قىتايدىڭ گۋاندۋن ولكەسىنىڭ اكىمشىلىك ورتالىعىندا ەلىمىزدىڭ گۋانچجوۋ قالاسىنداعى باس كونسۋلدىعى اشىلدى. ەندى قىتايدىڭ وڭتۇستىك وڭىرلەرىمەن ىنتىماقتاستىقتى كەڭەيتۋگە مۇمكىندىك مولايماق.
باس كونسۋلدىقتىڭ اشىلۋ سالتاناتىندا ەلىمىزدىڭ قحر-داعى ەلشىسى شاحرات نۇرىشەۆ قازىر قازاقستان مەن قىتاي اراسىنداعى قاتىناستار بۇرىن-سوڭدى بولماعان جوعارى دەڭگەيدە ەكەنىن ءارى ماڭگىلىك جان-جاقتى ستراتەگيالىق ارىپتەستىك رۋحىندا دامىپ كەلە جاتقانىن اتاپ ءوتتى. ونىڭ ايتۋىنشا, گۋانچجوۋ قالاسىندا باس كونسۋلدىقتىڭ اشىلۋى وڭىرارالىق ءوزارا ءىس-قيمىلدىڭ ماڭىزى ارتىپ كەلە جاتقانىن كورسەتەدى, سونداي-اق قىتايدىڭ وڭتۇستىك وڭىرلەرىمەن ىنتىماقتاستىعىن كەڭەيتۋ ءۇشىن جاڭا مۇمكىندىكتەر اشادى.
ەلشى سونداي-اق گۋاندۋن ولكەسىنىڭ قىتايدىڭ جەتەكشى ەكونوميكالىق, يننوۆاتسيالىق جانە ونەركاسىپتىك ورتالىقتارىنىڭ ءبىرى ەكەنىن اتاپ ءوتىپ, ونىڭ ساۋدا, ينۆەستيتسيالار, تسيفرلىق تەحنولوگيالار, جاساندى ينتەللەكت, ەلەكتروندىق كوممەرتسيا, لوگيستيكا, يننوۆاتسيالار مەن مادەني-گۋمانيتارلىق الماسۋلار سالالارىندا قازاقستانمەن ءوزارا ىنتىماقتاستىقتى دامىتۋدا ەلەۋلى الەۋەتكە يە ەكەنىن ايتتى.
ال قحر سىرتقى ىستەر ءمينيسترىنىڭ كومەكشىسى ليۋ بين ەلىمىزدىڭ گۋانچجوۋ قالاسىنداعى باس كونسۋلدىعى قازاقستاننىڭ قىتايداعى ءتورتىنشى كونسۋلدىق مەكەمەسى ەكەنىن جانە ول قازاقستان مەن قىتايدىڭ وڭتۇستىك وڭىرلەرى اراسىنداعى بايلانىستاردى ودان ءارى دامىتۋدا ماڭىزدى ءرول اتقاراتىنىن اتاپ ءوتتى. بۇعان قوسا ول قىتاي تاراپىنىڭ جاڭا ديپلوماتيالىق وكىلدىكتىڭ قىزمەتىنە جان-جاقتى قولداۋ كورسەتۋگە دايىن ەكەنىن جەتكىزدى.
گۋاندۋن ولكەسىنىڭ حالىق ۇكىمەتى پارتيالىق توبىنىڭ مۇشەسى چەن ليانسيان دا قازاقستاننىڭ گۋاندۋن ولكەسىنىڭ ورتالىق ازياداعى ەڭ ءىرى ساۋدا ارىپتەسى ەكەنىن اتاپ ءوتتى. سونىمەن قاتار ساۋدا-ەكونوميكالىق, ينۆەستيتسيالىق, عىلىمي-تەحنيكالىق, ءبىلىم بەرۋ جانە مادەني-گۋمانيتارلىق سالالارداعى ىنتىماقتاستىق دەڭگەيى تۇراقتى ءوسىم كورسەتىپ وتىرعانىن مالىمدەدى.
ەلشىنىڭ ايتۋىنشا, ەلىمىزدىڭ گۋانچجوۋ قالاسىنداعى باس كونسۋلدىعىنىڭ اشىلۋى – قازاقستان-قىتاي قارىم-قاتىناسى تاريحىنداعى ماڭىزدى ۋاقيعا. جاڭا كونسۋلدىق مەكەمە ساياسي ديالوگتى ودان ءارى نىعايتۋعا, وڭىرارالىق ىنتىماقتاستىقتى كەڭەيتۋگە, ساۋدا-ەكونوميكالىق جانە ينۆەستيتسيالىق بايلانىستاردى ىلگەرىلەتۋگە, سونداي-اق ەكى ەل اراسىنداعى مادەني-گۋمانيتارلىق ءوزارا ءىس-قيمىلدى تەرەڭدەتۋگە ىقپال ەتەدى.