24 اقپاندا اقش-تىڭ كەدەن جانە شەكارا قىزمەتى اق ءۇي اكىمشىلىگى ەنگىزگەن يمپورتتىق باج سالىعىن الۋدى رەسمي تۇردە توقتاتادى. بۇعان دەيىن اقش جوعارعى سوتى بۇل تاريفتەردى زاڭسىز دەپ تانىعان ەدى. الىمداردى توقتاتۋ شىعىس ۋاقىتى بويىنشا ساعات 00:01-دەن باستاپ كۇشىنە ەنەدى. كەدەن قىزمەتى تاسىمالداۋشىلاردى ىشكى حابار الماسۋ جۇيەسى ارقىلى ەسكەرتىپ, IEEPA زاڭى اياسىندا ترامپتىڭ جارلىقتارىنا بايلانىستى ەنگىزىلگەن بارلىق تاريفتىك كودتار وشىرىلەتىنىن مالىمدەدى, دەپ حابارلايدى Egemen.kz.
سوت شەشىمى شىققاننان كەيىن تاريفتەردىڭ نەگە تاعى بىرنەشە كۇن بويى قولدانىستا بولعانى تۋرالى رەسمي تۇسىنىكتەمە بەرىلمەدى. سونداي-اق يمپورتتاۋشىلار بۇرىن تولەگەن قاراجاتتىڭ قانشالىقتى قايتارىلاتىنى ازىرگە بەلگىسىز. ۆەدومستۆونىڭ اتاپ وتۋىنشە, بۇل شەشىم بارلىق ساۋدا شەكتەۋلەرىنە قاتىستى ەمەس. ۇلتتىق قاۋىپسىزدىك تۋرالى زاڭنىڭ 232-ءبولىمى جانە ادىلەتسىز ساۋدا تاجىريبەسىنە قاتىستى 301-ءبولىم نەگىزىندە ەنگىزىلگەن باج سالىعى ءوز كۇشىندە قالادى.
دونالد ترامپتىڭ رەزيدەنتسياسىنا جاسىرىن كىرمەك بولعان ادامعا وق اتىلدى
20 اقپاندا اقش جوعارعى سوتى اق ءۇي باسشىسى باسقا ەلدەرگە قارسى ەنگىزگەن اۋقىمدى يمپورتتىق تاريفتەردىڭ ءبىر بولىگىن زاڭسىز دەپ تانىدى. سۋديالار ترامپ حالىقارالىق توتەنشە ەكونوميكالىق وكىلەتتىكتەر تۋرالى زاڭدى (IEEPA) پايدالانىپ, ءىس جۇزىندە كوپتەگەن ەلدەرگە تاريف ەنگىزۋ ارقىلى ءوز وكىلەتتىگىن اسىرا پايدالانعان دەگەن قورىتىندىعا كەلدى.
وسىعان جاۋاپ رەتىندە اق ءۇي 10 پايىزدىق جاڭا «جاھاندىق» باج سالىعىن جاريالاپ, كەيىن ونىڭ مولشەرلەمەسىن 15 پايىزعا دەيىن كوتەردى.