قازاقستاندىقتار مەملەكەتتىك ورگان جۇمىسىن ۆەب-پورتال ارقىلى باعالاي الادى

قازاقستاندا ازاماتتاردىڭ مەملەكەتتىك ورگانداردىڭ جۇمىسى تۋرالى اقپارات الۋىن ارتتىرۋ ءۇشىن جۇيەلى جۇمىستار جۇرگىزىلۋدە. بۇل تۋرالى قر ۇكىمەتى وتىرىسىندا قر اقپارات جانە كوممۋنيكاتسيالار ءمينيسترى داۋرەن اباەۆ ايتتى. د. اباەۆ ازاماتتىق قوعامنىڭ مەملەكەتتىك شەشىمدەر قابىلداۋ ۇردىسىنە سىندارلى قاتىسۋىنىڭ ماڭىزدى شارتتارىنىڭ ءبىرى ولاردىڭ مەملەكەتتىك ورگانداردىڭ قىزمەتى تۋرالى اقپاراتتىلىعى بولىپ تابىلاتىنىن اتاپ ءوتتى. وسىعان بايلانىستى وتكەن جىلى قابىلدانعان «اقپاراتتىڭ قولجەتىمدىلىگى تۋرالى» زاڭنىڭ تولىققاندى جۇزەگە اسۋىن قامتاماسىز ەتۋ بويىنشا جۇمىستار جۇرگىزىلۋدە. بىرىنشىدەن, بۇگىندە زاڭ بويىنشا نەگىزگى نورماتيۆتىك بازا قالىپتاستىرىلعان. زاڭنىڭ جۇزەگە اسىرىلۋىنا قوعامدىق باقىلاۋدى قامتاماسىز ەتۋ ماقساتىندا اقپاراتقا قولجەتىمدىلىك ماسەلەلەرى بويىنشا كوميسسيا قۇرىلىپ, جۇمىس ىستەۋدە, ونىڭ قۇرامىندا ۇكىمەتتىك ەمەس سەكتور كەڭىنەن قامتىلعان. ەكىنشىدەن, زاڭ نورمالارىن ءتۇسىندىرۋ ءۇشىن حالىق اراسىندا 2016 جىلى مەملەكەتتىك قىزمەتكەرلەرگە, جەرگىلىكتى ءوزىن-ءوزى باسقارۋ ورگاندارىنىڭ وكىلدەرىنە, ۇەۇ مەن جۋرناليستەرگە ارنالعان سەمينارلار تسيكلى وتكىزىلدى. بۇل جۇمىس بيىل دا جالعاسىن تابادى. ۇشىنشىدەن, اقپاراتقا قولجەتىمدىلىك تۋرالى زاڭ نورمالارىنىڭ ورىندالۋىنا مونيتورينگ جۇرگىزىلەدى. ونىڭ ناتيجەلەرى بويىنشا مەملەكەتتىك ورگاندارعا ءوز ينتەرنەت-رەسۋرستارىن جاقسارتۋ بويىنشا سايكەس ۇسىنىستار جاسالادى. تورتىنشىدەن, «اشىق ۇكىمەتتىڭ» بەس ينتەرنەت-پورتالىن تەحنيكالىق قامتاماسىز ەتۋ بويىنشا اۋقىمدى جۇمىستار جۇرگىزىلۋدە. ماسەلەن, بۇگىندە «اشىق نقا» پورتالىنا 7,5 مىڭنان استام قۇجات ورنالاستىرىلعان, ونىڭ ىشىندە زاڭ جوبالارى مەن مەملەكەتتىك قىزمەتتەردىڭ ستاندارتتارى بار. بۇل پورتالدا نورماتيۆتىك اكتىلەر جوبالارىن قوعامدىق تالقىلاۋ ولاردى قابىلداۋ ءۇشىن مىندەتتى شارت  بولىپ تابىلادى. سونىمەن قاتار, «اشىق بيۋدجەتتەر» پورتالىندا 2 مىڭنان استام ماتەريال مەن كوپشىلىك تالقىسىنا سالۋ ءۇشىن 6 مىڭنان استام بيۋدجەتتىك باعدارلامالار جوبالارى جاريالانعان. «اشىق مالىمەتتەر» پورتالىندا 2 مىڭنان استام مالىمەتتەر جيىنتىعى جاريالانىپ, جۇكتەپ الۋعا ارنالعان 21 موبيلدىك قوسىمشا مەن سەرۆيس ازىرلەنىپ, ورنالاستىرىلعان. جالپى, 2016 جىلى «اشىق ديالوگ» پورتالىنىڭ بلوگ-پلاتفورماسى ارقىلى 9,5 مىڭ ساۋالعا جاۋاپ بەرىلگەن. سونىمەن قاتار, بلوگ-پلاتفورماعا جەرگىلىكتى جەرلەردە الەۋمەتتىك ماڭىزعا يە ماسەلەلەردى شۇعىل شەشۋ ءۇشىن جەرگىلىكتى اتقارۋشى ورگاندار تارتىلعان. ايتار بولساق, 2017 جىلى «مەملەكەتتىك ورگانداردىڭ قىزمەتىنىڭ تيىمدىلىگىن باعالاۋ» پورتالى ىسكە قوسىلدى. وندا قوعامدىق تالقىلاۋعا سالۋ ءۇشىن مەملەكەتتىك ورگانداردىڭ قىزمەتىن باعالاۋ قورىتىندىلارى تۋرالى اقپارات, ستراتەگيالىق جوسپارلار مەن اۋماقتاردى دامىتۋ باعدارلاماسىنىڭ ماقساتتى كورسەتكىشتەرىنە قول جەتكىزۋ بويىنشا ەسەپتەر ورنالاستىرىلاتىن بولادى.