اقش پرەزيدەنتى دونالد ترامپ سوڭعى ۋاقىتتا اينالاسىنداعى كەڭەسشىلەرى مەن سەنىمدى ادامدارىنان ءبىر سۇراقتى ءجيى سۇراي باستادى. 2028 جىلى رەسپۋبليكالىق پارتياعا كىم جەتەكشىلىك ەتۋى كەرەك: ۆيتسە-پرەزيدەنت دجەي دي ۆەنس پە, الدە مەملەكەتتىك حاتشى ماركو رۋبيو ما؟ ءازىل-شىنى ارالاس ايتىلعانىمەن, بۇل ساۋالدىڭ استارىندا ترامپتىڭ بولاشاققا قاتىستى ناقتى جوسپارى جاتقانداي, دەپ جازادى Egemen.kz.
الداعى سوڭعى ارالىق سايلاۋلار تاياعان سايىن ترامپ ءوز جولىن جالعاي الاتىن تۇلعالاردى تارازىلاپ ءجۇر. ونىڭ پايىمىنشا, بۇل رولگە ۆەنس تە, رۋبيو دا لايىق. ۆەنسكە دەگەن ءىلتيپاتى تۇسىنىكتى. ءدال وسى سەنىم ونى ۆيتسە-پرەزيدەنتتىككە الىپ كەلدى.
سونىمەن قاتار ترامپ سوڭعى كەزدەرى رۋبيونى دا ءجيى ماقتاي باستادى. مەملەكەتتىك حاتشى ءارى ۇلتتىق قاۋىپسىزدىك جونىندەگى كەڭەسشى رەتىندەگى سالماعى ارتىپ, حالىقارالىق ساياساتتا كوزگە تۇسە باستاعانى پرەزيدەنت نازارىنان تىس قالعان جوق. الايدا Axios سويلەسكەن دەرەككوزدەر مۇنى ترامپتىڭ ۆەنستەن تەرىس اينالۋى دەپ قابىلداماۋ كەرەكتىگىن ايتادى.
قازاقستاندا ۆيتسە-پرەزيدەنتتى كىم تاعايىندايدى؟
پرەزيدەنتتىڭ كەڭەسشىسى: «ۆەنس پەن رۋبيو – ترامپ ويىنداعى ەڭ ۇيلەسىمدى جۇپ. ارينە, كوش باسىندا ۆەنس تۇر», دەيدى. دەگەنمەن, ونىڭ ايتۋىنشا, «رۋبيو – ۆەنس» نۇسقاسى دا پرەزيدەنتكە جات ەمەس.
ۆەنستىڭ ارتىقشىلىعى – دايىن كومانداسى. ەگەر ول كۇتكەندەي پرەزيدەنتتىككە تۇسسە, ناۋقاندى جۇرگىزەتىن ساياسي تىرەگى بار. ال رۋبيو مۇنداي قۇرىلىم جاساماعان ءارى ۆەنستىڭ العا شىعۋىنا قارسى ەمەس. ول مۇنى بۇرىن دا اشىق ايتقان. بىلتىر Vanity Fair جۋرنالىنا بەرگەن سۇحباتىندا رۋبيو:
«ەگەر دجەي دي ۆەنس سايلاۋعا تۇسسە, ول ءبىزدىڭ ۇمىتكەرىمىز بولادى. مەن ونى العاشقىلاردىڭ ءبىرى بولىپ قولدايمىن», دەگەن. بۇل ۇستانىم قازىر دە وزگەرمەگەن, رۋبيو ونى ۆەنسكە جەكە دە جەتكىزگەن.
ەكى ساياساتكەردىڭ اراسى جاقىن. ەكەۋى سەناتتا بىرگە قىزمەت ەتتى, اپپارات باسشىلارى دا ءوزارا سىيلاس. ترامپتىڭ ءوزى بىلتىر ۆەنستى «ەڭ ىقتيمال مۇراگەر» دەپ اتاعان. ء«ادىلىن ايتقاندا, ول – ۆيتسە-پرەزيدەنت», دەگەن ەدى سول كەزدە. بىراق سونىمەن قاتار رۋبيونىڭ دا ۆەنسپەن ءبىر تىزىمدە بولعانىن قۇپ كورەتىنىن جاسىرماعان.
كەڭەسشىلەردىڭ ايتۋىنشا, ترامپ مۇراگەرىن ەرتە اتاۋدان ادەيى بويىن اۋلاق سالادى.
ترامپتىڭ ءترامپلينى: پرەزيدەنت بولماي تۇرىپ كىم ەدى؟
بۇل تۇستا رۋبيونىڭ اقپارات كەڭىستىگىندەگى بەلسەندىلىگى دە اسەر ەتپەي قويمايدى. مەملەكەتتىك حاتشى رەتىندە ول الەمدىك ساياساتتىڭ الدىڭعى شەبىندە ءجۇر, ۇلتتىق قاۋىپسىزدىك جونىندەگى كەڭەسشى رەتىندە اق ءۇيدىڭ ىشكى شەشىمدەرىنە تىكەلەي قاتىسادى. ال ۆيتسە-پرەزيدەنتتىڭ ناقتى جاۋاپكەرشىلىك اياسى ايقىن ەمەس. جاڭالىقتى قالت جىبەرمەيتىن ترامپ ءۇشىن رۋبيونىڭ ءجيى كوزگە ءتۇسۋى زاڭدى.
مۇنى پرەزيدەنتتىڭ ءوزى دە جاقسى تۇسىنەدى. كەي كەڭەسشىلەردىڭ پايىمىنشا, ترامپتىڭ رۋبيونى ءجيى كوتەرمەلەۋى ونى ۆەنسپەن بىرگە سايلاۋعا تۇسۋگە ىنتالاندىرۋدىڭ ءبىر امالى.
ترامپتىڭ نەمەرەسى ءوز شىندىعىن ايتتى
العاشقى ساۋالنامالار دا ۆەنستىڭ باسىمدىعىن اڭعارتادى. نيۋ-گەمپشير ۋنيۆەرسيتەتىنىڭ دەرەگىنە سۇيەنسەك, 2028 جىلعى رەسپۋبليكالىق پرايمەريزدە ۆەنستى قولدايتىندار 53 پايىزعا جەتسە, رۋبيو نەبارى 7 پايىز جيناعان. ۇلتتىق دەڭگەيدەگى وزگە ساۋالنامالاردا دا كورىنىس وسىعان ۇقساس.
الداعى كەزەڭدە ۆەنس جۇرت الدىنا ءجيى شىعۋى مۇمكىن. ول رەسپۋبليكالىق ۇلتتىق كوميتەتتىڭ قارجى ماسەلەسىنە جاۋاپ بەرەدى ءارى قاراشاداعى سايلاۋ قارساڭىندا ەلدى ارالاپ, پارتيانىڭ وكىلدەر پالاتاسىنداعى ورنىن ساقتاۋعا كۇش سالماق.
تاراپتاردىڭ وزدەرى اراسىندا الاۋىزدىق بار دەگەن پىكىردى جوققا شىعارادى. ۆەنس Fox News ارناسىنا بەرگەن سۇحباتىندا:
«ماركو – اكىمشىلىكتەگى ەڭ جاقىن دوستارىمنىڭ ءبىرى. جۋرناليستەر قولدان جانجال جاسايدى, بىراق بىزدە ونداي قايشىلىق جوق», دەدى.