قارۋلى كۇشتەردە «باتىر ارۋلار» بايقاۋى ءوتىپ جاتىر

استانا. 4 ءساۋىر. «باتىر ارۋلار – 2016» داۋىس بەرۋ باستالدى. بايقاۋعا 80 نازىك جان جاۋىنگەر قاتىسىپ جاتىر. بۇل تۋرالى egemen.kz ءتىلشىسى حابارلادى. بايقاۋدىڭ العاشقى 3 كۇنىندە 80 ايەل اسكەري قىزمەتشىگە 32 مىڭعا جۋىق داۋىس بەرىلدى. داۋىس بەرۋ 1 ءساۋىر مەن 31 مامىر ارالىعىندا قورعانىس مينيسترلىگىنىڭ mod.gov.kz رەسمي ۆەب-سايتىندا وتەدى. بايقاۋ تازا, ءادىل ءوتۋ بولۋ ءۇشىن ءاربىر سايتقا كىرۋشى ءبىر ءىر-ادرەستەن ءبىر-اق داۋىس بەرە الادى. تاڭداۋ وnline رەجىمدە وتۋدە.  داۋىستار اۆتوماتتى تۇردە سايتتىڭ web-پاراقشاسىندا كورسەتىلەدى. «باتىر ارۋلار» بايقاۋى قازاقستانداعى ايەلدەردىڭ اسكەري قىزمەتىن جاريا ەتۋ ءۇشىن قورعانىس مينيسترلىگىنىڭ باستاماسىمەن ءوتىپ جاتىر. بىلتىر العاش رەت وتكەن بايقاۋعا 123 ايەل اسكەري قىزمەتشى قاتىسقان بولاتىن. سول كەزدە كىرىق كۇندە كونكۋرسانتتارعا 255 725 داۋىس بەرىلدى. بايقاۋ وتانداستارىمىزدىڭ اراسىندا عانا ەمەس, شەتەلدە دە قىزىعۋشىلىق تۋعىزدى. داۋىس بەرۋگە رەسەي, اقش, گەرمانيا, يندونەزيا جانە ءۇندىستان حالقى بەلسەنە اتسالىستى. ناتيجەسىندە تالاي سىناقتاردان سۇرىنبەي ءوتىپ, وزدەرىنىڭ جاۋىنگەرلىك ازىرلىكتەرىن, شىدامدىلىقتارى مەن كۇش-جىگەرلەرىن دالەلدەگەن 12 جەڭىمپاز انىقتالىپ, قازاقستان قارۋلى كۇشتەرىنىڭ لايىقتى وكىلدەرى ەكەندىكتەرىن دالەلدەدى. بايقاۋدىڭ سوڭىندا كاسىبي ستيليستەر قىزداردى اجارلاندىرىپ, جەڭىمپازدار فوتوسەسسياعا قاتىستى. داستان كەنجالين. دەرەك, فوتو: قورعانىس مينيسترلىگى.