استانا. 7 ناۋرىز. ەرتەڭ الماتىداعى بالۋان شولاق اتىنداعى سپورت جانە مادەنيەت سارايىندا قازاقتىڭ اتاقتى بالۋانى, ەركىن كۇرەستەن كسرو چەمپيونى, كسرو حالىقتارى سپارتاكياداسىنىڭ چەمپيونى ابىلسەيىت ايحانوۆپەن قوشتاسۋ ءراسىمى وتەدى. بۇل تۋرالى egemen.kz ءتىلشىسى حابارلادى.
مارقۇمنىڭ جانازاسى ساعات 10.00-دە شىعارىلادى.
بۇگىن مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءباسپاسوز حاتشىسى باقىتبەك حاميت ايگىلى بالۋاننىڭ قايتىس بولۋىنا بايلانىستى مينيسترلىكتىڭ مارقۇمنىڭ تۋعان-تۋىستارىنا كوڭىل ايتۋ حاتىن جولداعانىن ايتتى. وندا بىلاي دەلىنگەن: «قازاق كۇرەسى ورنى تولماس قازاعا ۇشىرادى. كەشە قازاقتىڭ اتاقتى بالۋانى, ەركىن كۇرەستەن كسرو چەمپيونى, كسرو حالىقتارى سپارتاكياداسىنىڭ چەمپيونى ابىلسەيىت ايحانوۆ دۇنيەدەن ءوتتى.
ابىلسەيىت رۇستەم ۇلىنىڭ قازاق كۇرەسىنە سىڭىرگەن ەڭبەگى وراسان زور. وتكەن عاسىردىڭ 50-60 جىلدارى قازاقستان بىرىنشىلىگىندە 11 مارتە جەڭىمپاز اتانىپ, وداق كولەمىندە وتكەن تالاي بايراقتى باسەكەلەردە ولجا سالدى. كەيىننەن دەنە تاربيەسى تەورياسىنىڭ پروفەسسورى اتانىپ, شاكىرت تاربيەلەۋدە ەلىمىزگە ولشەۋسىز ۇلەس قوستى. ونىڭ قول استىندا جاتتىققان تالاي بالۋاندار كوپتەگەن حالىقارالىق جارىستاردا توپ جارىپ, ەلىمىزدىڭ مەرەيىن ءوسىردى.
ابىلسەيىت ايحانوۆ - كسرو قۇراماسىندا ويىپ تۇرىپ ورىن العان الىپ تۇلعالى بالۋاندارىمىزدىڭ ءبىرى جانە بىرەگەيى.
ءبىز ابىلسەيىت رۇستەم ۇلىنىڭ قازاق سپورتىنا قوسقان ولشەۋسىز ەڭبەگىن ەشقاشان ۇمىتپايمىز. مارقۇمنىڭ ارتتا قالعان تۋعان-تۋىستارىنا كوڭىل ايتا وتىرىپ, يمانى سالاماتتى بولسىن دەيمىن. اعامىزدىڭ جاتقان جەرى جارىق, توپىراعى تورقا بولسىن!»
داستان كەنجالين.
دەرەك, سۋرەت: مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى.