باستالدى!

جەكسەنبى كۇنى ەلورداداعى «استانا – ارەنا» ستاديونىندا  VII قىسقى ازيا ويىندارى سالتاناتتى تۇردە اشىلدى. ونداعى 27 مەملەكەتتەن كەلگەن سپورتشىلار دەلەگاتسياسى مەن شەتەلدىك قوناقتار جانە رەسپۋبليكامىزدىڭ وبلىستارىنان جينالعان وتانداستارىمىز الدىندا ەلباسى نۇرسۇلتان  ءابىش ۇلى نازارباەۆ ءسوز سويلەدى.

قۇرمەتتى قوناقتار!

قىمباتتى سپورتشىلار!

قادىرلى جانكۇيەر قاۋىم!

قازاقستان حالقى اتىنان VII قىسقى ازيا ويىندارىنا جينال­عان بارشاڭىزدى ىستىق ىقىلاس­پەن قارسى العانىما قۋانىش­تىمىن. الەم حالقىنىڭ تەڭ جارتىسى مەكەندەيتىن ازيا قۇرلىعىنداعى بۇل ءدۇبىرلى جارىس – بيىلعى جىل­دىڭ ەڭ ۇلكەن سپورت مەرەكەسى. ءبىز مۇنداي قۇرلىقتىق شا­را­نى تمد جانە مۇسىلمان ەلدەرى اراسىندا تۇڭعىش رەت وتكىزىپ وتىر­مىز. بۇل جاسامپاز شارانىڭ قازاق جەرىندە ءوتۋى – ەلىمىزگە كورسەتىل­گەن قۇرمەت پەن سەنىمنىڭ جارقىن ايعاعى دەپ بىلەمىن. بۇل قازاقستان تاۋەلسىزدىگىنىڭ 20 جىلدىق مەرەكەسىنىڭ بەتاشار وقيعاسى بولادى. مەنىڭ شاقىرۋىمدى قابىل الىپ, بايراقتى باسەكەنىڭ اشى­لۋىنا كەلگەن مارتەبەلى مەيمان­دارعا ريزاشىلىق بىلدىرەمىن. ازيا وليمپيادالىق كەڭەسى­نىڭ پرەزيدەنتى احماد ءال-فاحاد ءال-ساباح مىرزاعا جانە حا­لىق­ارا­لىق وليمپيادا كوميتەتىنىڭ پرەزيدەنتى جاك روگگە مىرزاعا العىس ايتامىن. وليمپيالىق ويىندار بۇگىن­دە ەلدەر مەن حالىقتار اراسىن­دا­عى دوستىقتىڭ التىن ارقاۋىنا اينالدى. بايىرعى بايتاق مەكەندە ءبىزدى ازيادا رۋحى جاقىنداستىرا ءتۇ­سە­دى دەپ سەنەمىن. بۇل ءبىزدىڭ «ماقساتى ءبىردىڭ – رۋحى ءبىر» دەگەن ورتاق ۇرا­نى­مىزدا كورىنىس تاپقان. شىعىس پەن باتىستى جالعا­عان ۇلان-عايىر قازاق جەرىندەگى ازيادا ويىندارى استانا مەن الما­تىدا قاتار وتكىزىلەدى. ەۋرازياداعى ىزگىلىك پەن بەيبىتشىلىكتىڭ بەسىگىنە بالانعان استانادا بۇگىن وليمپيادا الاۋى تۇتانىپ وتىر. ەلوردامىزدا قىسقا ۋاقىت ارا­لىعىندا حالىقارالىق  دەڭ­گەي­دەگى ءىرى سپورت كەشەندەرى پاي­دالانۋعا بەرىلدى. وزدەرىڭىز كورىپ وتىرعان, 30 مىڭ ادامعا ارنالىپ سالىنعان وسى «استانا-ارەنا» ستاديونى سونىڭ جارقىن ايعاعى. ال الماتىداعى مەدەۋ مەن شىمبۇلاقتا الەمدىك تالاي رەكوردتار دۇنيەگە كەلگەنىن بار­شا­ڭىز بىلەسىزدەر. مەن وسى ازيادا ويىن­دارىن­دا دا كوپتەگەن رەكوردتار جاڭا­رادى دەپ سەنەمىن. قىمباتتى دوستار! سپورتتا شەكارا جوق, ول حالىقتاردى بىرىكتىرەدى. بيىلعى جىلى قازاقستاندا ءوتىپ وتىرعان قىسقى ازيا ويىندارىنىڭ تاريحىندا ءبىرىنشى رەت وعان قاتىسۋشىلاردىڭ سانى 27 ەلدەن استى. مىڭعا تارتا سپورتشىلار سپورت­تىڭ ون ءبىر تۇرىنەن مە­دال­داردى ساراپقا سالادى. قىسقى ازيا ويىندارىمەن ءبىز قازاقستان رەسپۋبليكاسى تاۋەل­سىز­دىگىنىڭ 20 جىلدىعىنا ارنال­عان شارالار بەتىن اشامىز. جاڭا عانا ازيا وليمپيالىق كە­ڭەسىنىڭ جالاۋى كوتەرىلدى, سپورت­شى­لار مەن تورەشىلەر انت قابىلدادى. مەن ءادىل كۇرەستى ەڭ لايىق­تىلاردىڭ جەڭىسكە جەتۋىنە تىلەك بىلدىرەمىن. جانكۇيەرلەرگە قىزىقتى كورى­نىس­تەر مەن جاڭا اسەرلى سەزىم تىلەيمىن. ازيادانىڭ ىزگى الاۋى ماڭگى دوستىقتىڭ بەلگىسىنە اينالسىن. قادىرلى قاۋىم! وسىمەن VII قىسقى ازيا ويىن­دارىن سالتاناتتى تۇردە اشىق دەپ جاريالايمىن! * * *

ازيادا الامانى

استانا مەن الماتىدا VII قىسقى ازيا ويىندارىنىڭ جارىستارى ءوتىپ جاتىر

باستالدى!

جەكسەنبى كۇنى بىرنەشە جىلدان بەرى تاعاتسىزدانا كۇتكەن كۇنىمىز دە كەلىپ جەتتى. وسى كۇنى استاناداعى «استانا-ارەنا» جابىق ستاديونىندا قىسقى ازيا ويىندارى سالتاناتتى جاعدايدا اشىلىپ, ءال-كۋۆەيت قالاسىنان باستاۋ العان ازيادانىڭ الاۋى الىپ ارەنادا ورناتىلعان ويىنداردىڭ باس قازاندىعىندا تۇتاندى. بۇل ەلىمىز تاۋەلسىزدىگىنىڭ 20 جىل­دىق مەرەيتويىنىڭ بەتاشارى ىسپەتتەس بولعان ءىس-شاراعا ەلباسى نۇرسۇلتان نازارباەۆ, سالتاناتتى راسىمگە ارنايى شاقىرتۋمەن كەلگەن قىرعىز رەسپۋب­ليكاسىنىڭ پرەزيدەنتى روزا وتۋنباەۆا, ءابۋ-دابيدىڭ مۇراگەر حانزاداسى شەيح مۇحاممەد بەن زايد ءال-ناحايان, ازيا وليم­پيادالىق كەڭەسىنىڭ پرەزيدەنتى شەيح احماد ءال-فاحاد ءال-ساباح, حا­لىق­ارالىق وليمپيادا كوميتەتىنىڭ ءتور­اعاسى جاك روگگە زايىبىمەن جانە قىسقى ويىندارعا قاتىسۋشى ەلدەردىڭ رەسمي دەلەگاتسيالارى مەن سپورتشىلار, ەلىمىزدىڭ جەر-جەرىنەن وسى سالتاناتتى شارانى تاماشالاۋعا كەلگەن وتانداس­تارىمىز بەن شەت ەل تۋريستەرى قاتىستى. الدىن-الا اتاپ وتەتىن نارسە, ازيا­دانىڭ اشىلۋ سالتاناتى وتە وراسان, وتانداستارىمىزدىڭ ءوز ەلىندە بۇرىن-سوڭ­دى كورمەگەن زور اۋقىممەن ۇيىم­داس­تىرىلدى. مۇندا 10 مىڭ شارشى مەتردى قۇرايتىن ەكراننىڭ كەڭىستىگىندە 27 مىڭ ادامدى 2 ساعات 40 ءمينوت بويى بەيجاي قالدىرعان جوق. ال ازيادانىڭ اشىلۋ سالتاناتى تۋرا 10 ءمينوت قال­عان­دا كەرى ۋاقىت ساناۋمەن باستالدى. ءسويتىپ, الىپ تابلوداعى كەرى ۋاقىت ساناۋ 19.00-گە كەلگەندە اشىلۋ ءراسىمىن­دەگى ماتىنگەرلىك حابارلامالار تارتىپكە سايكەس, ويىنداردى قارسى العان ەلدىڭ مەملەكەتتىك ءتىلى – قازاق تىلىندە جانە اعىلشىن تىلىندە جۇرگىزىلگەن سوڭ, ەكى اق بوز ات مىنگەن ازامات مەملەكەتتىك تۋدى ۇستاپ, الاڭنىڭ جيەگىمەن ءجۇرىپ ءوتتى. وسىدان كەيىن مەملەكەتتىك تۋدى قازاقستاننىڭ حالىق ءارتىسى ءاسانالى ءاشىموۆ, ءانشى-كوم­پوزي­تور ەسكەندىر حا­سان­عاليەۆ, اتاقتى سپورت­شىلار ءامين تۇياقوۆ پەن جانىبەك ساۋرانباەۆ الاڭ­نىڭ سولتۇستىك تريبۋنا­سى جاعىندا ور­ناتىلعان ساحناعا قاراي الىپ شىعىپ, قۇرمەت قاراۋىلىنىڭ كا­پيتانى قانات تۇزە ۇلى باستاعان سارباز­دارعا تابىس ەتتى. ودان ءارى مەملەكەتتىك ءانۇران شىر­قالىپ, ازياداعا قاتىسۋشى ەلدەر رەت-رەتىمەن كورەرمەندەر الدىنان كورىن­دى. ءبىزدىڭ ەل جارىستى الاڭعا قا­بىل­داۋشى ەل رەتىندە ەڭ سوڭىنان شىقتى. جەردىڭ كيەسى مەن ەلدىڭ يەسىن تانىت­ق­ان ءداستۇرلى فولكلورلىق قويىلىمدار بىرىنەن سوڭ ءبىرى 27 مىڭعا جۋىق كورەر­مەننىڭ كوزايىمىنا اينالدى. ءتول تاريحىمىز بەن ۇلت مادەنيەتىنىڭ تەرەڭ تامىرىنان سىر شەرتە بىلگەن بارلىق اۋەن مەن ىرعاق, كورىنىس پەن قويىلىم ايىزىمىزدى قاندىرعانداي بولدى. ءاسى­رە­سە, قاناتتى پىراق اتتاردىڭ سيم­ۆوليكالىق ءمانى ايرىقشا اسەر قال­دىر­عانى ءسوزسىز. ويتكەنى, ول جاي عانا قا­نات­تى ات ەمەس, ول الەم وركەنيەتىنە كوسىلە شاباتىن ناعىز پىراق بولاتىن.  تۇلپارلارمەن بىرگە دارحان دانالىقتى دارىتاتىن اسپان, جەر, سۋ, اۋانىڭ قادىر-قاسيەتىن بىلدىرەتىن بەينەسيۋجەتتەر ەكراننان كورسەتىلىپ وتىردى. ۇلت­تىق اتريبۋتتاردىڭ ۇيلەسىم تاپقان تۇسى كوك اسپانعا سامعاپ ۇشقان قىران­مەن سايكەس استاسىپ جاتتى. بولاشاققا كوز جۇگىرتە بىلەتىن, ەلدىڭ ەرتەڭىن ەلدەن بۇرىن ويلاي الاتىن كوك ءبورىنىڭ ۇرپاقتارى وزدەرىنىڭ ەشكىمنەن دە كەم ەمەستىگىن تاعى دا ءبىر دالەلدەگەندەي. ءاربىر تەاترلاندىرىلعان مۋزىكا­لىق قويىلىمنىڭ وزىندىك ءمان-ماعى­ناسى دا بولدى. نۇرجامال ۇسەنباەۆا­نىڭ ورىنداۋىنداعى ءان اياسىندا كۇننىڭ ىستىق شۋاعى مەن نۇرىنىڭ استىنان دۇنيەگە ءسابي كەلدى. انانىڭ جىلى ءارى پاك جۇرەگى مەن ىستىق