قازاقستان عىلىمي بەلسەندىلىك بويىنشا «SCImago» جاھاندىق رەيتينگىندە ورتالىق ازيا ەلدەرى اراسىندا كوشباسشىسى اتاندى. بۇل تۋرالى عىلىم جانە جوعارى ءبىلىم مينيسترلىگى حابارلادى.
مينيسترلىكتىڭ مالىمدەۋىنشە, قازاقستان «SCImago Research Group» (SCImago Country Rank) حالىقارالىق عىلىمي بەلسەندىلىك رەيتينگىندە ورتالىق ازيا ەلدەرى اراسىندا ءبىرىنشى ورىندى يەلەنىپ, عىلىم سالاسىنداعى جەتەكشى پوزيتسياسىن تاعى ءبىر مارتە دالەلدەدى. باقىلاۋدىڭ بارلىق كەزەڭى بويىنشا (1996–2024 جىلدار) جيناقتالعان دەرەكتەرگە سايكەس رەسپۋبليكا الەمدىك رەيتينگىندە 69-ورىنعا ورنالاسىپ, وڭىردەگى وزگە مەملەكەتتەردەن ايتارلىقتاي وزىق تۇر. ال 2024 جىلدىڭ قورىتىندىسى بويىنشا قازاقستان 64-ورىنعا كوتەرىلىپ, ۇلتتىق عىلىمنىڭ تۇراقتى دامۋى مەن جاريالانىمدىق بەلسەندىلىكتىڭ ارتقانىن كورسەتتى.
قازاقستاننىڭ «SCImago» رەيتينگىندەگى كوشباسشىلىعى جۇيەلى ءارى پرەتسەدەنتتىك سيپاتقا يە. ورتالىق ازيا ەلدەرىمەن اراداعى الشاقتىق ونداعان, ءتىپتى جۇزدەن استام ورىندى قۇرايدى: وزبەكستان – 83-ورىندا, قىرعىزستان – 130-ورىندا, تاجىكستان – 147-ورىندا, تۇرىكمەنستان 191-ورىندا تۇر. بۇل كورسەتكىشتەر عىلىمدى قارجىلاندىرۋ دەڭگەيىندەگى, زەرتتەۋ ينفراقۇرىلىمىنىڭ دامۋىنداعى, كادرلىق الەۋەتتەگى, حالىقارالىق عىلىمي ىقپالداستىق دارەجەسىندەگى جانە عىلىمي جاريالانىمدار ساپاسىنداعى ايىرماشىلىقتاردى ايقىن كورسەتەدى.
«عىلىم جانە تەحنولوگيالىق ساياسات تۋرالى» زاڭىن ىسكە اسىرۋ اياسىندا وڭىرلىك يننوۆاتسيالىق جۇيەلەردى دامىتۋعا, اكادەميالىق جانە زەرتتەۋشىلىك ارتىقشىلىق ورتالىقتارىن قالىپتاستىرۋعا, بيزنەستىڭ قاتىسۋىمەن عىلىمي زەرتتەۋلەردى بىرلەسىپ قارجىلاندىرۋ تەتىكتەرىن ەنگىزۋگە, سونداي-اق جاس عالىمداردى جۇيەلى تۇردە قولداۋعا باسىمدىق بەرىلەدى. سونىمەن قاتار وتاندىق عىلىمي ۇيىمداردىڭ «Horizon Europe» سەكىلدى حالىقارالىق باعدارلامالارعا قاتىسۋىن كەڭەيتۋ ماڭىزدى باعىتتاردىڭ ءبىرى بولىپ قالا بەرمەك, بۇل وتاندىق عىلىمنىڭ جاھاندىق زەرتتەۋ كەڭىستىگىنە ىقپالداسۋىنا مۇمكىندىك بەرەدى.
«SCImago Research Group» حالىقارالىق عىلىمي بەلسەندىلىك رەيتينگى الەم ەلدەرىنىڭ عىلىمي جانە زەرتتەۋشىلىك الەۋەتىن باعالاۋدىڭ ەڭ بەدەلدى قۇرالدارىنىڭ ءبىرى سانالادى. رەيتينگ «Elsevier» كومپانياسىنا تيەسىلى «Scopus» حالىقارالىق بيبليومەتريالىق دەرەكقورىنىڭ مالىمەتتەرى نەگىزىندە قالىپتاستىرىلادى جانە ۋنيۆەرسيتەتتەر, عىلىمي زەرتتەۋ ينستيتۋتتارى مەن ورتالىقتاردىڭ قىزمەتىن تۇتاستاي قامتيدى. رەيتينگ ءادىسناماسى حالىقارالىق رەتسەنزيالاناتىن جۋرنالدارداعى عىلىمي جاريالانىمدار سانىن, ولاردىڭ دايەكسوز الۋ دەڭگەيىن, حالىقارالىق عىلىمي ىنتىماقتاستىقتى, زەرتتەۋلەر ساپاسىن, سونداي-اق عىلىمنىڭ يننوۆاتسيالىق جانە تەحنولوگيالىق دامۋعا قوسقان ۇلەسىن ەسكەرەدى.
قازاقستاننىڭ «SCImago» رەيتينگىندەگى پوزيتسياسىنىڭ نىعايۋى جۇرگىزىلىپ جاتقان رەفورمالاردىڭ تيىمدىلىگىن دالەلدەپ قانا قويماي, ەلدىڭ ورتالىق ازياداعى عىلىمي جانە زياتكەرلىك كوشباسشى رەتىندەگى حالىقارالىق بەدەلىن دە ارتتىرادى. ءبىلىم مەن تەحنولوگيالار ءۇشىن جاھاندىق باسەكەلەستىك جاعدايىندا بۇل ناتيجە – ۇلتتىق عىلىمي جۇيەنى ودان ءارى دامىتۋعا جانە ەل مەن ءوڭىردىڭ الەۋمەتتىك-ەكونوميكالىق وركەندەۋىنە قوساتىن ۇلەسىن ارتتىرۋ جولىنداعى ماڭىزدى ستراتەگيالىق باعدار.