پرەمەر-ءمينيستردىڭ ءبىرىنشى ورىنباسارى نۇرلىبەك نالىباەۆ جۇمىس ساپارى اياسىندا اقمولا وبلىسىنا كەلىپ, ءوڭىر باسشىسى مارات احمەتجانوۆپەن بىرگە ءىرى جوبالاردىڭ جۇزەگە اسىرىلۋ بارىسىمەن تانىستى.
ساپار بارىسىندا ەنەرگەتيكالىق ينفراقۇرىلىمدى جاڭعىرتۋ ماسەلەسىنە ەرەكشە نازار اۋدارىلدى. ستەپنوگورسك قالاسىندا دەلەگاتسيا جىلۋ ەلەكتر ورتالىعىندا بولىپ, الداعى جىلىتۋ ماۋسىمىنا دايىندىق جۇمىسىمەن تانىستى. كاسىپورىندا نەگىزگى جابدىقتاردىڭ توزۋ دەڭگەيىن 57%-عا دەيىن تومەندەتۋگە باعىتتالعان جۇمىس جۇرگىزىلىپ جاتىر. جىلۋ جەلىلەرىنىڭ توزۋ دەڭگەيى دە 59%-عا دەيىن ازايتىلعان.
«ستەپنوگورسك ەنەرگوكومپلەكس» جشس باس ديرەكتورى ماقسات ىسقاقوۆتىڭ ايتۋىنشا, ەنەرگيامەن جابدىقتاۋ تۇراقتىلىعىن ارتتىرۋ ماقساتىندا قازاندىق اگرەگاتتارىنا, تۋربينالارعا, كۇل قۇبىرى مەن ءتۇتىن مۇرجاسىنا كۇردەلى جانە اعىمداعى جوندەۋ جۇمىسى قاراستىرىلعان. بۇل شارالار جابدىقتاردىڭ ۇزدىكسىز جۇمىسىن قامتاماسىز ەتىپ, پايدالانۋ سەنىمدىلىگى مەن قاۋىپسىزدىگىن ارتتىرۋعا, سونداي-اق اپاتتى جاعدايلاردىڭ الدىن الۋعا مۇمكىندىك بەرەدى.
سونداي-اق نۇرلىبەك نالىباەۆ «ستەپنوگورسك تاۋ-كەن-حيميا كومبيناتى» جشس-دا بولدى. وندا ۋران وڭدەۋ كەشەنىن جاڭعىرتۋ ناتيجەسىندە وندىرىستىك قۋاتتىلىق جىلىنا 4 مىڭ توننادان 6 مىڭ تونناعا دەيىن ارتىپ جاتىر. كاسىپورىندا ءوندىرىستىڭ ۇزدىكسىز جۇمىسىن قامتاماسىز ەتۋ مەن ودان ءارى دامىتۋ, كادرلار دايارلاۋ ماسەلەلەرى قاراستىرىلدى. ءوندىرىستى كەڭەيتۋ پەرسپەكتيۆالارى «ستەپنوگورسك پودشيپنيك زاۋىتى» اق-دا دا تالقىلاندى.
جۇمىس ساپارى بارىسىندا پرەمەر-ءمينيستردىڭ ءبىرىنشى ورىنباسارى «قازاقستاننىڭ جىلىجاي تەحنولوگيالارى» جشس-دا بولدى. كاسىپورىن جىل سايىن كوكشەتاۋ, استانا, پەتروپاۆل قالالارىنا شامامەن 2,4 مىڭ توننا كوكونىس پەن كوكشوپ ونىمدەرىن جەتكىزەدى.
كوكشەتاۋ قالاسىنا ساپار Savory زاۋىتىنان باستالدى. كاسىپورىن ەۋروپالىق جابدىقتارمەن ءارى اۆتوماتتاندىرىلعان باسقارۋ جۇيەسىمەن جابدىقتالعان. مۇندا قۇراماجەم ءوندىرىلىپ, ونىمدەرى ەلىمىزدىڭ وڭىرلەرىنە جانە وزبەكستانعا جونەلتىلەدى.
