مەملەكەت باسشىسى نۇرسۇلتان نازارباەۆ 2 ءساۋىر كۇنى كۋبانىڭ استاناسى – گاۆانا قالاسىنا كەلدى. بۇل – قازاقستان پرەزيدەنتىنىڭ بوستاندىق ارالىنا جاساعان العاشقى ساپارى. مۇندا ەلباسى كۋبا مەملەكەتتىك كەڭەسىنىڭ جانە مينيسترلەر كەڭەسىنىڭ توراعاسى راۋل كاسترومەن كەزدەستى.
قازاقستان پرەزيدەنتى نۇرسۇلتان نازارباەۆ ءوزىنىڭ گاۆاناعا جاساعان العاشقى رەسمي ساپارىن كۋبا حالقىنىڭ داڭقتى ۇلى, اقىن, وسى ەلدىڭ ۇلت-ازاتتىق قوزعالىسىنىڭ قايراتكەرى حوسە ءمارتيدىڭ مەموريالىنا گۇل شوعىن قويۋدان باستادى. مەملەكەت باسشىسى بۇل ءراسىم اياقتالعان سوڭ مەموريال مۋزەيىن ارالاپ كورىپ, قۇرمەتتى قوناقتار كىتابىنا قولتاڭبا قالدىردى.
جالپى, كۋباعا ساپارلاپ كەلگەن مەملەكەتتەر باسشىلارى حوسە ءمارتيدىڭ وسى ءبىر الىپ ەسكەرتكىشىنە كەلىپ, گۇل شوقتارىن قويىپ قۇرمەت كورسەتۋدى داستۇرگە اينالدىرعان. بۇل اقىنعا عانا ەمەس, بۇكىل كۋبا حالقىنا جاسالعان ءىلتيپات بولسا كەرەك.
ايتا كەتەيىك, قۇرىلىسى 1958 جىلى اياقتالعان مارتي ەسكەرتكىشىن 6 باعانا قورشاپ تۇر. مونۋمەنتتىڭ ارتىندا 109 مەترلىك مۇنارا بوي تۇزەگەن.
قازاقستان پرەزيدەنتى نۇرسۇلتان نازارباەۆ پەن كۋبا باسشىسى راۋل كاسترو كەزدەسۋ بارىسىندا ەكىجاقتى ىنتىماقتاستىقتى, ساۋدا-ەكونوميكالىق ىقپالداستىقتى, ءبىلىم بەرۋ, مادەنيەت, سپورت, اۋىل شارۋاشىلىعى سالالارىنداعى بايلانىستاردى كەڭەيتۋ جانە الداعى ۋاقىتتا ساياسي ۇنقاتىسۋدى جالعاستىرۋ جولدارىن تالقىلادى.
نۇرسۇلتان نازارباەۆ پەن راۋل كاسترو دەنساۋلىق ساقتاۋ, فارماتسەۆتيكا جانە بيوتەحنولوگيا سالالارىنداعى ءوزارا ءىس-قيمىل ماسەلەلەرىنە ارنايى توقتالدى. وسى سالادا قازاقستاندىق جانە كۋبالىق مامانداردىڭ تاجىريبە الماسۋ قاجەتتىلىگى اتاپ ءوتىلدى.
سونىمەن قاتار, تاراپتار حالىقارالىق كۇن تارتىبىندەگى وزەكتى ماسەلەلەردى دە تالقىلادى. ەلباسى بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەسىن سايلاۋ بارىسىندا قازاقستاننىڭ كانديداتۋراسىن كۋبانىڭ قولداۋى تۇرعىسىنان قول جەتكەن ۋاعدالاستىققا قاناعاتتانۋشىلىق ءبىلدىردى.
سونىمەن بىرگە, ەلباسىنىڭ كۋباعا جاساعان رەسمي ساپارى اياسىندا بىرقاتار مەموراندۋم بەكىتىلدى. اتاپ ايتار بولساق, قازاقستاننىڭ ەنەرگەتيكا ءمينيسترى قانات بوزىمباەۆ پەن كۋبانىڭ ەنەرگەتيكا جانە تاۋ-كەن ءوندىرىسى مينيسترى الفرەدو لوپەس ۆالدەس ەنەرگەتيكا سالاسىنداعى ىقپالداستىق جونىندەگى مەموراندۋمعا قول قويدى.
سونداي-اق, قازاقستان رەسپۋبليكاسىنىڭ دەنساۋلىق ساقتاۋ جانە الەۋمەتتىك دامۋ مينيسترلىگى مەن كۋبانىڭ ەڭبەك جانە الەۋمەتتىك قورعاۋ مينيسترلىگى اراسىندا جۇمىسپەن قامتۋ, الەۋمەتتىك قورعاۋ سالاسىندا مەموراندۋم ءتۇزىلدى. وعان قازاقستان سىرتقى ىستەر ءمينيسترى ەرلان ىدىرىسوۆ پەن كۋبانىڭ ەڭبەك جانە الەۋمەتتىك قورعاۋ ءمينيسترى مارگاريتا گونسالەس قول قويدى.
