وزبەكستان مەن قازاقستان تاريحي ساباقتاستىقتاعى باۋىرلاس كورشىلەر. سوندىقتان, ءبىز تاۋەلسىز قازاقستاننىڭ قارىشتى قادامدارىنا ءاردايىم تىلەكتەستىك نيەتتە جۇرەمىز. ماعان شىۇ ميسسياسىنىڭ وكىلى ءارى وزبەكستان ولي ءماجىلىسى حالىقارالىق ىستەر جانە پارلامەنتارالىق بايلانىستار كوميتەتىنىڭ مۇشەسى رەتىندە قازاقستانداعى سايلاۋعا بايقاۋشى بولىپ قاتىسۋ ۇسىنىلعاندا قۋانا قابىلدادىم.
وزبەكستان 2014 جىلدىڭ جەلتوقسانىندا پارلامەنت سايلاۋىن وتكىزدى. بىزگە دە كوپتەگەن ەلدەردەن حالىقارالىق بايقاۋشىلار كەلدى. بۇل مەنىڭ دە سايلاۋ جۇيەسىندە ءبىرشاما تاجىريبە جيناقتاۋىما سەپتىگىن تيگىزدى. ياعني, قازاقستانداعى سايلاۋدى سالىستىرمالى تۇردە بايقاۋىما مۇمكىندىك تۋعانىن ايتقىم كەلەدى.
استانادان شىققان بىزدەر قازاقستاننىڭ كوركەم ءوڭىرى – بۋرابايدان جۇمىسىمىزدى باستادىق. اۋدان ورتالىعىنداعى قازاق ورتا مەكتەبىندەگى سايلاۋ ۋچاسكەسى دەر كەزىندە سايلاۋشىلاردى سالتاناتتى جاعدايدا قارسى الدى. رەسپۋبليكانىڭ ءانۇرانىن تىڭدادىق. ونىڭ اۋەزىندە رۋحتاندىرۋشى قۋات بار. كەشە عانا ب ۇلىڭعىر كورىنگەن اۋا رايى دا جايناپ, كەلۋشىلەردىڭ كوڭىلىن شۋاققا بولەپ تۇردى.
ودان كەيىن بۋراباي كەنتىندە, زەلەنىي بور پوسەلكەسىندە بولعانىمىزدا دا ءبىرىنشى بولىپ داۋىس بەرگەن كىسىگە, ساياسي ناۋقانعا تۇڭعىش رەت قاتىسۋشى جاستارعا سىي-سياپات كورسەتۋ ءداستۇرى بارلىعىنا ءتانتى بولدىق. سايلاۋ ۋچاسكەلەرى مەملەكەتتىك رامىزدەرمەن بەزەندىرىلىپ, تالاپ دەڭگەيىندە جابدىقتالعان. شاعىن ءدامحانالار ۇيىمداستىرىلىپ, كونتسەرتتەر قويىلىپ جاتتى. جۇرتشىلىق ەمەن-جارقىن كوڭىلمەن امانداسىپ, ءوزىنىڭ ازاماتتىق پارىزىن كوڭىل سەرپىلىسى ۇستىندە ورىنداۋمەن بولدى. وقشاۋ كورىنىس, ولقى دۇنيە بايقالمادى.
وبلىس ورتالىعى كوكشەتاۋعا كەلگەنىمىزدە دە وسىنداي جارقىن كوڭىل اۋانىندا بولدىق. «كوكشەتاۋ» مادەنيەت سارايىنىڭ قوس قاباتىندا ەكى سايلاۋ ۋچاسكەسى ورنالاسىپتى. سايلاۋدى وتكىزۋگە جاۋاپتى ادامدارمەن, دەپۋتاتتىقتان ۇمىتكەرلەردىڭ سەنىمدى وكىلدەرىمەن, جەرگىلىكتى قوعامدىق بايقاۋشىلارمەن پىكىرلەسىپ, داۋىس بەرۋ بارىسىمەن تانىستىق. بەلسەندىلىك جوعارى ەكەن. داۋىس بەرۋ اشىق, ەركىن جانە دەموكراتيالىق سيپاتتا ءوتىپ جاتتى. مۇنىڭ بارلىعى رەسپۋبليكانىڭ سايلاۋ تۋرالى زاڭىنا, حالىقارالىق نورمالارعا ساي كەلەدى.
تاجىكستاننان كەلگەن ارىپتەسىم ەكەۋمىز ءتۇس اۋا كوكشەتاۋداعى №1 ورتا مەكتەپتەگى جانە «دوستار» مادەنيەت سارايىنداعى سايلاۋ ۋچاسكەسىندە بولعانىمىزدا سايلاۋشىلاردىڭ 60 پايىزعا جۋىعى داۋىس بەرىپ ۇلگەرگەنىن بىلدىك. اقپاراتتىق ستەند تە ۇيىمداستىرىلعان ەكەن. حالىقتىڭ قوعام ومىرىندەگى ماڭىزدى وقيعاعا بەلسەنە قاتىساتىندىعى ولاردىڭ ءوز ەلىنىڭ ساياسي ومىرىنەن بەيتاراپ تۇرمايتىنىن بايقاتادى. قازاقستاننىڭ تاۋەلسىزدىك جىلدارىنداعى جارقىن تابىستارىن وسىمەن بايلانىستىرۋعا بولادى. سايلاۋ ەرتەڭگى بولاشاقتىڭ سەنىمدى كىرپىشىن قالاۋمەن بىردەي وقيعا. بۇل سەزىم قازاقستاندىقتاردىڭ جۇرەگىن تەربەتىپ تۇراتىنى جاقسىلىقتىڭ بەلگىسى.
رەسپۋبليكا پارلامەنتى ءماجىلىسى مەن جەرگىلىكتى ءماسليحاتتاردىڭ سايلاۋى ناۋرىز مەيرامىمەن تۇسپا-تۇس كەلۋىنىڭ وزىندىك تەرەڭ ءمانى بار دەپ ويلايمىن. ويتكەنى, ەل قۋانىشى ەسەلەنىپ تۇرعانداي كورىندى. جىلدىڭ جاڭارۋىمەن ەلدىڭ جاڭارۋى دا قاتار جۇرەتىنى انىق. جالپى, ناۋرىز بارشامىزعا ورتاق مەرەكە. مەرەكەلەرىڭىز قۇتتى بولسىن!
ويبەك جۇماەۆ,
شانحاي ىنتىماقتىق ۇيىمىنىڭ وكىلى.
جازىپ العان
باقبەرگەن امالبەك,
«ەگەمەن قازاقستان».
اقمولا وبلىسى.