ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جاڭا كونستيتۋتسيا جوباسىن تالقىلاۋعا ارنالعان دوڭگەلەك ۇستەل ءوتتى. باسقوسۋدا «ادىلەتتى قازاقستان», «تازا قازاقستان», «ادال ازامات», «زاڭ مەن ءتارتىپ» ۇعىمدارىنىڭ اتا زاڭداعى كورىنىسى جان-جاقتى قارالدى. ءىس-شارانى جۋرناليستيكا جانە الەۋمەتتىك عىلىمدار جوعارى مەكتەبى ۇيىمداستىردى.
وتىرىسقا عالىمدار, ساراپشىلار مەن اكادەميالىق قوعامداستىق وكىلدەرى قاتىستى. سەنات دەپۋتاتى دارحان قىدىرالى دوڭگەلەك ۇستەلدە ءسوز سويلەپ, نەگىزگى زاڭنىڭ جاڭا رەداكتسياسى قوعامنىڭ زاماناۋي سۇرانىستارىن قامتيتىنىن, ادام مەن تۇتاستاي ەلىمىزدىڭ دامۋىنا باعدارلانعانىن اتاپ ءوتتى.
«2017 جىلعى 15 اقپاندا سول كەزدەگى سەنات توراعاسى قاسىم-جومارت توقاەۆ ءوزىنىڭ رەسمي Twitter پاراقشاسىندا «قازىرگى «ماڭگىلىك ەل», « ۇلى دالا» ۇعىمدارىن كونستيتۋتسياعا ەنگىزۋ قاجەت» دەگەن جازبا جاريالادى. سودان كەلەسى كۇنى «Egemen Qazaqstan» گازەتىنە بۇل ويدى ارنايى باعانعا ماتەريال رەتىندە ازىرلەپ, ەل نازارىنا ۇسىندىق. بۇگىندە جاڭا اتا زاڭ جوباسىندا وسى ۇعىمداردىڭ كورىنىس تابۋى 2017 جىلعى ۇسىنىستىڭ پراكتيكالىق ىسكە اسۋىنىڭ دالەلى دەسەك, بولدى. سونداي-اق ەرەكشە اتاپ وتەرلىگى – ءاربىر قوعامدى بىرىكتىرەتىن ورتاق ارماندار مەن مۇددەلەردىڭ كونستيتۋتسياعا ەنگەنى. مىسالى, ەلىمىزدە بولاشاقتا تەحنولوگيالىق يننوۆاتسيالارعا ساي قالالار سالىنىپ جاتسا, مۇنى دا حالىقتىڭ ورتاق ارمانىنىڭ جۇزەگە اسقان كورىنىسى رەتىندە قاراستىرۋعا بولادى. دەمەك جاڭا كونستيتۋتسيا – فيلوسوفيالىق ءارى تاريحي ءمانى تەرەڭ, قوعامنىڭ رۋحاني, پراكتيكالىق قاجەتتىلىگىن قامتيتىن, بولاشاققا باعىتتالعان ماڭىزدى قۇجات», دەدى سەناتور.
ەسكە سالساق, جاڭا كونستيتۋتسيا جوباسىندا ادامعا جانە ادام كاپيتالىن دامىتۋعا ەرەكشە نازار اۋدارىلعان. نەگىزگى زاڭدا ءسوز, وي بوستاندىعى, وزىق ويلى ۇلتتى قالىپتاستىرۋ, ءبىلىم مەن عىلىمدى دامىتۋ, سونداي-اق ءتول بىرەگەيلىكتى نىعايتۋ سەكىلدى نەگىزگى قۇندىلىقتار كورىنىس تاپتى.
«ۋاقىت ءبىر ورىندا تۇرمايدى. كەيىنگى جىلدارى قوعام دا, ءبىزدى قورشاعان الەم دە اۋقىمدى وزگەرىستەر كەزەڭىن باستان وتكەرىپ جاتىر. قوعامدىق قاتىناستاردىڭ جاڭعىرۋى, ساياسي جۇيەنىڭ ترانسفورماتسياسى, الەۋمەتتىك قۇرىلىمنىڭ دامۋى – مۇنىڭ بارلىعى قۇقىقتىق نەگىزدەردى جەتىلدىرۋدى تالاپ ەتەدى. وسى تۇرعىدان العاندا, كونستيتۋتسيا جوباسىنداعى جاڭاشىلدىقتار ەلدىڭ ودان ءارى ورنىقتى دامۋىن قامتاماسىز ەتۋگە, مەملەكەتتىك ينستيتۋتتاردىڭ تيىمدىلىگىن ارتتىرۋعا, قوعامداعى كەلىسىم مەن بىرلىكتى نىعايتۋعا باعىتتالعان», دەدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ.
جيىندا قازاقستان حالقى اسسامبلەياسى ەتنومەدياتسيا جونىندەگى رەسپۋبليكالىق كەڭەسىنىڭ توراعاسى شەرزود پۋلاتوۆ مەملەكەتتىڭ ەگەمەندىگىن نىعايتۋ, قوعامدىق كەلىسىمدى ساقتاۋ, بيلىك پەن قوعام اراسىنداعى ديالوگ تەتىكتەرىن دامىتۋ ماسەلەلەرىنە ەرەكشە نازار اۋداردى.
«جاڭا كونستيتۋتسيا – ادامنىڭ قۇقىقتارى مەن بوستاندىقتارىن, ازاماتتاردىڭ بولاشاعىن قامتيتىن ماڭىزدى قۇجات. ونىڭ ەڭ باستى ءرولى – قوعامدىق كەلىسىمدى نىعايتۋ جانە ەلدىڭ تۇراقتى دامۋىنا نەگىز جاساۋ. جاڭا زاڭ جوباسى نەگىزىندە قازاقستان حالقى كەڭەسى قۇرىلادى. ول ۇلتتىق قۇرىلتاي مەن اسسامبلەيا جۇمىس ىستەيتىن الاڭداردى بىرىكتىرىپ, قوعامدىق مۇددەلەردى ءبىر ورتاق پلاتفورمادا دامىتۋعا مۇمكىندىك بەرەدى. بۇل – ەل بىرلىگىن, تىنىشتىعىن ءارى بولاشاققا دەگەن سەنىمىن ارتتىراتىن ماڭىزدى قادام. بايقاعانىمىزداي, ازاماتتار جاڭا جوبانى قولدايدى. ويتكەنى جاڭا كونستيتۋتسيا ارقىلى بالالارىمىزعا قاۋىپسىزدىكتى قامتاماسىز ەتەتىن قۇقىقتىق نەگىز جاساپ وتىرمىز», دەدى ول.
كەزدەسۋ بارىسىندا ساراپشىلار وسىلاي كونستيتۋتسيا جوباسىن كەڭىنەن ءتۇسىندىرۋ, قوعاممەن اشىق پىكىر الماسۋ الاڭدارىن ۇيىمداستىرۋ, ازاماتتاردىڭ ۇسىنىس-پىكىرلەرىن ەسكەرۋ ماڭىزدى ەكەنىن جەتكىزدى.