پەتروپاۆل. 4 مامىر. سولتۇستىك قازاقستان وبلىسىنىڭ تىلدەردى دامىتۋ جونىندەگى باسقارماسى قازاقستان رەسپۋبليكاسىنىڭ ومبى قالاسىنداعى كونسۋلدىعىنىڭ قولداۋىمەن «ونلاين رەجىمى ارقىلى قازاق ءتىلىن وقىتۋدىڭ ءتيىمدى جولدارى» دەگەن تاقىرىپتا سەمينار وتكىزدى. شارانىڭ باستى ماقساتى – وسىندا تۇراتىن قانداستارىمىزدىڭ ۇلتتىق-مادەني اۆتونومياسىنا ادىستەمەلىك كومەك كورسەتۋ. بۇل تۋرالى سولتۇستىك قازاقستان وبلىسىنىڭ تىلدەردى دامىتۋ جونىندەگى باسقارماسىنىڭ ءباسپاسوز قىزمەتىنە سىلتەمە جاساعان egemen ءتىلشىسى حابارلادى.
ەل تاۋەلسىزدىگىنىڭ 25 جىلدىعى قارساڭىندا ۇيىمداستىرىلعان شارا ف.م.دوستوەۆسكي اتىنداعى ومبى مەملەكەتتىك ۋنيۆەرسيتەتىندە ءوتتى. ونىڭ الدىندا قازاق ءتىلىن وقىتۋ بويىنشا وقىتۋ-ادىستەمەلىك قۇرالدارىنىڭ كورمەسى تاماشالاندى. قازاق ءتىلىن جانە سالت-داستۇرلەردى ناسيحاتتايتىن بەينەروليكتەر كورسەتىلدى.
سەميناردىڭ جۇمىسىنا قازاقستاننىڭ ومبى وبلىسىنداعى ۆيتسە-كونسۋلى ۇلان ابدىبەكوۆ, ساۋدا وكىلدىگىنىڭ ۋاكىلى سارا مۋناەۆا, قازاق ۇلتتىق-مادەني ورتالىعىنىڭ وكىلدەرى, ف.م.دوستوەۆسكي اتىنداعى ومبى مەملەكەتتىك ۋنيۆەرسيتەتىنىڭ وقىتۋشىلارى مەن ستۋدەنتتەرى, جەرگىلىكتى جەردەگى مەكتەپتەردىڭ قازاق ءتىلى مەن ادەبيەتى پاندەرىنىڭ مۇعالىمدەرى قاتىستى.
سەمينار بارىسىندا وبلىسىمىزدا جانە ەلىمىزدە «تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىنىڭ» جۇزەگە اسىرىلۋ بارىسى, قازاق ءتىلىن وقىتۋدىڭ ءتيىمدى جولدارى تۋرالى كەڭىنەن باياندالدى. قازاق ءتىلىن وقىتۋ بويىنشا جاڭا وقۋلىقتار مەن باعدارلامالار تانىستىرىلدى. ەكى جۇزدەن استام وقۋ قۇرالدارى تابىستالدى.
قازاق ءتىلى مۇعالىمدەرىنىڭ پەتروپاۆل قالاسىندا بىلىكتىلىكتى ارتتىرۋ كۋرستارىنان ءوتۋ جونىندەگى تىلەكتەرى قاناعاتتاندىرىلاتىن بولدى. قازاق ۇلتتىق-مادەني ورتالىعى جانىنان قازاق ءتىلىنىڭ قوعامدىق كىتاپحاناسىن جانە ومبى قالاسى قازاق ءتىلى مۇعالىمدەرىنىڭ قاۋىمداستىعىن قۇرۋ تۋرالى وي-پىكىرلەر قولداۋ تاپتى.
ءومىر ەسقالي.
دەرەك, فوتو: سولتۇستىك قازاقستان وبلىسىنىڭ تىلدەردى دامىتۋ جونىندەگى باسقارماسىنىڭ ءباسپاسوز قىزمەتى.