سەنات توراعاسى ماۋلەن اشىمباەۆ ۋنيۆەرسيتەت تۇلەكتەرىنە ديپلوم تاپسىرۋعا ارنالعان سالتاناتتى راسىمگە قاتىستى.
پالاتا سپيكەرى جاس مامانداردى قۇتتىقتاي كەلە, مەملەكەت باسشىسىنىڭ باستاماسىمەن ەلىمىزدە اۋقىمدى جاڭعىرۋ ۇدەرىستەرى جۇزەگە اسىرىلىپ جاتقانىن اتاپ ءوتتى. كەشەندى جۇمىستىڭ دايەكتى جالعاسى رەتىندە كونستيتۋتسيالىق رەفورما جۇرگىزىلىپ, جاڭا كونستيتۋتسيا قابىلداندى. بۇل – قازاقستان تاريحىنداعى ماڭىزدى وقيعا, مەملەكەتتىڭ ۇزاقمەرزىمدى تۇراقتىلىعىنىڭ بەرىك نەگىزى جانە جاھاندىق سىن-قاتەرلەرگە ۋاقتىلى بەرىلگەن جاۋاپ.
سونداي-اق ەلدى جاڭعىرتۋ جانە ساياسي جۇيەنى كەشەندى تۇردە رەفورمالاۋ جولىندا زاڭنامالىق باستامالاردى قامتاماسىز ەتۋمەن قاتار, بىلىكتى ءارى جاۋاپتى مامانداردىڭ دا ءرولى ەرەكشە ەكەنىنە باسا ءمان بەرىلدى. جاھاندىق تەحنولوگيالىق جانە الەۋمەتتىك ترانسفورماتسيالار داۋىرىندە جاڭعىرۋ ميسسياسى نەگىزىنەن جاس بۋىنعا جۇكتەلەدى. سوندىقتان ماۋلەن اشىمباەۆ ەلىمىزدەگى جەتەكشى جوعارى وقۋ ورىندارىنىڭ ءبىرىنىڭ ديپلومى جوعارى ءبىلىم العانىن راستايتىن قۇجات قانا ەمەس, قوعام الدىنداعى ۇلكەن جاۋاپكەرشىلىك ەكەنىن ايتتى.
«جاڭا كونستيتۋتسيانى قابىلداۋ ارقىلى ەلىمىز ساياسي, ەكونوميكالىق جانە الەۋمەتتىك دامۋدىڭ جاڭا كەزەڭىنە قادام باستى. پرەزيدەنت قاسىم-جومارت توقاەۆتىڭ ادىلەتتى جانە پروگرەسسيۆتى قازاقستان قۇرۋعا باعىتتالعان ساياسي باعدارى – ۇزاقمەرزىمدى رەفورمالار باعدارلاماسى. ول ەكونوميكانى ءارتاراپتاندىرۋ, مەملەكەتتىك باسقارۋ ينستيتۋتتارىن نىعايتۋ, عىلىم مەن بىلىمگە, بيزنەس پەن ازاماتتىق قوعامعا قولداۋ كورسەتۋ سياقتى ماڭىزدى مىندەتتەردى شەشۋ ءۇشىن بۇكىل قوعامنىڭ جۇمىلۋىن جانە بەلسەندى قاتىسۋىن تالاپ ەتەدى. وسى ۇدەرىسكە سىزدەردىڭ ۋنيۆەرسيتەتتەرىڭىزدىڭ تۇلەكتەرى قازىردىڭ وزىندە ەلەۋلى ۇلەس قوسىپ كەلەدى. قازاقستانداعى العاشقى تەحنولوگيالىق «unicorn» كومپانيا – «Higgsfield AI» سونىڭ جارقىن كورىنىسى. اتالعان كومپانيا كومانداسىنىڭ 90 پايىزى – NU تۇلەكتەرى. بۇل – ەلىمىزدىڭ ادام كاپيتالىنىڭ جوعارى باسەكەگە قابىلەتتى جانە ۋنيۆەرسيتەتتىك ورتانىڭ ساپالى دەڭگەيدە ەكەنىنىڭ ايقىن دالەلى», دەدى ماۋلەن اشىمباەۆ.
سەنات توراعاسى ءوز سوزىندە NU ۋنيۆەرسيتەتى وتاندىق عىلىمدى, يننوۆاتسيالاردى جانە ادام كاپيتالىن دامىتۋ جولىندا ماڭىزدى ءرول اتقاراتىنىن اتاپ ءوتتى. سونداي-اق ول ۋنيۆەرسيتەت ءوزىنىڭ باستى ميسسيا- سىن ناتيجەلى جۇزەگە اسىرىپ كەلە جاتقانىنا نازار اۋدارىپ, اتالعان وقۋ ورنى قازاقستاندا وزىق زەرتتەۋ مادەنيەتىن قالىپتاستىرۋعا, زاماناۋي اكادەميالىق ستاندارتتاردى ەنگىزۋگە جانە ەلىمىزدىڭ جوعارى ءبىلىم جۇيەسىن جاڭعىرتۋعا ۇلكەن ىقپالىن تيگىزىپ وتىرعانىن اتاپ ءوتتى.
سالتاناتتى ءراسىم بارىسىندا ماۋلەن اشىمباەۆ جاس ماماندارعا ومىرلىك باعدار بولاتىن ماڭىزدى باعىتتارعا دا توقتالىپ ءوتتى. بۇل ورايدا سەنات توراعاسى كاسىبي بىلىكتىلىك, دۇرىس قۇندىلىقتار جانە ۇزدىكسىز ءوزىن-ءوزى جەتىلدىرۋ تابىستى مانساپتىڭ نەگىزى ەكەنىن ايتتى.