جەتى ەلدى مەكەندە تۇرعىن ۇيلەر مەن اۋلا اۋماقتار سۋ استىندا قالدى. سارىتوبە, چكالوۆو, سادوۆوە, اندرەينيكوۆكا, قىزىلجار, كراسنايا پوليانا, قارامۇرىن, چكالوۆو جانە سادوۆوە اۋىلدارىندا 49 جانە 42 باسپانانى سۋ باسقان. چكالوۆودان 137, سادوۆوە اۋىلىنان 308 ادام قاۋىپسىز جەرگە كوشىرىلدى.
ودان بولەك, قاراعايلى جانە قايراقتى, تۇزدى اۋىلدىق وكرۋگىنىڭ 1 ماي بولىمشەسىندە دە جاعداي ءماز ەمەس. شوپا اۋىلىندا شەرۋباي-نۇرا وزەنى ارناسىنان اسىپ, جولداردى شايىپ كەتكەن.
بۇگىندە قاراعاندى اۋماعىندا وبلىستىق, رەسپۋبليكالىق ماڭىزى بار 47 اۆتوموبيل جولدارىن سۋ باستى. «قاراعاندى-قارقارالى» جول ۋچاسكەسىندە كولىكتىڭ بارلىق تۇرلەرى ءۇشىن قوزعالىس توقتاتىلىپ وتىر.
توتەنشە جاعدايلار دەپارتامەنتىنىڭ مالىمدەۋىنشە, اۆاريالىق-قۇتقارۋ جۇمىستارىنا بۇگىنگى تاڭدا 2288 ادام, 709 تەحنيكا تارتىلعان. بۇقار جىراۋ, قارقارالى, اباي, شەت جانە وساكاروۆ اۋدانىنداعى جاعداي باقىلاۋعا الىندى.
قاراعاندى وبلىسىندا سۋ تاسقىنى باستالعالى 1850 ادام مەن 5338 مال باسى قاۋىپسىز جەرگە كوشىرىلگەن.
ماسەلەگە وراي, ايماق باسشىسى ەرلان قوشانوۆ سۋ تاسقىنى كەزىندەگى ەڭ قاۋىپتى ورىنداردى ارالادى. اكىم سۋ قويمالارىنان سۋ اعىزۋدى رەتتەۋ جانە ولاردىڭ دەڭگەيىن ساقتاۋ بويىنشا تاپسىرما بەردى.
«كۇننىڭ كۇرت جىلىنۋىنا بايلانىستى قاراعاندى وبلىسىندا سۋ تاسقىنى جاعدايى وتە كۇردەلى. ۇلكەن سۋ اعىنى ساقتالۋدا. نەگىزگى نۇرا مەن شەرۋباي-نۇرا وزەندەرى تاسۋدا. بۇگىن-ەرتەڭ وزەندەردەگى سۋ دەڭگەيى تومەندەيدى دەپ كۇتىلۋدە. ەكى كۇننەن كەيىن سۋ تاسقىنى باسىلادى. كەلەر اپتادا ەۆاكۋاتسيالانعان ادامدار ۇيلەرىنە قايتادى دەپ ويلايمىن, – دەيدى وبلىس اكىمىنىڭ ورىنباسارى اندرەي لياپۋنوۆ.
ميراس اسان,
«ەگەمەن قازاقستان»
قاراعاندى وبلىسى
