2016 جىلى قازاقستانعا 33,7 مىڭنان اسا ورالمان كەلدى

2016 جىلى 16 مىڭ 417 وتباسى نەمەسە 33 مىڭ 754 ەتنيكالىق قازاق تاريحي وتانىنا قايتا ورالىپ, ورالمان مارتەبەسىن الدى, - دەپ حابارلايدى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى. "قازاقستانعا كەلگەن ورالمانداردىڭ كوپشىلىگى, ياعني, 65,5 پايىزى - وزبەكستاننان كەلگەن. سونداي-اق, 24,9 پايىزى - قىتايدان, 3,2 پايىزى - تۇرىكمەنستاننان, 2,7 پايىزى - موڭعوليادان, 3,7 پايىزى - وزگە ەلدەردەن ورالعان قانداستارىمىز", - دەلىنگەن مينيسترلىكتىڭ حابارلاماسىندا. سونداي-اق, قانداستاردىڭ باسىم بولىگى, ياعني 33,9 پايىزى - وڭتۇستىك قازاقستان وبلىسىنا, 25,4 پايىزى - الماتى وبلىسىنا, 10,6 پايىزى - ماڭعىستاۋ وبلىسىنا, 5,8 پايىزى - جامبىل وبلىسىنا, 24,3 پايىزى - ەلىمىزدىڭ وزگە وڭىرلەرىنە قونىستانعانى ايتىلىپ وتىر. ەلگە ورالعان قانداستارىمىزدىڭ 65,4 پايىزى - ەڭبەككە قابىلەتتى جاستا بولسا, 16 جاسقا دەيىنگىلەرى - 28,6 پايىزى, زەينەتكەرلەر - 6 پايىزىن قۇرايدى. ال ەڭبەككە جارامدى ەتنيكالىق قازاقتاردىڭ 10,8 پايىزىنىڭ جوعارعى ءبىلىمى بار بولسا, 20,3 پايىزىندا ورتا ارناۋلى ءبىلىم بار, 65 پايىزى جالپى ورتا ءبىلىمى بار ازاماتتار, ال 3,9 پايىزىنىڭ ءبىلىمى جوق.