ىقىلاسىنا بولەنىپ ءوسىپ, جۇرەگىنە ۇيالاعان ماحاببات جەر-انا ءتوسى – جازيراعا جەتەلەي بەردى, جەتەلەي بەردى... سودان بارىپ ساحنالاس كوك ايدىن­نىڭ ورتاسىندا قازاق جەرىندە دۇنيەگە كەلگەن عۇلامالار مەن كوسەمدەردىڭ ەسىمدەرى, تۋعان جەرلەرى جازىلعان ۇلكەن كىتاپ پاراقتالا باستادى. جەر-انانىڭ قادىر-قاسيەتىنەن وسىنداي الەمگە ايگىلى بولعان ۇلت پەرزەنتتەرىنىڭ حالىققا ماقتانىش بولاتىنىن الەمگە جار سالعانداي اسەر قالدىردى. شىنىمەن دە بۇل ايتىلعانداردىڭ ءبارى ماقتانۋعا تۇرارلىق قۇدىرەتتى قۇندىلىقتار عوي! ساحنا تورىنە جايعاسقان وركەسترلەر نازدى اۋەندەرمەن, كۇمبىرلەگەن كۇي اۋەزىمەن قويىلىمدارعا جاراسىمدى ءور­مەك توقىدى. ستاديونعا جينالعان وتان­داس­تارمەن بىرگە شەتەلدىك مەيمان­داردىڭ دا كوڭىل اسپاندارى ك ۇلىمسىرەگەندەرى ءجۇز­دەرىندەگى جىميعان كەلبەتتەرىنەن-اق بىلۋگە ابدەن بولادى. سودان بارىپ ابايدىڭ «جەلسىز ءتۇن­دە جارىق اي» اۋەنىنىڭ سۇيەمە­لدەۋىمەن ايدىن ورتاسىنا شاڭىراق بەينەلەس كورىنىس كەشتىڭ ءسان-سالتاناتىن ەسەلەي ءتۇستى. الەمدەگى بەيبىتشىلىك پەن ەلىمىزدەگى ۇلت بىرلىگىنىڭ تەرەڭ ماعىنالىق سيپاتىن دارىپتەگەن شاڭىراق ءوز بەينەسىمەن ۇلكەن ماعىنانى مەڭزەگەنىن وتىرعان ءاربىر كورەرمەننىڭ ساناسىنا سايالاعانداي بولدى. ۇلتتىق ساز-اۋەنى­مىز جايلى    كومپوزيتور رينات گايسين: «ءبىزدىڭ ۇلتتىق اۋەندەرىمىز ەشقانداي مەملەكەتكە, ەشبىر ۇلتقا ۇقسامايدى. ءار مەملەكەتتىڭ ءداستۇرى بار. ءار مەم­لەكەتتىڭ اۋەندەرى بار. مەن ويلايمىن, جالپى قازاقتىڭ مۋزىكاسى, مادەنيەتى ەرەكشە. وسىنىڭ ءبارى اشىلۋ سالتا­ناتىندا كورىنىس تاپقانىنا قاتتى قۋا­نىشتىمىن», – دەپ اعىنان جارىلدى. ءۇش ساعاتقا سوزىلعان اشىلۋ جاسامپاز شارانىڭ ۇيىمداستىرىلۋ جۇمى­سى­نا رەسەيلىك رەجيسسەرلىك توپتىڭ بەلسەنە قاتىسقاندارىن ارنايى اتاپ وتكىمىز كەلەدى. ادام جانىن جادىراتاتىن تال­عامى جوعارى كەشتىڭ ءوز دەڭگەيىندە ءوت­كىزىلۋى ءۇشىن بۇل شىعارماشىلىق توپ­تىڭ دا تەرەڭ ءارى بايسالدى ىزدەنگەندەرى كورىنىپ-اق تۇر. حالىقارالىق تالاپقا ساي, 30 مىڭ ادامعا ارنالعان ستاديون قوناقتارى ساحنادا بەرىلىپ جاتقان قانداي قو­يىلىم بولماسىن, ەرەكشە ىقىلاسپەن قوشەمەتتەرىن ءبىلدىرىپ جاتسا, اسىرەسە قازاقستاندىقتار جاعىنان ناعىز پات­ريوت­تىق سەزىمدى اڭعاردىق. كورىنىس ەك­رانداعى