استانادا ۆاكتسينا ارقىلى الدىن الۋعا بولاتىن اۋرۋلارعا ارنالعان دوڭگەلەك ۇستەل ءوتتى. ءىس-شارانى قالالىق قوعامدىق دەنساۋلىق ساقتاۋ باسقارماسى ۇيىمداستىردى. كەزدەسۋ ء«بىز ۆاكتسيناتسيالاۋ ارقىلى بولاشاق ۇرپاقتى قورعاي الامىز» تاقىرىبىندا ءوتىپ, 2026-2028 جىلدارعا ارنالعان قالالىق جوسپار اياسىندا وتكىزىلدى, دەپ حابارلايدى Egemen.kz.
جيىندا قالا اكىمىنىڭ ورىنباسارى ەرىك مەيرحان ءسوز سويلەپ, ۆاكتسيناتسيانىڭ قوعامدىق دەنساۋلىقتى ساقتاۋداعى رولىنە ەرەكشە توقتالدى. ونىڭ ايتۋىنشا, بالالاردىڭ دەنساۋلىعى – بارشاعا ورتاق جاۋاپكەرشىلىك, ال ۆاكتسيناتسيا – قاۋىپتى ينفەكتسيالىق اۋرۋلاردىڭ الدىن الۋدىڭ ەڭ ءتيىمدى جولى.
قىزىلشا تىركەلگەن مەكتەپتەرگە ۆاكتسينا الماعان بالالار جىبەرىلمەيدى
سونداي-اق 2024 جىلدان باستاپ ەلىمىزدە قىزداردى ادام پاپيللوماسى ۆيرۋسىنا (اپۆ) قارسى ۆاكتسيناتسيالاۋ باعدارلاماسى جۇزەگە اسىرىلىپ كەلە جاتقانى ايتىلدى. بۇل باستاما جاتىر موينى وبىرىنىڭ الدىن الۋدا ماڭىزدى ءرول اتقارادى. بۇدان بولەك, قازىرگى تاڭدا ەلوردادا جانە رەسپۋبليكا بويىنشا بالالار اراسىندا قىزىلشا اۋرۋىنىڭ ءوسۋى بايقالىپ وتىرعانى اتاپ ءوتىلدى.
بالالارىنا ۆاكتسينا سالعىزۋدان باس تارتاتىندار كوبەيدى: سەبەبى نەدە؟
دوڭگەلەك ۇستەلدە ماماندار استاناداعى جاتىر موينى وبىرىنىڭ تارالۋ كورسەتكىشتەرى مەن قىزىلشاعا قاتىستى ەپيدەميولوگيالىق احۋالدى تالقىلادى. ساراپشىلاردىڭ پىكىرىنشە, قىزداردى اپۆ-عا قارسى ەگۋ, بالالاردى قىزىلشاعا قارسى ۋاقىتىلى ۆاكتسيناتسيالاۋ جانە سكرينينگتىك تەكسەرۋلەردى كۇشەيتۋ – اۋرۋلاردىڭ الدىن الۋدىڭ ناقتى ءارى ءتيىمدى تەتىگى.
كەزدەسۋ بارىسىندا ۆاكتسيناتسياعا قاتىستى قوعامداعى ميفتەر مەن قاتە تۇسىنىكتەر دە قوزعالدى. اسىرەسە اپۆ-عا قارسى ەكپە جونىندەگى الەۋمەتتىك-مادەني كەدەرگىلەر مەن سەنىم ماسەلەسىنە نازار اۋدارىلدى. قاتىسۋشىلار حالىقپەن اشىق ءارى جۇيەلى اقپاراتتىق-ءتۇسىندىرۋ جۇمىستارىن جۇرگىزۋ قاجەتتىگىن اتاپ ءوتتى.
ەندى قىزىلشاعا قارسى ۆاكتسينا مىندەتتى: استانا اۋرۋحانالارىنا بالا قابىلداۋ ەرەجەسى وزگەردى
مامانداردىڭ ايتۋىنشا, ۆاكتسيناتسيا – بولاشاققا سالىنعان ينۆەستيتسيا. ۋاقتىلى جۇرگىزىلگەن يممۋنداۋ قاۋىپتى ينفەكتسيالاردىڭ تارالۋىن تەجەپ, كەلەشەك ۇرپاقتىڭ دەنساۋلىعىن ساقتاۋعا مۇمكىندىك بەرەدى.