سونىمەن قاتار, «استانا ەكسپو-2017» ۇك» اق باسقارما ءتوراعاسى احمەتجان ەسىموۆ پەن كۋبانىڭ ساۋدا-ونەركاسىپ پالاتاسىنىڭ توراعاسى ورلاندو ەرناندەس گيلەن اتالعان ەلدىڭ قازاقستاندا وتەتىن ەكسپو-2017 كورمەسىنە قاتىسۋى جونىندەگى 2015 جىلدىڭ قاراشاسىندا قابىلدانعان كەلىسىمشارت تۇرعىسىندا پىكىر الماستى.
ەسكە سالا كەتەيىك, قازاقستان مەن كۋبا اراسىنداعى ديپلوماتيالىق قارىم-قاتىناستار 1992 جىلدان باستاۋ الادى. 1993 جىلى قازاقستاندا كۋبا ەلشىلىگى اشىلدى. 2013 جىلعى 22 قازاننان باستاپ كۋبانىڭ قازاقستانداعى ەلشىسى قىزمەتىن كارلوس ەنريكە ۆالدەس دە لا كونسەپسيون اتقارا باستادى. ال 2013 جىلعى 11 جەلتوقساننان باستاپ قازاقستاننىڭ كاناداداعى ەلشىسى كونستانتين جيگالوۆ كۋباداعى ەلشى قىزمەتىن قوسا اتقارىپ كەلەدى (وتتاۆا قالاسى. رەزيدەنتسياسىمەن).
ەكى ەل اراسىنداعى ساياسي, پارلامەنتارالىق, ساۋدا-ەكونوميكالىق, شارتتىق-قۇقىقتىق, ءمادەني-گۋمانيتارلىق ىنتىماقتاستىقتار ءبىرشاما جولعا قويىلعان. بۇعان دالەل رەتىندە ءار جىلدارداعى مينيسترلىكتەر مەن ۆەدومستۆولار اراسىنداعى ەكىجاقتى كەزدەسۋلەردى, ءوزارا ساۋدا-ساتتىقتى, ەكونوميكالىق قارىم-قاتىناستاردى, ۆيزالىق كەلىسىمدەردى, رۋحاني-مادەني باعىتتاعى, ءبىلىم بەرۋ سالاسىنداعى ىقپالداستىقتى, ەكى ەل سپورتشىلارىنىڭ قاتىسۋىمەن وتكەن جارىستاردى جانە باسقا دا بايلانىستاردى ايتۋعا بولادى.
ەندى ءبىز مەملەكەت باسشىسى تاعزىم ەتىپ, ەسكەرتكىشىنە گۇل شوعىن قويعان حوسە مارتي ءجونىندە از-كەم مالىمەت بەرە كەتەيىك. ول 1853 جىلى گاۆانادا اسكەري قىزمەتكەردىڭ وتباسىندا تۋعان. حوسە مارتي 16 جاسىنان ۇلت-ازاتتىق قوزعالىسقا قاتىسادى. مادريد جانە ساراگوسا ۋنيۆەرسيتەتتەرىندە فيلوسوفيا, ادەبيەت, زاڭ عىلىمدارى بويىنشا ءبىلىم العان ول مەكسيكادا, گۆاتەمالادا ءبىرشاما تۇرىپ, 1879 جىلى كۋباعا قايتا كەلىسىمەن يسپاندارعا قارسى كوتەرىلىستى ۇيىمداستىرعانى ءۇشىن يسپانياعا جەر اۋدارىلادى. ودان كەيىن, ياعني 1880-1895 جىلدار ارالىعىندا اقش-تا تۇرىپ, لاتىن امەريكاسى گازەتتەرىنە ماقالالار جازادى, سويتە ءجۇرىپ, 1882 جىلى كۋبانىڭ قوزعالىس پارتياسىن قۇرادى ءارى «پارتيا» گازەتىن شىعارادى. 1895 جىلى كۋباعا قايتا ورالىپ, يسپاندارمەن سوعىستا قازا تابادى.
اقىننىڭ «ابدۋللا» (1869 ج.)
اتتى تۇڭعىش شىعارماسى قۇلدىق جۇيەگە قارسى جازىلعان. ال «يسماەليلو, «قاراپايىم ولەڭدەر», «ەركىن ولەڭدەر» اتتى جىر جيناقتارى ارقىلى ز ۇلىمدىق پەن ادىلەتسىزدىككە قارسى باتىل ءۇن قاتتى. ونىڭ بىرقاتار شىعارمالارىن قازاق تىلىنە ت.مولداعاليەۆ, ءو.نۇرعاليەۆ, ب.الدامجاروۆ اۋدارعان. قازاق تىلىندە «بوستاندىق داۋىسى» اتتى جىر كىتابى جارىققا شىقتى. بىرنەشە ولەڭدەرى 1973 جىلى «كۋبا تاڭى» جيناعىندا قازاق تىلىندە باسىلدى.
جولدىباي بازار,
«ەگەمەن قازاقستان» –
گاۆانادان (كۋبا).
سۋرەتتەردى تۇسىرگەندەر
س.بوندارەنكو, ب.وتارباەۆ.