نايزاعايعا كەزەك بەردى. وسى كەزدە, تاسقا قاشالىپ سالىنعان كىسى بەي­­نەسى مەن بۇعىلار كورسەتىلدى. جاۋىن­­گەرلەردىڭ بي كومپوزيتسياسى با­رى­سىندا بيىكتەن ءتۇس­كەن التىن ادام­نىڭ ءمۇسىنى مەن كوپ­تەگەن ۇلت وكىلدەرىن ءوزىنىڭ بەيبىت اسپانى­نىڭ استىنا شو­عىر­لاندىرعان قازاقتىڭ شاڭىراعىن كو­رەرمەندەر ەرەكشە ىقى­لاس­پەن تاما­شا­لادى. وركەستردىڭ سۇيە­مەل­دەۋىمەن ءوتىپ جاتقان تۇنىپ تۇرعان ونەردى شەتەل قوناقتارى قىزۋقاندى تاماشالاسا, جەر-جەردەن جينالعان ءوز وتانداس­تارى­مىزدىڭ قويىلىمدى كورۋ كەزىندەگى بەلسەندىلىكتەرى ۇزدىكسىز سوعىل­عان قو­شە­مەتتەردەن-اق سەزىلىپ تۇردى. الاڭ تورىنە جەزتاڭداي انشىلەر دە كەلىپ جەتتى. ءدال وسى مەزەتتە ساحناعا باتىرحان شۇكەنوۆ پەن روزا رىمباەۆا ۇلتتىق رۋحىمىزدى ودان ءارى جىگەرلەندىرەتىن, وتان-اناعا دەگەن سۇيىسپەن­شىلىگىمىزدى ارتتىراتىن تاماشا اندەرىن تارتۋ ەتتى. بۇل كەزدە ۇلتتىق ناقىشتا, ويۋ-ورنەكتەرمەن كومكەرىلگەن, شاڭى­را­عى بارىنشا كەڭ, بوساعاسى بەرىك كيىز ءۇي ستاديون الاڭىنىڭ قاق ورتاسىنان جار­قىراي ءتۇسىپ, بوساعانىڭ ءرولى مەن ماڭى­زىن ادام بالاسى ءۇشىن يگىلىگى مول ەكەندىگىن اڭعارتتى. جالپى, جەر-انانىڭ ءسانىن كەلتىرىپ, اجارىن اشاتىن تابيعي زاڭدىلىقتىڭ ءبىرى – جاڭبىر ەكەندىگى داۋسىز. ونى مۇسىلمان ەلدەرى اللا تاعالانىڭ بىزگە جىبەرگەن نۇرى دەپ جاتادى. ءسويتىپ, ەكراندا «شەلەكتەپ» جاۋىپ جاتقان نوسەر كورىنىسى مەن كادردان تىس جا­را­تۋشىنىڭ شاپاعاتى مەن نۇرى جايلى كەڭ ماعلۇمات بەرىلىپ جاتتى. كوز الدى­مىزعا جاڭبىر ەلەستەپ, تابيعات بىتكەن­نىڭ ءبارى تازارىپ جاتقانداي اسەر قال­دىردى. سويتسەك, ەكرانداعى جاڭبىر دەگەنىمىز سول-اق ەكەن, ستاديون ىشىندە شىن مانىندەگى جاڭبىر جاۋىپ كەتتى. بىراق, ارينە جاساندى جاڭبىر. تۇنىپ تۇرعان لوگيكا, تەرەڭ ماعىنالى ستسەناري... الاڭ ءىشىن كوك پەن جاسىل ءتۇس ارالاس تەڭىزدى سۋرەتتەيتىن بەينەكورىنىس جاۋلاپ العانداي. ءبىر كەزدە, تەڭىزدىڭ بەتىندە ءبىر قوزعالىس بايقالادى. ءوزى ۇلكەندەۋ كەلگەن. انىقتاپ قاراساق كەمە. تەڭىز تولقىنىنان ءارى-بەرى شايقا­لىپ كەلەدى. جاڭبىر بولسا ءالى جاۋىپ تۇر. ستاديون ءىشى 30 مىڭدىق ادامنان اۋاسى تارىلىپ جاتقاندا جاڭبىردىڭ جاۋعانى بۇكىل ازيادا قوناقتارىنا جاڭاشا سەرپىن بەرگەندىگىن ايتپاي كەتۋگە بولماس. جالپىلاما