اقمولا. كوكشەتاۋداعى دوستىق ۇيىندە قازاقستان حالقى اسسامبلەياسىنىڭ جانىنداعى انالار كەڭەسى وبلىستىق اكىمدىكتىڭ قولداۋىمەن ەل تاۋەلسىزدىگىنىڭ 25 جىلدىعىنا جانە «قايىرىمدىلىق كەرۋەنى» رەسپۋبليكالىق اكتسياسى شەڭبەرىندە اۋكتسيون وتكىزدى. بۇل تۋرالى egemen.kz ءتىلشىسى حابارلايدى.
ناۋقاس بالالار مەن ولاردىڭ وتباسىلارىنا كومەك كورسەتۋگە باعىتتالعان بۇل شاراعا وبلىستىق باسقارمالاردىڭ باسشىلارى, كاسىپورىنداردىڭ جەتەكشىلەرى, مەملەكەتتىك قىزمەتكەرلەر مەن كاسىپكەرلەر قاتىستى.
قايىرىمدىلىق اكتسياسىنىڭ اشىلۋ راسىمىندە اقمولا وبلىسى اكىمىنىڭ ورىنباسارى نۇرلان نۇركەنوۆ كومەككە مۇقتاج جاندارعا قول ۇشىن سوزۋعا نيەت بىلدىرگەن ازاماتتارعا العىسىن ءبىلدىردى.
«وبلىسىمىزدا مۇمكىندىگى شەكتەۋلى, ومىرگە قۇشتار جاندار از ەمەس. ولار قايىرىمدى ازاماتتاردىڭ كومەگىنە مۇقتاج. سونداي جاندارعا قول ۇشىن بەرۋ قالىپتى نارسەگە اينالۋى كەرەك دەپ ەسەپتەيمىن. سوندا بىزدەر وزگەلەرگە ۇلگى بولىپ, مەيىرىمدىلىكتىڭ ءداستۇرلى تۇردە جالعاسۋىنا ۇيتقى بولامىز. ناۋقاس بالالارعا جاساعان جاقسىلىعىمىزدى بۇكىل ادامزاتقا تيگىزگەن شاراپاتىمىز دەپ ۇعىنعان ءجون», – دەدى نۇرلان نۇركەنوۆ.
بۇدان كەيىن التى كەزەڭ بويىنشا 30 لوت ويناتىلدى. مۇندا ونەرپاز دارىندى بالالارمەن جۇمىس جۇرگىزۋ جونىندەگى وبلىستىق وقۋ-ادىستەمەلىك ورتالىعى مەن «اۋلەت» مەكتەپتەن تىس جۇمىس ورتالىعى وقۋشىلارىنىڭ قولونەر بۇيىمدارى ساتىلىمعا ءتۇستى. سونداي-اق, قازاقستان حالقى اسسامبلەياسىنىڭ اقمولا وبلىستىق فيليالى حالىقتىق ساندىك-قولدانبالى شىعارماشىلىق شەبەرلەرىنىڭ تۋىندىلارى قويىلعان ارنايى ساتىلىم كورمەسى ۇسىنىلدى. ساتۋدان تۇسكەن قارجى ايداربەك قاپاروۆ پەن مانسۇر قۇسايىنوۆ ەسىمدى ەكى ناۋقاس بالانى ەمدەۋگە جۇمسالماق.
اۋكتسيون قورىتىندىسىندا ارنايى كوميسسيا اقشالاي جانە شوتقا اۋدارۋ ارقىلى 2 ميلليون 800 مىڭ تەڭگەدەن استام قارجى جينالعانىن مالىمدەدى. بۇل اقشانى انالار كەڭەسىنىڭ ءتورايىمى زەرە قيىقوۆا اتالعان بالالاردىڭ انالارى نۇرگۇل قۇسايىنوۆا مەن ساردال وماراليەۆاعا تابىس ەتتى. ءوز كەزەگىندە اتا-انالار قول ۇشىن سوزعان قايىرىمدى جاندارعا ريزاشىلىعىن ءبىلدىرىپ, العىسىن ايتتى.
باقبەرگەن امالبەك.
دەرەك, سۋرەت: egemen.kz.