ق.توقاەۆ اڭگىمە بارىسىندا ەكىجاقتى, ونىڭ ىشىندە پارلامەنتارالىق سالاداعى ىنتىماقتاستىقتىڭ قارقىندى سيپاتىن اتاپ ءوتتى. توراعا قازاقستان مەن گەرمانيانىڭ ەۋروپاداعى جانە ورتالىق ازياداعى قاۋىپسىزدىكتىڭ ماڭىزدى ماسەلەلەرى, ساۋدا-ەكونوميكالىق ىنتىماقتاستىعى, سونداي-اق مادەني-گۋمانيتارلىق سالاداعى بايلانىستار جونىندەگى تۇراقتى ۇنقاتىسۋىنىڭ وزەكتىلىگىنە توقتالدى. ق.توقاەۆ تەرروريزمدى ءتۇبىرىمەن جويۋ ءۇشىن كوپتاراپتى ءارىپتەستىكتى نىعايتۋدىڭ ماڭىزىن دا ايتىپ ءوتتى.
جوعارعى پالاتانىڭ توراعاسى قازاقستان ءوز دامۋىنىڭ جاڭا تاريحي مەجەسىندە تۇرعانىن ايتتى. تاياۋدا پارلامەنت كونستيتۋتسياعا تۇزەتۋلەر قابىلدادى, وندا پرەزيدەنتتىڭ بىرقاتار وكىلەتتىكتەرى پارلامەنت پەن ۇكىمەتكە قايتا ءبولىندى. بۇل كۇندەرى ەلىمىزدە پرەزيدەنت نۇرسۇلتان نازارباەۆتىڭ رۋحاني سانانى جاڭعىرتۋ جونىندەگى ماڭىزى ەرەكشە ماقالاسى كەڭىنەن تالقىلانىپ جاتىر. وندا جاڭعىرۋدىڭ باسەكەلىك قابىلەت, پراگماتيزم, ۇلتتىق بىرەگەيلىكتى ساقتاۋ, ءبىلىمنىڭ سالتانات قۇرۋى, دامۋدىڭ ەۆوليۋتسيالىق جولى, سانانىڭ اشىقتىعى سەكىلدى يدەيالار بەلگىلەندى. توراعانىڭ ايتۋىنشا, مەملەكەت باسشىسىنىڭ ماقالاسى شىن ءمانىندە ەلىمىزدى ەكونوميكالىق جاڭعىرتۋدىڭ يدەولوگيالىق تۇعىرناماسى, ءبىزدىڭ قوعامنىڭ رۋحاني جول باعدارى بولىپ تابىلادى.
م.گرۋند قازاقستاننىڭ ورتالىق ازياداعى جاۋاپتى ءرولىن اتاپ وتە كەلىپ, ونى ەۋروپاداعى گەرمانيانىڭ رولىمەن سالىستىردى. دەپۋتات پرەزيدەنت ن.نازارباەۆتىڭ يادرولىق قارۋدان باس تارتۋ تۋرالى شەشىمى مەن ايماقتاعى سەنىم فاكتورىن پاش ەتەتىن ەۋرازيالىق ەكونوميكالىق وداق قۇرۋ تۋرالى باستاماسىنىڭ ەرەكشە ماڭىزىن اتاپ ءوتتى. سونداي-اق, ول 2010 جىلى ەقىۇ-عا ءتوراعالىق ەتۋى, بۇۇ قاۋىپسىزدىك كەڭەسىنىڭ مۇشەسى بولىپ سايلانۋى قازاقستاننىڭ جاھاندىق ءرولىن كورسەتەتىنىن جەتكىزدى.
م.گرۋندتىڭ پىكىرىنشە, قازىرگى پرەزيدەنتتىڭ ءوز وكىلەتتىكتەرىن پارلامەنت پەن ۇكىمەتكە ءوز ەركىمەن بەرۋى – قازىرگى زامانداعى سيرەك قۇبىلىس. «گەرمانيا عانا ەمەس, ۆەنەتسيالىق كوميسسيا دا قازاقستان وڭ باعىتتا ىلگەرىلەپ كەلە جاتقانىن مويىنداپ وتىر», – دەدى ول.
دەپۋتات بيىلعى قىركۇيەكتە بۋندەستاگ سايلاۋى وتەتىنى, ەۋروپالىق وداقتىڭ بولاشاعى تۋرالى ءپىكىرسايىستار, كوشى-قون داعدارىسىن رەتتەۋدىڭ كەلەشەگى جايىندا حاباردار ەتتى. ول استانادا وتەتىن ەكسپو-2017 كورمەسىندە گەرمانيا پاۆيلونىن جاساقتاۋعا جاردەمدەسكەنى ءۇشىن قازاقستان تاراپىنا العىس ايتتى.
