جەكسەنبىدە قازاقتىڭ تانىمال ارالاس جەكپە-جەك شەبەرى ءالىبي ىدىرىس (10-1) UFC-دەگى تۇساۋكەسەر كەزدەسۋىن وتكىزىپ, حيۋستون (اقش) قالاسىندا جەرگىلىكتى فايتەر ودي وسبورنمەن (13-9) ايقاستى. باسەكەنى باسىنان اياعىنا دەيىن ءوز باقىلاۋىنا ۇستاعان ءالىبي قارسىلاسىنا قاراعاندا سوققىنى كوبىرەك, ءدال جۇمسادى. تەيكداۋندا دا ءبىزدىڭ سپورتشىنىڭ باسىمدىعى بايقالدى. تورەشىلەر ىدىرىستىڭ مىقتىلىعىن ءبىراۋىزدان مويىندادى.
3-8 ناۋرىز ارالىعىندا ەستونيا استاناسى – تالليندە مانەرلەپ سىرعاناۋدان جاستار اراسىنداعى الەم بىرىنشىلىگىنىڭ جالاۋى جەلبىرەيدى. بالتىق جاعالاۋىندا ەل نامىسىن قىزىلوردالىق ارتۋر سماعۇلوۆ پەن استانالىق كارينا شەينا قورعاسا, قوسالقى قۇرامعا سافيا اباەۆا, ۆەرونيكا كيم, اننا ساننيكوۆا ەنىپ وتىر.
دۋبايداعى WTA 1000 ءتۋرنيرى امەريكا-لىق تەننيسشى دجەسسيكا پەگۋلانىڭ جەڭىسىمەن اياقتالدى. شەشۋشى سىندا ول ۋكراينالىق ەلينا سۆيتوليناعا 6:2, 6:4 ەسەبىمەن ۇتتى. پارسى شىعاناعىندا ەلەنا رىباكينا دا ونەر كورسەتكەن ەدى. الايدا جاراقاتىنا بايلانىستى ءۇشىنشى كەزەڭدە جارىس جولىنان شىعىپ قالدى. سەربيالىق الەكساندرا كرۋنيچپەن جۇپتاسقان اننا دانيلينا جارتىلاي فينالعا دەيىن جەتتى. بۇل مەجەدە ولار كانادالىق گابريەلا دابروۆسكي مەن برازيليالىق لۋيزا ستەفانيدەن ۇتىلدى.
گەرمانيانىڭ كوتبۋسىندە سپورتتىق گيمناستيكادان وتكەن الەم كۋبوگىنىڭ «ات» جاتتىعۋىندا ناريمان قۇربانوۆ (14,933 ۇپاي) قولا مەدالدى يەلەندى. پاريج وليمپياداسىنىڭ كۇمىس جۇلدەگەرى تەك يتاليالىق گابريەل تارگەتتا (15,000) مەن ارمەنيالىق ماميكون حاچاترياندى (14,966) العا جىبەردى. ءدال وسى جاتتىعۋدا زەينوللا ىدىرىسوۆ (14,833) ءتورتىنشى ورىنعا تابان تىرەدى.