«ەگەمەننىڭ» اسا باي فوتومۇراعاتىندا ساقتالعان, قازاقستاننىڭ كەڭەس داۋىرىندەگى تاريحىن, تاۋەلسىزدىكتىڭ ماڭىزدى ساتتەرى مەن جارقىن جەتىستىكتەرىن, قاراپايىم ادامدار تۇرمىسىن بەينەلەيتىن سۋرەتتەر, سونداي-اق ەلباسىنىڭ, وزگە دە مەملەكەت, قوعام جانە مادەنيەت قايراتكەرلەرى مەن اتاقتى سپورتشىلاردىڭ, قازاقستان قالالارى مەن كورىكتى جەرلەرىنىڭ سيرەك فوتوسۋرەتتەرى ۋيكيپەديا ونلاين-ەنتسيكلوپەدياسى ارقىلى عالامتور پايدالانۋشىلارىنا ۇسىنىلا باستادى.
«الەمنىڭ كەز كەلگەن تۇكپىرىنەن ينتەرنەت ارقىلى قازاقستاندى ىزدەگەن ادام وسى سۋرەتتەردى كورە الادى. سۋرەتتەردىڭ اعىلشىن, ورىس, قازاق تىلىندەگى تۇسىندىرمەلەرى بولادى. بىرىنشىدەن, بۇل جوبا ارقىلى اسا قۇندى فوتوماتەريالداردى جوعالۋدان ساقتايمىز. ەكىنشىدەن, ولاردى كوپشىلىك نازارىنا ۇسىنامىز», دەدى «ەگەمەن قازاقستاننىڭ» ارنايى جوبالارىن تانىستىرۋ كەزىندە سويلەگەن باسىلىم جەتەكشىسى دارحان قىدىرالى.
Wikibilim قورىنىڭ باسشىسى راۋان كەنجەحان اۆتورلىق قۇقىق ماسەلەسى قازىرگى كەزدە وزەكتى ەكەنىن, ال اتالعان جوبادا "ەگەمەن قازاقستاننىڭ" اۆتورلىق قۇقىعى تولىعىمەن ساقتالاتىنىن ايتتى. "بۇكىل دۇنيەجۇزىندەگى كونتەنتتىڭ, ماتىندەردىڭ, فوتو, ۆيدەوماتەريالداردىڭ ەركىن اينالىمىن قامتاماسىز ەتەتىن ەڭ ۇلكەن رەپوزيتاري Wikimedia Commons دەپ اتالادى. ياعني, الەمنىڭ كەز كەلگەن جەرىندە قازاقستانعا قاتىستى اقپارات, فوتوماتەريال ىزدەگەن ادامدار ەڭ ءبىرىنشى كىرەتىن جەرى وسى. بۇل جۇيە زاڭدى تۇردە كەز كەلگەن ماتەريالدى تاۋىپ الىپ, اۆتورلىق قۇقىقتى ساقتاي وتىرىپ, زاڭدى تۇردە قولدانۋعا مۇمكىندىك بەرەدى. سوندىقتان, وسى ۇسىنىستى قولداپ, "ەگەمەن قازاقستاندى" جاڭارتۋ باعدارلاماسىنىڭ ءبىر بولىگى رەتىندە قولعا العان گازەت باسشىسىنا كوپ راحمەت ايتامىز", دەدى راۋان كەنجەحان ۇلى.
