شەكاراداعى اۋدان قاتەرلى اۋرۋدىڭ ورداسىنا اينالدى

قوستاناي. 26 ءساۋىر. ادامنىڭ يممۋندىق تاپشىلىعى ۆيرۋسى (ايتۆ) تارالۋى جونىنەن قوستاناي وبلىسىنىڭ رەسەيمەن شەكاراسىندا جاتقان قارابالىق اۋدانى «كوش باستاپ» تۇر. وبلىستىق جۇقپالى يممۋندىق تاپشىلىق سيندرومى (جيتس) ورتالىعىنىڭ ماماندارى مەن قارابالىق اۋداندىق اكىمدىگى جانىنداعى تۇرعىندار دەنساۋلىعىن قورعاۋ جونىندەگى ۇيلەسترۋ كەڭەسىنىڭ وتىرىسىندا اۋدانداعى ەپيدەميولوگيالىق جاعداي كۇردەلى ەكەنىن ايتىلدى. بۇل تۋرالى aina.kz سايتىنا سىلتەمە جاساعان egemen.kz ءتىلشىسى حابارلادى. قارابالىق اۋدانى وبلىس بويىنشا ايتۆ-ءنىڭ كوپتىگى جونىنەن ءبىرىنشى ورىن السا, ال قوستاناي وبلىسى رەسپۋبليكا بويىنشا بەسىنشى ورىندا تۇر. بۇل دا كوڭىل جۇباتارلىق كورسەتكىش ەمەس. ماماندار قاتەرلى اۋرۋدىڭ اياداي عانا قارابالىقتا جىلدام تاراۋىن ونىڭ شەكارادا ورنالاسۋىمەن بايلانىستىرادى. سوڭعى ءۇش ايدىڭ وزىندە  «قايراق» شەكارالىق باقىلاۋ بەكەتىندە زاڭسىز ەسىرتكى اينالىمىنداعى 4 وقيعا تىركەلدى, ونىڭ بىرەۋى ەسىرتكىنى زاڭسىز دايىنداعان جانە وڭدەگەن. اۋداندىق ىشكى ىستەر بولىمىندە 13 ناشاقور تىركەۋدە تۇرادى. ورتالىق اۋرۋحانانىڭ باس دارىگەرى بەكتەرحان شىمپەيىسوۆتىڭ ايتۋىنشا, بۇل مۇزتاۋدىڭ بەتكى جاعى عانا, ەسىرتكى پايدالاناتىندار اۋداندا مۇنان الدەقايدا كوپ ەكەنى ايان. اۋرۋحاناعا اي سايىن ەسىرتكى پايدالانىپ, ەسىنەن تانعان 10-15 ادام تۇسەدى ەكەن. قاتەرلى ۆيرۋستى تاراتاتىندار سولار ەكەنىن ايتتى ماماندار. اۋداندا 2000-شى جىلدىڭ باسىنان بەرى ادامنىڭ يممۋندىق تاپشىلىعى ۆيرۋسىن جۇقتىرعان 41 ادام تىركەلگەن. جۇقپالى يممۋندىق تاپشىلىق سيندرومىمەن اۋىراتىندار جوق دەپ ەسەپتەلەدى, ۆيرۋستى جۇقتىرعان 10 ادام ولگەن. ولاردىڭ باسىم كوپشىلىگى جۇمىسسىزدار, نەگىزىنەن 30 بەن 40 جاس ارالىعىنداعى ادامدار. ايتۆ-نى جۇقتىراتىندار نەگىزىنەن ەر ادامدار. 16 جىل ىشىندە ۆيرۋستى جۇقتىرعان سەگىز ەكىقابات ايەل تىركەلگەن. اۋداندا قاتەرلى ۆيرۋسپەن اۋىراتىنداردى تىركەۋدە, انىقتاۋدا قيىندىقتار بار. جۇقتىراتىندار بەرەكەسىز وتباسىنىڭ مۇشەلەرى, قۇجاتتارى بولا بەرمەيدى, ەمحاناعا تىركەلمەيدى. ونىڭ سىرتىندا اۋداندا وزگە مەملەكەتتەن كەلگەن مىڭنان اسا ادام كەلىسىممەن تۇرىپ جاتىر. ولار تەك قاتتى, وقىس اۋىرعاندا عانا اۋرۋحانادان كومەك سۇرايدى. وسىنىڭ بارلىعى دا ايتۆ دياگنوستيكاسىن قيىنداتىپ وتىر. ءنازيرا جارىمبەتوۆا. دەرەك, سۋرەت: aina.kz.