تۇردە ايتقاندا, بۇل كومپوزيتسيالار مەن قىسقاشا ەپيزودتار ماعى­ناسى تۇركى تىلدەس ەلدەرگە تاڭسىق نەگىزدە ۇيىمداستىرىلعان بولسا, ۇلت­تىق ناقىش­قا بارىنشا كوڭىل بولىنگەن­دىگىن كوكى­رەك كەرىپ ماقتانىشپەن ايتا الا­مىز. ازيادا­نىڭ اشىلۋ سالتاناتى­نا كەلگەن قوناق­تاردىڭ باسىم كوپشى­لىگى دە وسى پىكىردە. سان ءتۇرلى وتشاشۋلارمەن قاتار ار­نايى ەكراننان كورسەتىلگەن بەينە- كورىنىستەن ءجىتى قاراعان جانعا ۇلتتىق قۇندىلىق­تارى­مىز بەن سالت-ءداستۇر­لەرى­مىزدەن ەداۋىر ماع­لۇماتتار بەرەدى. مۇن­داعى قىران بۇركىت باپتا­عان ساياتشى مەن كۇمبىرلەگەن دوم­بىرا ءۇنى دە قاي قازاقتىڭ دا قانىن قىز­دىر­­ماي قويماي­تىنى انىق. مىڭ بۇرالعان ارۋلار بيلەرى مەن زەرگەرلىك اشەكەيلەر جاساپ جاتقان بارماعىنان بال تامعان شەبەرلەر ارەكەتى دە ونى قاراعان وزگە جۇرت­تىڭ دا تاڭ­دايىن ەرىكسىز قاق­تىرارى ءسوزسىز. قىزىلدى-جاسىلدى كومكەرىلگەن كو­رى­نىستەر اسەم بيلەرمەن جالعاسىن تاۋىپ, ەل نامىسىن تۋ ەتىپ جينالعان جۇرت­تىڭ كوڭىلىن كوتەرە بەردى. سىرعا تولى قوبىز ءۇنى مەن شاڭقوبىزدىڭ سا­زىن دا ونى ساعىنعان جۇرت ىنتىعا تىڭدادى. شاڭقوبىزبەن سازدى اۋەندى ەدىل قۇ­سايىنوۆ ناقىشىنا كەلتىرە ورىنداپ, كورەرمەننىڭ ىستىق ىقىلاسى­نا بولەندى. ەندى ءبىر ءسات سامۇرىق قۇس ۇشتى ساحنادا. حالىق ءانى «اقباقاي» اۋەنىمەن قالىقتاعان قىران كورىنىسى دە ەرەكشە سەزىم ۇيالاتتى. بەلگيادان ارنايى كەلگەن ءانشى لارا فابياننىڭ شىر­قاعان ءانىن ستاديونداعى حالىق ەرەك­شە ىلتيپاتپەن تىڭدادى. اسىرەسە, جاستار جاعى­نىڭ وعان دەگەن قۇرمەتىنىڭ شەكسىز بول­عانىن ايرىقشا اتاعان ءجون. وسىدان سوڭ جاساندى قار ءتۇسىرۋ مەن كورەرمەن­دەر جاعىنان سالتاناتتى شارانىڭ كوركىن قىز­دىرا ءتۇسۋ ماقساتىندا ار­نايى ۇيىم­­داستىرىلعان قار لاقتىرۋ شاراسىمەن شوۋ ءوز جالعاسىن تاۋىپ جاتتى. قورىتىندى ءسات باسى. ساحنا تورىنە ازيا وليمپيادالىق كەڭەسىنىڭ تۋىن سەرىك قوناقباەۆ, ۆلاديمير سميرنوۆ, ليۋدميلا پروكاشەۆا, ءاليا ءجۇسىپوۆا, كەنجە ءسار­سەكەنوۆا, ماي حۆان  سىندى ەلىمىزگە بەلگىلى سپورت قايراتكەرلەرى كوتەرىپ شىق­تى. وسى­دان كەيىن اوك-ءتىڭ رەسمي ءانۇرانى ورىن­دالىپ, ونىڭ جا­لاۋى بيىكتە جەلبىرەگەن قازاقستان تۋى­نىڭ جانىنان بوي تۇزەدى. ءدۇبىرلى دودانىڭ ماڭىزى سانالاتىن اشىلۋ سالتاناتى مەرەكەسى