پرەزيدەنت قاسىم-جومارت توقاەۆ عىلىمدى دامىتۋ جانە جاس زەرتتەۋشىلەردى قولداۋ ساياساتى اياسىندا عىلىم قىزمەتكەرلەرى كۇنىنە وراي 10 جاس عالىمعا پاتەر كىلتتەرىن تابىستادى. تۇرعىن ۇيلەر الماتى مەن استانا قالالارىنان وتەۋسىز نەگىزدە بەرىلدى, دەپ حابارلايدى Egemen.kz.
قازىرگى ۋاقىتتا الماتىدان باسپانا العان جاس عالىمدار جاڭا, تولىق جابدىقتالعان پاتەرلەرگە قونىستانىپ ۇلگەردى. ولار مەملەكەت تاراپىنان جاسالعان قولايلى جاعداي عىلىمي جۇمىسقا ەركىن كوڭىل بولۋگە مۇمكىندىك بەرەتىنىن ايتىپ, ءوز ريزاشىلىقتارىن ءبىلدىردى.
سالتاناتتى ماراپاتتاۋ راسىمىندە مەملەكەت باسشىسى عىلىمنىڭ ەلدىڭ باسەكەگە قابىلەتتىلىگىن ارتتىرىپ, حالىقارالىق بەدەلىن نىعايتاتىن نەگىزگى فاكتور ەكەنىن اتاپ ءوتتى. ونىڭ ايتۋىنشا, عىلىم مەن بىلىمگە ينۆەستيتسيا سالعان مەملەكەتتەر الەمدىك دەڭگەيدە الدىڭعى قاتاردان كورىنەدى. سونىمەن قاتار پرەزيدەنت وتاندىق عىلىمنىڭ بولاشاعى جاڭا يدەيالار ۇسىناتىن, ەل دامۋىنا سەرپىن بەرەتىن جاس ءارى دارىندى زەرتتەۋشىلەردىڭ قولىندا ەكەنىن ايتتى.
مەملەكەت باسشىسى بەلگىلى عالىمداردى ماراپاتتادى
قازىرگى تاڭدا جالپى سانى 600-دەن استام جاس عالىم تۇرعىن ۇيمەن قامتاماسىز ەتىلگەن. بۇدان بولەك, ولارعا عىلىمي گرانتتار بەرىلەدى جانە الەمنىڭ جەتەكشى عىلىمي ورتالىقتارىندا تاعىلىمدامادان ءوتۋ مۇمكىندىگى قاراستىرىلعان.
جاڭا پاتەر يەلەرىنىڭ قاتارىندا ەلىمىزدىڭ ءتۇرلى جەتەكشى عىلىمي ۇيىمدارىنىڭ وكىلدەرى بار.
ع.داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتى وقىتۋشىسى, PhD مادينا قۇمارعازينا ەنەرگيا تيىمدىلىگى مەن جاڭارتىلاتىن ەنەرگيا كوزدەرىن زەرتتەۋ باعىتىندا ەڭبەك ەتەدى. ول Scopus بازاسىندا جاريالانعان ەڭبەكتەردىڭ اۆتورى جانە بىرنەشە پاتەنتتىڭ تەڭ اۆتورى.
سونىمەن قاتار ق.ي. ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى قىزمەتكەرى ارمان ومىرزاقوۆ ەنەرگەتيكا سالاسىنداعى زەرتتەۋلەرمەن اينالىسادى. ونىڭ عىلىمي ەڭبەكتەرى حالىقارالىق جۋرنالداردا جاريالانىپ, بىرقاتار پاتەنتتەرگە يە بولعان.
قازاقستاندا عالىمداردىڭ تابىسى قانداي؟
ال فيلوسوفيا, ساياساتتانۋ جانە ءدىنتانۋ ينستيتۋتى عالىمى شىرىن تىلەنشيەۆا مەملەكەتتىك قولداۋدىڭ عىلىمدى دامىتۋداعى ءرولىن اتاپ ءوتىپ, جەكە باسپانانىڭ جاس زەرتتەۋشىلەرگە ۇلكەن موتيۆاتسيا بەرەتىنىن جەتكىزدى.
شىرىن مۇراتقىزىنىڭ عىلىمي ەڭبەك ءوتىلى 13 جىل, ول Scopus جانە Web of Science بازالارىنا ەنگەن جاريالانىمداردى قوسا العاندا 9 عىلىمي ماقالانىڭ اۆتورى, وقۋ قۇرالىنىڭ تەڭ اۆتورى جانە اۆتورلىق قۇقىق يەگەرى. عالىم حالىقارالىق جانە ۇلتتىق عىلىمي جوبالارعا, سونىڭ ىشىندە «جاس عالىم» باعدارلاماسى اياسىندا قاتىسقان. سونىمەن قاتار ول International Society for Quality-of-Life Studies ۇيىمىنىڭ ءبىلىم بەرۋ گرانتىنىڭ يەگەرى جانە 2021-2025 جىلدارى وسى ۇيىمنىڭ مۇشەسى بولدى.
پرەزيدەنت باستاماسىمەن جۇزەگە اسىرىلىپ جاتقان بۇل باعدارلاما جاس عالىمداردى قولداۋدىڭ ماڭىزدى بولىگى بولىپ قالا بەرمەك جانە ەلدىڭ عىلىمي الەۋەتىن ارتتىرۋعا ىقپال ەتەدى.