استانا. 8 ناۋرىز. بۇگىن استاناداعى «استانا ارەنا» ستاديونىندا فۋتبولدان قازاقستان سۋپەركۋبوگى ءۇشىن ماتچ ءوتتى. جەرگىلىكتى «استانا» مەن الماتىنىڭ «قايراتى» اراسىنداعى كەزدەسۋ تارتىسقا تولى بولدى. ناتيجەسىندە ويىن سوڭىنداعى پەنالتي بويىنشا «قايرات» 5:4 ەسەبىمەن جەڭىسكە جەتىپ, سۋپەركۋبوكتى يەمدەندى. بۇل تۋرالى egemen.kz ءتىلشىسى حابارلادى.
ويىننىڭ العاشقى مينۋتتارىنان باستاپ باسىمدىققا يە بولعان «استانا» ويىنشىلارى ءبىرىنشى تايمدا بىرنەشە جويقىن شابۋىل ۇيىمداستىردى. ءوز كەزەگىندە «قايرات» فۋتبولشىلارى دا قارىمتا شابۋىلدارعا شىعىپ, قارسىلاستار قاقپاسىن نىساناعا العان بولاتىن. الايدا, ۇزىلىسكە دەيىن ەسەپ اشىلعان جوق.
ەكىنشى تايمدا دا كوماندالاردا ەسەپ اشاتىن تاماشا مۇمكىندىكتەر بولعانىمەن, گول سوعىلمادى. ودان كەيىنگى قوسىمشا ەكى تايم دا گولسىز ءوتتى. ال ويىن سوڭىنداعى پەنالتيدە «قايراتتىڭ» جولى بولىپ, جەڭىسكە جەتتى.
وسىلايشا, الماتىلىقتار جاڭا باس جاتىقتىرۋشى الەكساندر بوروديۋكتىڭ جەتەكشىلىگىمەن العاشقى جۇلدەلەرىنە قول جەتكىزدى.
ايتا كەتەيىك, وتكەن جىلى دا قوس كوماندا قازاقستان سۋپەركۋبوگىن ساراپقا سالعان ەدى. ول كەزدە دە جەڭىمپاز پەنالتي ارقىلى انىقتالىپ, «استانا» جەڭىس تويىن تويلادى.
«استانا» (استانا) – «قايرات» (الماتى) 0:0 (پەنالتي 4:5)
8 ناۋرىز. استانا. «استانا ارەنا» ستاديونى. 14 000 كورەرمەن.
تورەشى: راۆشان يرماتوۆ (وزبەكستان).
«استانا»: نەناد ەريچ, ابزال بەيسەبەكوۆ, ەۆگەني پوستنيكوۆ (مارك گۋرمان 90), مارين انيچيچ, نەمانيا ماكسيموۆيچ, روحەر كانياس, پاتريك تۆۋماسي, دجوردجە دەسپوتوۆيچ (الەكسەي ششەتكين 89), دميتري شومكو, سەرىكجان مۇجىقوۆ, تاڭات نوسەرباەۆ (بەرىك شايىقوۆ 107).
«قايرات»: ۆلاديمير پلوتنيكوۆ, يساەل باربوزا (ريەرا ورتەگا 106), جەرار گوۋ, اناتولي تيموششۋك, جاركو ماركوۆيچ, برۋنو سوارەس, لۋكاش تەساك, ميحايل باكاەۆ, اسلان داراباەۆ (ۆيتالي لي 65), باۋىرجان يسلامحان.
ەسكەرتۋلەر: ەۆگەني پوستنيكوۆ 41, روحەر كانياس 47, پاتريك تۆۋماسي 69 – جاركو ماركوۆيچ 22, لۋكاش تەساك 90, اناتولي تيموششۋك 103, جەرار گوۋ 106.
تاعى ءبىر ەسكەرە كەتەتىن جايت, وسى ويىنمەن فۋتبولدان ەلىمىزدىڭ جاڭا ماۋسىمى باستالدى. ەندى 12-13 ناۋرىز كۇنى قازاقستان پرەمەر-ليگاسىنىڭ العاشقى تۋرى وتەدى. ول تۋردا مىنا كوماندالار كەزدەسەدى:
12 ناۋرىز
«استانا» (استانا) – «شاحتەر» (قاراعاندى)
«جەتىسۋ» (تالدىقورعان) – «اتىراۋ» (اتىراۋ)
«تاراز» (تاراز) – «قايرات» (الماتى)
13 ناۋرىز
«ورداباسى» (شىمكەنت) – «اقتوبە» (اقتوبە)
«ەرتىس» (پاۆلودار) – «وقجەتپەس» (كوكشەتاۋ)
«توبىل» (قوستاناي) – «اقجايىق» (ورال).
ەلامان قوڭىر.
دەرەك: egemen.kz.
سۋرەت: ورىنباي بالمۇرات.