ارمەنيادا پارلامەنت سايلاۋى باستالدى

رەسپۋبليكانىڭ ورتالىق سايلاۋ كوميسسياسىنىڭ مالىمەتىنشە, ەلدەگى سايلاۋشىلار سانى 2 ملن 485 مىڭ 851 ادامدى قۇرايدى. ەل اۋماعىندا تاڭعى ساعات 08:00-دەن كەشكى 20:00-گە دەيىن 2005 سايلاۋ ۋچاسكەسى جۇمىس ىستەيدى.

بۇل سوڭعى توعىز جىلداعى العاشقى كەزەكتى پارلامەنت سايلاۋى. بۇعان دەيىنگى 2018 جانە 2021 جىلدارداعى سايلاۋلار كەزەكتەن تىس وتكەن بولاتىن. بيىلعى دوداعا 18 ساياسي كۇش قاتىسۋدا. زاڭ بويىنشا سايلاۋشىلاردىڭ ەڭ تومەنگى قاتىسۋ شەگى بەلگىلەنبەگەن. سوندىقتان داۋىس بەرگەن ازاماتتاردىڭ سانىنا قاراماستان سايلاۋ ءوتتى دەپ تانىلادى. داۋىس بەرۋ پروپورتسيونالدى سايلاۋ جۇيەسى بويىنشا ۇيىمداستىرىلعان.

ەۋرووداق ارمەنياعا 50 ميلليون ەۋرو بولەدى

پارتيالار ءۇشىن ءوتۋ شەگى 4 پايىزدى قۇرايدى. ەكى نەمەسە ءۇش پارتيادان قۇرالعان بلوكتار ءۇشىن بۇل كورسەتكىش 8 پايىز, ال ءتورت جانە ودان دا كوپ پارتيادان تۇراتىن كەڭ كواليتسيالار ءۇشىن 10 پايىز بولىپ بەلگىلەنگەن.

GALLUP International Association ۇيىمىنىڭ ارمەنياداعى وكىلدىگى جۇرگىزگەن ساۋالناما ناتيجەسىنە سايكەس, وپپوزيتسيالىق پارتيالار كۇش بىرىكتىرگەن جاعدايدا بيلىك پارتياسىنان كوپ داۋىس جيناۋى مۇمكىن.

ساۋالناماعا سايكەس, قازىرگى پرەمەر-مينيستر نيكول پاشينيان جەتەكشىلىك ەتەتىن «ازاماتتىق كەلىسىم» پارتياسىن رەسپوندەنتتەردىڭ 32,4 پايىزى قولداۋعا دايىن.

قازاقستان – ارمەنيا: سەنىم مەن جاۋاپكەرشىلىككە نەگىزدەلگەن سەرىكتەستىك

ال رەسەيلىك ارميان كاسىپكەرى سامۆەل كاراپەتيان قۇرعان «كۇشتى ارمەنيا» پارتياسى 16,4 پايىز, ەلدىڭ بۇرىنعى پرەزيدەنتى روبەرت كوچاريان جەتەكشىلىك ەتەتىن «ارمەنيا» بلوگى 15,2 پايىز, كاسىپكەر گاگيك تسارۋكيان باسقاراتىن «گۇلدەنگەن ارمەنيا» پارتياسى 8,8 پايىز, ال بۇرىنعى ومبۋدسمەن ارمان تاتويان جەتەكشىلىك ەتەتىن «بىرلىك قاناتتارى» پارتياسى 6,2 پايىز قولداۋعا يە.

وسىلايشا, نەگىزگى ءتورت وپپوزيتسيالىق كۇشتىڭ جيىنتىق رەيتينگى 46,6 پايىزدى قۇراپ وتىر.