ۇكىمەتتە ءوندىرىستى لوكاليزاتسيالاۋ بويىنشا جاڭا كەلىسىمدەرگە قول قويىلدى

پرەمەر-مينيستر اگرارلىق سەكتوردىڭ ءوسىپ كەلە جاتقان قاجەتتىلىكتەرى اۋىل شارۋاشىلىعى تەحنيكاسىنىڭ تۇراقتى جانە بولجامدى نارىعىن قالىپتاستىراتىنىن اتاپ ءوتتى. قازاقستان اۋىل شارۋاشىلىعى القاپتارىنىڭ كولەمى بويىنشا الەمدە التىنشى ورىندا. ەگىس القاپتارى شامامەن 24 ملن گەكتاردى قۇرايدى. وتكەن جىلى اۋىل شارۋاشىلىعىنىڭ جالپى ءونىمىنىڭ كولەمى 9 ترلن تەڭگەدەن اسىپ, 6%-دان استامعا ءوستى. استىق جيناۋ 26 ملن تونناعا, مايلى داقىلدار 5 ملن تونناعا جەتتى. 

«مەملەكەت باسشىسى قاسىم-جومارت توقاەۆ اۋىل شارۋاشىلىعى سالاسىنىڭ تەحنولوگيالىق الەۋەتىن دامىتۋ مەن ونى ارتتىرۋ ماسەلەسىنە ايرىقشا ءمان بەرەدى. ءوندىرىس كولەمىنىڭ ءوسۋى, ونىمدىلىكتىڭ ارتۋى جانە ەكسپورتتىق جەتكىزىلىمدەردىڭ كەڭەيۋى شارۋالاردى تەحنيكالىق جابدىقتاۋعا قويىلاتىن تالاپتاردى كۇشەيتىپ جاتىر. سوندىقتان تەحنيكانى جاڭارتۋ, ونىڭ قولجەتىمدىلىگىن قامتاماسىز ەتۋ, وتاندىق وندىرۋشىلەردى ىنتالاندىرۋ سالانىڭ ءارى قاراي دامۋىنىڭ نەگىزگى شارتتارى رەتىندە قاراستىرىلادى. قازاقستاننىڭ جەتەكشى شەتەلدىك وندىرۋشىلەرمەن سەرىكتەستىگى تۇراقتى ءارى ءوزارا ءتيىمدى سيپاتقا يە جانە ۇزاقمەرزىمدى كووپەراتسياعا باعدارلانعان. ۇكىمەت جوبالاردى لوكاليزاتسيالاۋدان باستاپ سىرتقى نارىقتارعا شىعۋعا دەيىنگى بارلىق كەزەڭدە قولداۋ ارقىلى جاڭا وندىرىستەر قۇرۋ ءۇشىن قولايلى جاعداي جاساۋعا دايىن», دەپ اتاپ ءوتتى ولجاس بەكتەنوۆ.

ەلىمىزدىڭ ەگىس القاپتارىندا 130 مىڭنان استام تراكتور, شامامەن 30 مىڭ كومباين جانە 200 مىڭنان استام تىركەمەلى جانە اسپالى تەحنيكا بىرلىگى پايدالانىلىپ جاتىر. بۇل رەتتە وتكەن جىلدىڭ قورىتىندىسى بويىنشا تەحنيكا پاركىن جاڭارتۋ دەڭگەيى 6,5%-دى قۇرادى. نىسانالى ماقسات – بۇل كورسەتكىشتى جىل سايىن 10%-عا دەيىن جەتكىزۋ. وسى ماقساتتا مەملەكەت تاراپىنان قولداۋ شارالارىنىڭ جۇيەلى تەتىگى قالىپتاستىرىلعان, ونىڭ ىشىندە تەحنيكا ساتىپ الۋعا جۇمسالاتىن شىعىنداردىڭ 30%-نا دەيىن سۋبسيديالاۋ, كرەديتتەر مەن ليزينگ بويىنشا جۇكتەمەنى تومەندەتۋ, سونداي-اق وتاندىق وندىرىستەگى تەحنيكا ءۇشىن 5% مولشەرلەمەمەن جەڭىلدەتىلگەن قارجىلاندىرۋ ۇسىنۋ قاراستىرىلعان. قابىلدانىپ جاتقان شارالار قازىردىڭ وزىندە ناتيجە بەرۋدە – سوڭعى ەكى جىلدا وتاندىق تەحنيكا ساتۋ كولەمى 35%-عا ارتىپ, 7,7 مىڭنان 10,4 مىڭ بىرلىككە دەيىن ءوستى. سونىمەن قاتار سۇرانىس قۇرىلىمى اناعۇرلىم كۇردەلى ءارى جوعارى تەحنولوگيالىق ماشينالارعا قاراي اۋىسىپ جاتىر. بۇگىندە جىل سايىن 8 مىڭنان استام تراكتور جانە 1,2 مىڭ كومباين شىعاراتىن 8 ءىرى كاسىپورىن جۇمىس ىستەپ تۇر. ىشكى نارىقتاعى وتاندىق تەحنيكانىڭ ۇلەسى شامامەن 90%-عا جەتتى.

