كورمەنى ۇيىمداستىرۋشى — قازاقستان رەسپۋبليكاسىنداعى تۇركيا رەسپۋبليكاسىنىڭ ەلشىلىگى جانە ەلورداداعى «ءجۇنىس امىرە» تۇرىك مادەنيەتى ورتالىعى.
شارادا ءسوز سويلەگەن قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ساۋىتبەك ابدراحمانوۆ شاناققالا شايقاسىنىڭ تاريحي ورنى ەرەكشە ەكەنىن ايتتى.
«ءار ەلدىڭ تاريحىنداعى ازاتتىق ءۇشىن كۇرەستە ەرەكشە ماڭىزدى شايقاستار بولعان. قازاق تاريحىندا اڭىراقاي شايقاسىنىڭ ورنى قانداي بولسا, تۇرىك جۇرتى ءۇشىن شاناققالا شايقاسىنىڭ ورنى سونشالىق ماڭىزدى. بۇل شايقاس ءبىرىنشى دۇنيەجۇزىلىك سوعىستىڭ باعىتىن وزگەرتتى. وسىدان تۋرا ەكى جىل بۇرىن, 16 ناۋرىزدا تۇركيا پرەزيدەنتى رەدجەپ تايىپ ەردوعاننىڭ قازاقستانعا ساپارى باستالدى. سول كەزدە «ەگەمەن قازاقستان» گازەتىندە شاناققالا شايقاسى تۋرالى ۇلكەن ماقالا جاريالاندى. رەدجەپ تايىپ ەردوعاننىڭ «شاناققالا ءوز الدىنا ۇلكەن ەپوس» دەگەن ءسوزى بار. شىنىمەن دە, بۇل شايقاستا تۇرىك جۇرتى ۇلكەن ەرلىك كورسەتە ءبىلدى» دەدى دەپۋتات.
ءوز كەزەگىندە تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك بۇگىنگى شارانىڭ ەكى ەل اراسىنداعى ديپلوماتيالىق بايلانىستىڭ 25 جىلدىعىنا وراي ۇيىمداستىرىلعانىن ايتا كەلە, ەكى ەل اراسىنداعى بايلانىستىڭ ودان ءارى جاڭا دەڭگەيگە كوتەرىلە بەرۋىنە تىلەكتەستىگىن ءبىلدىردى.
«شاناققالا شايقاسىنان تۇرىكتەردىڭ ۇلت-ازاتتىق سوعىسى باستاۋ الدى. ول جەڭىستىڭ ارقاسىندا تۇرىك جۇرتى ءوزىنىڭ تاۋەلسىزدىگىن ساقتاي وتىرىپ, مۇستافا كەمال اتاتۇرىكتىڭ باسشىلىعىمەن الەم تاريحىندا وزىندىك ءرولىن بەكىتتى», — دەدى ەلشى.
