بيىل بارشا ەلوردا وقىرماندارى ءۇشىن ۇلتتىق كىتاپحانادا «بۇل كىتاپ الەمى...» اتتى كىتاپ ايلىعى باستالعانىن حابارلاعان بولاتىنبىز. ونىڭ اياسىندا كىتاپحانا ۇجىمى 62 ءىس-شارا وتكىزگەلى جاتقانىن دا جەتكىزدىك. سونىڭ العاشقىسى كەشە ءوتتى. دالىرەك ايتساق, جازۋشى, حالىقارالىق «الاش» ادەبي سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى ءشاربانۋ بەيسەنوۆامەن كەزدەسۋ كەشى بولدى.
ول كىسى قازاق مەملەكەتتىك ۋنيۆەرسيتەتىن 1969 جىلى بىتىرگەن. ەڭبەك جولىن رەسپۋبليكالىق «پاراسات» (بۇرىنعى «مادەنيەت جانە تۇرمىس») جۋرنالىندا 1968 جىلى ادەبي قىزمەتكەرلىكتەن باستاپ, كەيىن ءبولىم مەڭگەرۋشىسى بولدى. 1980 جىلى «قازاقستان ايەلدەرى» جۋرنالىنا ءبولىم مەڭگەرۋشىسى بولىپ اۋىستى. قازاقستان رەسپۋبليكاسى اقپارات مينيسترلىگىنىڭ باسپا ىستەرى جونىندەگى دەپارتامەنتىندە باس مامان ءارى جاڭادان جارىق كورگەن كىتاپتاردى ناسيحاتتاۋمەن اينالىسقان. «قازاق ادەبيەتى» گازەتىندە «كىتاپ الەمى» قوسىمشاسىنىڭ رەداكتورى بولعانىن دا ەستەرىڭىزگە سالا كەتسەك دەيمىز.
العاشقى اڭگىمە, نوۆەللالارى وبلىستىق «ديدار» (بۇرىنعى «كوممۋنيزم تۋى») گازەتى مەن «قازاقستان ايەلدەرى» جۋرنالىندا تۇراقتى جاريالانىپ تۇرعان. ءتول تۋىندىلارىمەن قاتار اۋدارمامەن دە اينالىسقان. سولاردىڭ ىشىندە, ۋكراين جازۋشىسى ۆ.دروزدىڭ, ەستون ە.ەرمانوۆتىڭ, ازەربايجان اناردىڭ, لاتىش د.رۋكشانەنىڭ, ارميان جازۋشىلارىنىڭ جەكەلەگەن شىعارمالارىن, X.اندەرسەننىڭ ەرتەگىلەرىن, لاتىنامەريكالىق قالامگەر ج.امادۋدىڭ «قۇم جاعالاۋدىڭ كاپيتاندارى» اتتى رومانىن قازاق تىلىندە سويلەتكەن دە وسى كىسى. جازۋشى كەزدەسۋ بارىسىندا ءوزىنىڭ تۋىندىلارىنا كەڭىنەن توقتالىپ, ولاردىڭ دۇنيەگە كەلۋىنە تۇرتكى بولعان ءتۇرلى جاعدايلاردى وقىرمان قاۋىممەن ءبولىسىپ, اسەرلى اڭگىمەلەرى ارقىلى كەشتىڭ كوركىن كىرگىزە ءتۇستى. سولاردىڭ قاتارىندا, «سەزىمتال جۇرەك», «تاعىلىمدى تاعدىرلار», «تويعا كەلگەن كەلىنشەك» سياقتى شوقتىعى بيىك شىعارمالارى ارقىلى ءشاربانۋ بەيسەنوۆا ءوز وقىرمانىن تاپقان. جيىندى اقىن مارجان ەرشۋ جۇرگىزىپ, ادەبيەت الەمىندەگى نازىك جاندىلار, ولاردىڭ ەڭبەكتەرى جايلى سىر شەرتتى.
«ءشاربانۋ – وتكەن عاسىردىڭ 70-جىلدارىنىڭ ورتا تۇسىندا شىعارماشىلىق ءومىرىن جۋرناليستيكادان باستاپ, بىرتىندەپ ادەبيەتكە كەلگەن, قالام قىزمەتىن سىپايى باستاپ, ادەپتى مىنەزبەن, داۋرىقپاسىز جالعاستىرىپ كەلە جاتقان بۇگىنگى كورنەكتى جازۋشىلارىمىزدىڭ ءبىرى», – دەگەن اكادەميك سەرىك قيراباەۆ. ارينە, ءبىز دە بۇل پىكىرمەن تولىق كەلىسەمىز. كەزدەسۋ كەشىندە وسى ويىمىزدى ودان سايىن ناقتىلاي تۇسكەندەي بولدىق. شىعارماشىلىق ادامى ءۇشىن جازىلعان دۇنيەسى تاسادا قالماي, وقىرمانى ىزدەپ جاتسا, ودان اسقان باقىت جوق تا شىعار.
راۋان قايدار,
«ەگەمەن قازاقستان».