نۇرلىبەك نالىباەۆ وبلىس ورتالىعىنداعى تەمىرجول ۆوكزالىن قايتا جاڭعىرتۋ جۇمىسىنىڭ بارىسىمەن دە تانىستى. قۇرىلىس قارقىنىن جەدەلدەتۋ, ونىڭ ىشىندە جۇمىستى ەكى اۋىسىمدا ۇيىمداستىرۋ ماسەلەلەرى تالقىلاندى.
«كايك» جشس الاڭىندا اگروونەركاسىپتىك سەكتورداعى ينۆەستيتسيالىق جوبالار تانىستىرىلدى. وڭىرلىك ماڭىزى بار «Kokshe Industry» يندۋستريالىق ايماعىن دامىتۋعا ەرەكشە كوڭىل ءبولىندى. بۇگىندە مۇندا 300-دەن استام جۇمىس ورنىن قۇراتىن ءۇش ينۆەستيتسيالىق جوبا جۇزەگە اسىرىلىپ جاتىر. الداعى ۋاقىتتا تاعى بەس ءىرى جوبانى جۇزەگە اسىرۋ جانە 2 مىڭعا جۋىق جاڭا جۇمىس ورنىن اشۋ جوسپارلانعان. 2030 جىلعا دەيىن جالپى سانى 47 جاڭا ءوندىرىس ورنىن ىسكە قوسۋ كوزدەلىپ وتىر.
جۇمىس ساپارىنىڭ سوڭعى نىسانى «سامۇرىق-ەنەرگو» اق جۇزەگە اسىرىپ جاتقان كوكشەتاۋ قالاسىنداعى جاڭا جىلۋ ەلەكتر ورتالىعىنىڭ قۇرىلىس الاڭى بولدى.
مەملەكەت باسشىسىنىڭ تاپسىرماسىمەن كوكشەتاۋدا قۋاتى 240 مۆت جانە جىلۋ ءوندىرۋ كولەمى ساعاتىنا 820 گكال بولاتىن جەو سالىنىپ جاتىر. «سامۇرىق-ەنەرگو» اق ينۆەستيتسيالار جونىندەگى باس ديرەكتورى اڭسار ايداروۆتىڭ سوزىنشە, بيىل ستانسانىڭ نەگىزگى نىساندارىنىڭ ىرگەتاستارىن سالۋ جۇمىسى اياقتالىپ, قاجەتتى ينفراقۇرىلىمدى تۇرعىزۋ جالعاسىپ جاتىر. نىساندا ەكولوگيالىق زاڭناما تالاپتارىنا سايكەس كەلەتىن زاماناۋي گاز تازارتۋ تەحنولوگيالارى قولدانىلادى. قۇرىلىس كەزەڭىندە شامامەن 2,5 مىڭ ادام جۇمىسپەن قامتىلسا, ستانسا پايدالانۋعا بەرىلگەننەن كەيىن 400-گە جۋىق مامان تۇراقتى جۇمىسقا تۇرادى.
ساپار قورىتىندىسىندا نۇرلىبەك نالىباەۆ بارلىق جوبالاردى ۋاقتىلى جۇزەگە اسىرۋدىڭ ماڭىزدىلىعىن اتاپ ءوتتى.
«جەو قۇرىلىسى مەملەكەت باسشىسىنىڭ ەرەكشە باقىلاۋىندا تۇر. وبلىس ورتالىعىنىڭ تۇرعىندارى بۇل جوبانىڭ جۇزەگە اسۋىن كوپ جىلدان بەرى كۇتىپ كەلەدى. سونىمەن قاتار ەلىمىزدە العاش رەت 124 تەمىرجول ۆوكزالىن اۋقىمدى جاڭعىرتۋ جۇمىسى جۇرگىزىلۋدە, ونىڭ ىشىندە 16 ۆوكزال اقمولا وبلىسىندا ورنالاسقان. بارلىق جوبالاردىڭ بەلگىلەنگەن مەرزىمدە اياقتالۋىن قامتاماسىز ەتىپ, جۇمىس قارقىنىن جوعارى دەڭگەيدە ساقتاۋ قاجەت», دەدى ن.نالىباەۆ.