الداعى ۋاقىتتارى جويىلۋى مۇمكىن
ەلىمىزدەگى جوعارى وقۋ ورىندارىندا ستۋدەنتتەرگە تەگىن ءبىلىم الۋ ءۇشىن بەرىلەتىن گرانتتار جويىلىپ, ولاردىڭ ورنىن ۆاۋچەرلەر باسۋى ابدەن مۇمكىن. مۇنىڭ جايىن وتكەن اپتادا جيىن وتكىزگەن ءبىلىم جانە عىلىم ءمينيسترى ەرلان ساعاديەۆ بايانداپ بەردى.
جيىنعا قازاقستانداعى كوپتەگەن ءبىلىم مەكەمەلەرىنىڭ – ۇلتتىق, مەملەكەتتىك جانە جەكەمەنشىك جوعارى وقۋ ورىندارىنىڭ رەكتورلارى قاتىستى. پىكىر الماسۋ بارىسىندا ولار گرانتتاردىڭ بىرىڭعاي بولۋى كەرەكتىگىنە كەلىسىم ءبىلدىردى. ولار, سونداي-اق, بۇل باستامانىڭ 2017 جىلدان باستاپ ەنگىزىلگەنىن قالايتىندارىن دا اتاپ ءوتتى.
مينيستر مۇنداي تاجىريبەنىڭ گرۋزيادا ءبىراز جىلداردان بەرى قولدانىلىپ جۇرگەنىن ايتتى. ونىڭ ويىنشا, رەكتورلاردىڭ كوپشىلىگى گرانتتاردى ساتىلى دامىتۋ جولىندا گرۋزيندەردىڭ تاجىريبەسىنە سۇيەنگەندى دۇرىس سانايدى. بۇل ەلدە گرانتتاردىڭ ورنىنا ۆاۋچەرلەر ەنگىزىلگەن. ول مەملەكەتتىڭ ستۋدەنتكە ۆاۋچەر بەرۋ جولىمەن جۇرگىزىلەدى. ءوز كەزەگىندە ستۋدەنت سول ارقىلى كەز كەلگەن جوعارى وقۋ ورنىنا تۇسە الادى. ەگەر وقۋ اقىسى ۆاۋچەردەن قىمبات بولسا, ستۋدەنت جەتپەگەن قارجىنى ءوز قالتاسىنان تولەيدى.
– ەگەر ستۋدەنتكە جوعارى وقۋ ورنىنىڭ ءوزى مۇددەلى بولسا نەمەسە تالاپكەر وليمپيادا جەڭىمپازى, وتە دارىندى الدە الەۋمەتتىك از قامتىلعان وتباسىنان شىقسا, مەملەكەت كومەكتەسۋى مۇمكىن. الدە الەمدىك تاجىريبەدە قالىپتاسقان جاعدايعا ساي جوعارى وقۋ ورنىنىڭ ءوزى گرانت ءبولۋ ارقىلى ستۋدەنتتى قابىلدايدى, – دەپ ءتۇسىندىرىپ ءوتتى مينيستر.
ءسوز سوڭىندا ەرلان ساعاديەۆ بۇل وقىتۋ جۇيەسى تولىق دايىن بولعاندا تالقىلاۋعا ۇسىنىلاتىنىن جەتكىزدى.
ەرنار مۇحامبەت.