استانادا ءوتىپ وتىرعانىن ەسكەرسەك, قالا اكىمى يمان­عالي تاسماعامبەتوۆ اق ازياداعا قاتىسۋ­شى سپورتشىلار مەن شارانى ار­نايى تاما­شالاۋعا كەلگەن قالا قوناق­تارىنا, سونداي-اق بارشا قازاقستان­دىق­تارعا ءجۇ­رەك­جاردى تىلەكتەرىن جەتكىزۋدى دە نازاردان تىس قالدىر­مادى. جارىسقا قاتىسۋ­شىلار مەن قوناقتار الدىندا ءسوز سويلە­گەن ازيا وليم­پيادالىق كەڭەسىنىڭ پرەزيدەنتى احماد ءال- فاحاد ءال- ساباح قىسقى ازيا ويىن­دارىن جوعارى دەڭ­گەيدە ۇيىم­داستىر­عان قازاق­ستان پرەزيدەنتى مەن ۇكى­مەتى­نە, ۇيىمداس­تىرۋ كوميتەتىنە, سو­نى­­مەن قاتار استانا مەن الماتى قالا­لارى­نىڭ تۇرعىندارىنا العىس سەزىمىن ءبىلدىردى. سونداي-اق, ول ازيادا ءوتىپ جات­قان قوس قالا­داعى ەرىكتىلەرگە, ءباسپاسوز وكىلدەرى مەن دەمەۋشىلەرگە دە ءوز ريزا­شى­لىعىن جەتكىزە كەلە, قىسقى سپورت قۋانى­شىن بولىسۋگە شا­قىرا­تىنىن دا ايتىپ ءوتتى. وسىدان كەيىن مىنبەگە قازاقستان رەسپۋبليكاسىنىڭ پرەزيدەنتى نۇرسۇل­تان نازارباەۆ كوتەرىلىپ, ءسوز سويلەدى دە قىسقى ازيا ويىندارىن سالتاناتتى تۇردە اشىق دەپ جاريالادى. ازيادا الاۋى سالتاناتتى ءراسىم بارى­سىندا باس قازاندىقتا تۇتانىپ, جان­كۇيەر جۇرتتى جەلپىندىرىپ جىبەردى. ءابىل­سەيىت ايحانوۆ, جاق­سىلىق ءۇش­كەمپىروۆ, داۋلەت تۇر­لى­حانوۆ, ەرماحان ىبىرايى­موۆ, باق­تيار ارتاەۆ, جانىبەك قاندىباەۆ, تيمۋر تۇر­سىن­باەۆ سىندى ساڭلاقتار كۇم­بىر­لەگەن توك­پە كۇي سۇيە­مەلدەۋىمەن الاۋدى سالتا­ناتتى تۇردە جاقتى. وسى تۇس شارا­نى تاماشا­لاۋشى حالىق رۋحتى ۇنمەن «قازاق­ستان!, قازاق­ستان!» دەپ ۇرانداپ, وتانداس­تارى­مىز­دىڭ تەك جەڭىس بيىگىنەن كورىنۋ­لەرىنە دەگەن تىلەكتەرىن وسىلاي جەتكىزىپ جاتتى. بۇل ولاردىڭ ەلىمىزگە ءجا­نە وتانداس سپورتشى­لارعا دەگەن ري­ياسىز اق پەيىلدەن تۋعان جۇرەكجاردى ىقى­لاستارى ەدى. ءيا, ەلىمىزدىڭ ابىرويىن اسقاقتاتار وسىناۋ بايراقتى سىندا جەرلەستەرىمىزگە ءسات­تى­لىكتەر سەرىك بولعاي. ارتىندا ار­قالا­نىپ ءدۇيىم جۇرتى تۇرعاندا وتان­داستارى­مىز ولجانى كوپتەپ سالادى دەگەن ءۇمىت­تەمىز. اتالعان شاراداعى جان­كۇيەرلەر بەلسەندىلىگى ءبىزدى وسىنداي ۇلكەن ءۇمىتتى ويعا جەتەلەيدى. «ەگەمەن قازاقستاننىڭ» تىلشىلەر توبى. ----------------------------------------- سۋرەتتەردى تۇسىرگەندەر س.بوندارەنكو, ب.وتارباەۆ, ب.سارسەنوۆ.