كەنەن اتىنداعى كونكۋرس

تالاي تالانتتىڭ تۇساۋىن كەستى قازاقتىڭ ونەر الەمىندەگى الاتاۋداي اسقاق اقىن, كەربەز كومپوزيتور كەنەن ازىرباەۆتىڭ كەيىنگى ۇرپاققا قالدىرعان ولمەس مۇراسى مەن وشپەس ونەگەسى تاراز تورىندە تاعى ءبىر پاش ەتىلدى. ناقتىراق ايتساق, جامبىل وب­لىستىق مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋىمەن كەنەن ءازىر­باەۆ اتىنداعى «شىرقا, داۋسىم!» اتتى VIII رەسپۋبليكالىق انشىلەر كونكۋرسى اۋليەاتا اسپانىن ءان-جىرعا بولەدى. وسكەلەڭ ۇرپاقتى ك.ءازىر­باەۆتىڭ شىعارماشى­لىعىمەن تەرەڭىرەك تانىستىرىپ, ۇرپاقتان-ۇرپاققا جەتكىزۋدى جانە ءداستۇرلى ورىنداۋشىلىق ونەردى جان-جاقتى ناسيحاتتاۋ, سونداي-اق, دارىندى جاستاردىڭ ورىنداۋشىلىق شەبەرلىگىن شىڭداپ, كوپشىلىككە كەڭىنەن تانىلۋىنا مۇمكىندىك جاساۋدى باستى ماقسات تۇتقان بۇل ءان كونكۋرسىنا بيىل دارقان دالامىزدىڭ استانا, الماتى قالالارىنان جانە اقمولا, ال­ماتى, قىزىلوردا, شىعىس قا­زاقستان, وڭتۇستىك قازاقستان, جام­بىل وبلىستارىنان بارلىعى 22 ءان­شى مەن ونەر مايتالماندارى قاتىستى. جالپى العاندا, كەنەن ءازىر­باەۆ اتىنداعى «شىرقا, داۋسىم!» اتتى رەسپۋبليكالىق انشىلەر كونكۋرسى ءداستۇرلى تۇردە ەكى جىلدا ءبىر رەت وتكىزىلىپ كەلەدى. اۋقىمى كەڭ بۇل بايقاۋدىڭ جۇلدەگەرلەرى قازىرگى تاڭدا ۇلكەن ساحنالاردىڭ ساڭلاعىنا اينالىپ, حالىقتىڭ جۇرەگىنەن ورىن العان. رامازان ستامعازيەۆ, شولپان دارجانوۆا, ارداق بالاجانوۆا, سايات مەدەۋوۆ, وڭال ازاماتوۆا سىندى ەلىمىزگە تانىمال ونەر مايتالماندارى قازىلىق ەتكەن بۇل كونكۋرستا الماتىلىق دانيار راحىمباەۆتىڭ باعى جانىپ, باس جۇلدەنى جەڭىپ الدى. ءسويتىپ, ول كەنەن اتا ۇرپاقتارى اتىنان تىگىلگەن تەمىر تۇلپاردى جەڭىمپازدىڭ قانجىعاسىنا بايلادى. ال تاعى ءبىر جەتىسۋ ءداستۇرلى ءان مەكتەبىنىڭ وكىلى قايراتبەك بەكتۇرسىن جۇلدەلى ءبىرىنشى (700 مىڭ تەڭگە) ورىنعا لايىق دەپ تابىلسا, وڭتۇستىك قازاقستان وبلىسىنان كەلگەن قۇربانالى مۇحاممەد ەكىنشى ورىن (500 مىڭ) بيىگىنەن كورىندى. ەلوردالىق ايدوس وڭعارباي ءۇشىنشى ورىندى (300 مىڭ) جەڭىپ الدى. تورتكەن كەنەنقىزى اتىنداعى ارنايى سىيلىقتى الماتىلىق جاس ءانشى ايدانا اسانباي يەلەنسە, باسقا دا ونە­رىمەن ەرەكشە كوزگە تۇسكەن ءۇش قاتىسۋشىعا ىنتالاندىرۋ ءجۇل­دەسى بەرىلدى. ارينە, جامبىلدىق اعايىن­­داردىڭ قازاق ەلىنىڭ ماق­تا­نىشى بولىپ كەلە جاتقان پەر­زەنت­تىڭ ەسىمىن ارداقتاپ, ۇل­تى­مىزعا قال­دىرعان ۇلاعاتىن ۇلىقتاپ جاتقانى ونەرىمىزگە, تاري­حىمىزعا جاسالعان قۇرمەت ەكەنى انىق. ەندەشە, كەڭ دالانىڭ بوزتورعايى اتانعان كەنەن ءازىر­باەۆ اتىنداعى ءان كونكۋرسى ءالى تالاي تالانتتىڭ تۇساۋىن كەسىپ, اۋليەاتا ءتورىن ءان-جىرعا بولەي بەرەتىنى ءسوزسىز. ورالحان ءداۋىت, «ەگەمەن قازاقستان» تاراز سۋرەتتى تۇسىرگەن اقادىل رىسماحان