اكىمدىكتەردە ۇيلەستىرۋ جوق: ۇكىمەت باسشىسى جەرگىلىكتى جەردەگى كەمشىلىكتەردى اتاپ ءوتتى

حالىقارالىق سەرىكتەستەر لوكاليزاتسيانى ودان ءارى تەرەڭدەتۋگە, تەحنولوگيالار ترانسفەرىنە, سەرۆيستىك ينفراقۇرىلىمدى دامىتۋعا جانە قازاقستان نارىعىندا قاتىسۋدى كەڭەيتۋگە قىزىعۋشىلىق ءبىلدىردى. تولىق تەحنولوگيالىق تىزبەكتى قالىپتاستىرۋ جانە وتاندىق شارۋالار ءۇشىن زاماناۋي جوعارى تەحنولوگيالىق جابدىقتاردىڭ قولجەتىمدىلىگىن ارتتىرۋ ماسەلەلەرى تالقىلاندى.

«پرەزيدەنت پەن ۇكىمەتتىڭ دايەكتى ونەركاسىپتىك ساياساتى سەنىمگە بەرىك نەگىز قالاپ وتىر. الدىمەن ەلىمىزگە نارىق كوشباسشىسى John Deere كەلدى, مۇنداي جەتىستىك وزگەلەرگە كۇشتى سيگنال بولدى: بۇگىن ءبىز باسقا دا جاھاندىق ويىنشىلاردىڭ كەلىپ جاتقانىن كورىپ وتىرمىز. ءبىز جاڭا تەحنولوگيالاردى قابىلداپ, وزىق ستاندارتتاردى ەنگىزۋگە, تەحنيكالىق ماماندارىمىزدىڭ بىلىكتىلىگىن ارتتىرىپ, فەرمەرلەردى وتاندىق ءوندىرىستىڭ جوعارى تەحنولوگيالىق ماشينالارىمەن قامتاماسىز ەتۋگە دايىنبىز», دەدى «اگروماشحولدينگ KZ» اق پرەزيدەنتى دينارا شۇكىجانوۆا.

ء«بىز قازاقستاننىڭ ۇزاقمەرزىمدى ىنتىماقتاستىققا اشىقتىعىن جانە ينۆەستورلار ءۇشىن جاسالىپ جاتقان جاعدايدى جوعارى باعالايمىز. بىلتىرعى قاراشادا قول قويىلعان قوستانايداعى ءوندىرىستى لوكاليزاتسيالاۋ جونىندەگى ستراتەگيالىق كەلىسىم سەرىكتەستىگىمىزدەگى ماڭىزدى قادام بولدى. ءبىزدىڭ كومپانيا الداعى جىلدارى 3 مىڭعا جۋىق تەحنيكا شىعارۋدى جوسپارلاپ وتىر. John Deere قازاقستاندى ورتالىق ازياداعى نەگىزگى ستراتەگيالىق ارىپتەس رەتىندە قاراستىرادى. ءبىز ءوندىرىستى ودان ءارى لوكاليزاتسيالاۋعا, ونىمدىلىكتى ارتتىرۋعا دايىنبىز. تسيفرلاندىرۋ مەن اۋىل شارۋاشىلىعىن تۇراقتى دامىتۋعا نازار اۋدارا وتىرىپ, زاماناۋي تەحنيكا شىعارۋدى جوسپارلاپ وتىرمىز», دەپ اتاپ ءوتتى John Deere كومپانياسىنىڭ تمد ەلدەرى بويىنشا ۆيتسە-پرەزيدەنتى پەتەر زاكسە. 

