وزبەكستاندا تۇڭعىش پرەزيدەنتتى ەسكە الۋ كۇنى جاريالاندى

وزبەكستان باسشىسى شاۆكات ميرزيوەۆ 25 قاڭتار كۇنى «وزبەكستان رەسپۋبليكاسىنىڭ تۇڭعىش پرەزيدەنتى يسلام ابدىعاني ۇلى كاريموۆتى ماڭگى ەستە ساقتاۋ تۋرالى» قاۋلىعا قول قويدى. ول قۇجاتقا سايكەس, يسلام كاريموۆ قايتىس بولعان كۇن – 2 قىركۇيەك وزبەكستاندا «تۇڭعىش پرەزيدەنتتى ەسكە الۋ كۇنى» دەپ جاريالاندى. قۇجاتتا وزبەكستاندا جىل سايىن 30 قاڭتاردا يسلام كاريموۆتىڭ تۋعان كۇنى اتالىپ وتەدى دەلىنگەن. سونىمەن قاتار, وزبەكستان باسشىسى سامارقانداعى ي.كاريموۆ جەرلەنگەن الاڭعا مەموريالدى كەشەن سالۋدى جانە تاشكەنت, سامارقان مەن قارشى قالالارىندا تۇڭعىش پرەزيدەنتكە ارناپ ەسكەرتكىش تۇرعىزۋدى تاپسىردى. بۇدان بولەك, قاۋلىعا سايكەس, وزبەكستاننىڭ تۇڭعىش پرەزيدەنتى ۇزاق جىل قىزمەت اتقارعان وكساروي رەزيدەنتسياسىندا يسلام كاريموۆ اتىنداعى عىلىمي-اعارتۋشىلىق مەموريالدى كەشەن قۇرىلىپ, سول جەردە يسلام كاريموۆ اتىنداعى رەسپۋبليكالىق قايىرىمدىلىق قوعامدىق قور جۇمىس ىستەيتىن بولادى. شاۆكات ميرزيوەۆتىڭ قاۋلىسىمەن سامارقاندا يسلام كاريموۆ اتىنداعى مۋزەي اشىلىپ, تاشكەنت مەملەكەتتىك تەحنيكالىق ۋنيۆەرسيتەتى, اساكا قالاسىنداعى اۆتوموبيل زاۋىتى, فەرعاناداعى مادەنيەت سارايى مەن تاشكەنت حالىقارالىق اۋەجايى تۇڭعىش پرەزيدەنتتىڭ اتىمەن اتالادى. سونداي-اق قۇجاتتا ەلدەگى بىرقاتار وبلىستار مەن تاشكەنتتەگى كوشەلەرگە ي.كاريموۆتىڭ اتىن بەرۋ تۋرالى جازىلعان. بۇدان بىلاي جوعارى وقۋ ورىندارىنىڭ ستۋدەنتتەرىنە وزبەكستان باسشىسىنىڭ قاۋلىسىمەن يسلام كاريموۆ اتىنداعى مەملەكەتتىك شاكىرتاقى تاعايىندالادى. ايتا كەتۋ كەرەك, تاۋەلسىز وزبەكستان رەسپۋبليكاسىنىڭ تۇڭعىش پرەزيدەنتى يسلام ابدىعاني ۇلى كاريموۆ 2016 جىلدىڭ 2 قىركۇيەگىندە 79 جاسقا قاراعان شاعىندا دۇنيە سالدى