مەكسيكادا ەسىرتكى كارتەلى جەتەكشىسىنىڭ قازاسىنان كەيىن باستالعان جاپپاي تارتىپسىزدىكتەرگە بايلانىستى حالىقارالىق سپورت قاۋىمداستىعى الاڭداۋلى. الايدا ازىرگە 2026 جىلعى فۋتبولدان الەم چەمپيوناتى ماتچتارىنىڭ جارىس كەستەسىن وزگەرتۋ تۋرالى رەسمي شەشىم قابىلدانعان جوق. FIFA مەكسيكاداعى جاعدايدى ءجىتى باقىلاپ وتىر. بۇل تۋرالى The Athletic باسىلىمى حابارلادى, دەپ جازادى Egemen.kz.
مەكسيكالىق «جاڭا بۋىن حاليسكو» (CJNG) ەسىرتكى كارتەلىنىڭ جەتەكشىسى نەمەسيو رۋبەن وسەگەرا سەرۆانتەس (لاقاپ اتى ەل مەنچو) ولتىرىلگەننەن كەيىن ەلدىڭ بىرقاتار ايماعىندا تارتىپسىزدىك ءورشىدى. قارۋلى توپتار جولداردى جاۋىپ, اۆتوكولىكتەردى, بانكتەر مەن دۇكەندەردى ورتەگەن. تولقۋدىڭ نەگىزگى وشاقتارىنىڭ ءبىرى – حاليسكو شتاتى. ونىڭ اكىمشىلىك ورتالىعى – گۆادالاحارا قالاسى 2026 جىلعى الەم چەمپيوناتىنىڭ توپتىق كەزەڭ ويىندارىن قابىلداۋى ءتيىس.
مەكسيكادا اتىشۋلى قىلمىستىق توپتىڭ جەتەكشىسىنىڭ قازاسىنان كەيىن جاپپاي تارتىپسىزدىك باستالدى
تارتىپسىزدىكتەر سالدارىنان مەكسيكا فۋتبول ليگالارىنداعى بىرنەشە ماتچ كەيىنگە شەگەرىلدى. جانكۇيەرلەرگە ستاديوندارعا كەلمەۋ جونىندە ەسكەرتۋ جاسالىپ, كەيبىر كوماندالار مەن ويىنشىلار الاڭنان ەۆاكۋاتسيالانعان. وسىعان بايلانىستى FIFA گۆادالاحاراداعى احۋالدى ەرەكشە باقىلاۋعا العان. دەگەنمەن الەم چەمپيوناتى ويىندارىن باسقا قالاعا اۋىستىرۋ نەمەسە تۋرنير كۇنتىزبەسىنە وزگەرىس ەنگىزۋ جونىندە رەسمي مالىمدەمە جاسالعان جوق.
«ورداباسى» فۋتبول كلۋبى جەكەمەنشىككە ساتىلدى
CBS News تاراتقان دەرەككە سايكەس, ەل مەنچونىڭ كوزىن جويۋدان كەيىنگى قاقتىعىستاردا 73 ادام قازا تاپقان. مەكسيكانىڭ قاۋىپسىزدىك ءمينيسترى ومار گارسيا حارفۋحتىڭ مالىمدەۋىنشە, حاليسكو شتاتىندا 6 بولەك شابۋىل بارىسىندا ۇلتتىق گۆارديانىڭ 25 اسكەري قىزمەتكەرى مەرت بولعان. سونىمەن قاتار شامامەن 30 كۇدىكتى قىلمىستىق توپ مۇشەسى جويىلىپ, تاعى 4-ەۋى كورشىلەس ميچواكان شتاتىندا ولتىرىلگەن. حاليسكو, ميچواكان جانە گۋاناحۋاتو شتاتتارىنىڭ بيلىگى جەكسەنبى كۇنى كەمىندە 14 ادامنىڭ قازا تاپقانىن, ولاردىڭ 7-ەۋى اسكەري قىزمەتكەر ەكەنىن حابارلادى.
قالىپتاسقان جاعداي الەمدىك دودانى ۇيىمداستىرۋعا اسەر ەتە مە, جوق پا, بۇل الداعى ۋاقىتتىڭ ەنشىسىندە. ازىرگە حالىقارالىق فۋتبول ۇيىمى قاۋىپسىزدىك ماسەلەسىن باستى نازاردا ۇستاپ وتىرعانىن مالىمدەۋمەن شەكتەلدى.
«اتىراۋ» فۋتبول كلۋبى قانشا تەڭگەگە ساتىلۋى مۇمكىن؟