«جاڭا تەتىكتەردىڭ ارقاسىندا اۋىل شارۋاشىلىعى سالاسىنىڭ تۇبەگەيلى جاڭا دەڭگەيىنە قول جەتكىزىلدى. قالىپتاسقان ينۆەستيتسيالىق جانە ينستيتۋتسيونالدىق احۋال قازاقستاندى ۇزاقمەرزىمدى نەگىزدە تەحنولوگيالار ترانسفەرتى, جوبالاردى لوكاليزاتسيالاۋ جانە دامىتۋ كونتەكستىندە شەتەلدىك ينۆەستيتسيالار ءۇشىن تارتىمدى الاڭعا اينالدىرادى. سونىمەن قاتار ادامي كاپيتالدىڭ ماڭىزدىلىعىن اتاپ وتكىم كەلەدى. ءبىز وقىتۋ جانە ودان ءارى جۇمىسقا ورنالاستىرۋ ماقساتىندا جاڭا باعدارلامانى ىسكە قوستىق», دەپ اتاپ ءوتتى Eurasia Group AG باس وپەراتسيالىق ديرەكتورى سەرگەي گلوككە.

ءونىمى 40-تان استام ەلگە تارايتىن, اۋىل شارۋاشىلىعى تەحنيكاسىن ءوندىرۋشى جەتەكشى كومپانيا Väderstad Group-تىڭ (شۆەتسيا) ديرەكتورلار كەڭەسىنىڭ مۇشەسى كريستينا ستارك قازاقستانمەن ىنتىماقتاستىقتى كەڭەيتۋگە مۇددەلى ەكەنىن ايتتى.

ء«بىزدىڭ كومپانيا قازاقستاننىڭ تۇراقتى سەرىكتەسى بولۋدى جانە ەلدىڭ اۋىل شارۋاشىلىعىن دامىتۋعا قاتىسۋدى جوسپارلاپ وتىر. ءوزارا ءىس-قيمىلىمىزدىڭ الەۋەتىن دامىتۋ قازاقستاندىق شارۋالاردىڭ قاجەتتىلىكتەرىنە باعدارلانعان جاڭا ونىمدەر شىعارۋعا مۇمكىندىك بەرەدى», دەدى ول.

ۇكىمەت قوجا احمەت ياساۋي مۇراسىن ناسيحاتتاۋ جوسپارىن بەكىتتى

كومپانيالاردىڭ توپ-مەنەدجەرلەرى سەرىكتەستىكتى دامىتۋعا دايىن ەكەندىگىن ءبىلدىردى. ولاردىڭ قاتارىندا Dewulf كومپانياسىنان – حەندريك دەكرامەر, Amity Technology – مايك سپرەنگەر, Lindsay Corporation – ريچارد گارولد, Frans Vervaet B.V. – روبين ۆەرۆات, Brandt – فيليپ كورجچاك, Kuhn Group – دجەكي كيرچ جانە تاعى دا باسقالار بار.

قازاقستان تاراپىنان ونەركاسىپ جانە قۇرىلىس ءمينيسترى ەرسايىن ناعاسپاەۆتىڭ, اۋىل شارۋاشىلىعى ءمينيسترى ايداربەك ساپاروۆتىڭ, «بايتەرەك» حولدينگىنىڭ باسقارما توراعاسى رۋستام قاراعويشيننىڭ پىكىرلەرى تىڭدالدى.

كەزدەسۋ قورىتىندىسى بويىنشا قوستانايداعى لوكاليزاتسيا ورتالىعىنىڭ وندىرىستىك بازاسىندا قازاقستاندا اۋىل شارۋاشىلىعى تەحنيكاسى ءوندىرىسىن لوكاليزاتسيالاۋعا باعىتتالعان كوپجاقتى كەلىسىمدەرگە قول قويۋ ءراسىمى ءوتتى.

كەلىسىم «اگروماشحولدينگ KZ» اق, «Eurasia Group AG» جشس مەن الەمدىك جەتەكشى وندىرۋشىلەر – Väderstad Group, Dewulf, Lindsay Corporation, Amity Technology, Frans Vervaet B.V., Kuhn Group جانە Brandt كومپانيالارى اراسىندا جاسالدى.

ۋاعدالاستىقتاردى جۇزەگە اسىرۋ سالانىڭ الەۋەتىن كۇشەيتەدى جانە قازاقستاننىڭ جاھاندىق ونەركاسىپتىك ءوندىرىس جۇيەسىندەگى مارتەبەسىن نىعايتۋعا باعىتتالعان.