استانا. 7 ناۋرىز. ايماق باسشىسى قىرىمبەك كوشەرباەۆ ناۋرىز ايىنىڭ العاشقى اپتاسىندا وڭىردەگى 7 اۋدان مەن بايقوڭىر قالاسىن تۇگەل ارالاپ شىقتى. تۇرعىندارمەن كەزدەسىپ, كۇرمەۋى قيىن ماسەلەلەردى كوزبەن كوردى. ساپار بارىسىندا 30-دان استام ءتۇرلى نىسانداردىڭ جۇمىسىمەن تانىستى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
الدىمەن وبلىس اكىمى جاڭاقورعان اۋدانىنا قاراستى تومەنارىق اۋىلدىق وكرۋگىندە بولىپ, تۇرعىندارمەن كەزدەستى. وندا اۋىل حالقى ەلدى مەكەنگە جاڭا مەكتەپتىڭ قاجەتتىگىن قىرىمبەك كوشەرباەۆقا جەتكىزىپ, وسى پروبلەمانى نازارعا الۋىن سۇرادى. ايماق باسشىسى اپاتتى جاعدايدا دەپ تانىلعان №223 مەكتەپكە جاڭا عيمارات جىل سوڭىنا دەيىن سالىناتىنىن مالىمدەدى. سونداي-اق, ءوڭىر باسشىسى وسى اۋدانداعى اققورعان اۋىلدىق وكرۋگىندە دە جاڭا مەكتەپ بوي كوتەرەتىنىن ايتتى. ال بيىل شيەلى اۋدانىنا قاراستى تەلىكول اۋىلىنداعى جاڭا ءبىلىم وشاعى پايدالانۋعا بەرىلەدى. بۇگىندە 300 ورىندىق مەكتەپتىڭ قۇرىلىسى جۇرگىزىلىپ جاتىر. جالپى وبلىستا 11 اپپاتتى جاعدايداعى مەكتەپ بار. بۇل ءبىلىم نىساندارىنىڭ قۇرىلىسى مەملەكەتتىك-جەكەمەنشىك ارىپتەستىك نەگىزىندە جۇرگىزىلەتىن بولادى.
اۋدانداردا جاعىمدى جاڭالىقتار دا جەتەرلىك. ماسەلەن, ارال اۋدانىنا قاراستى قاراشالاڭ اۋلىندا «قاراشالاڭ بالىق سەرۆيستىك-دايىنداۋ ورتالىعى» جۇمىسىن باستادى. زاۋىتتىڭ جىلدىق بالىق وڭدەۋ قۋاتتىلىعى 3000 تونناعا ەسەپتەلگەن. مۇندا 50-دەن استام جەرگىلىكتى تۇرعىن تۇراقتى جۇمىسپەن قامتىلعان.
«قامباش» بالالاردى ساۋىقتىرۋ جانە قوسىمشا ءبىلىم بەرۋ ورتالىعى جىل ون ەكى اي جۇمىس جاسايدى. بيىلعى وقۋ جىلىنىڭ وزىندە 500-دەن استام جەتكىنشەك وسىندا بىلىمدەرىن جەتىلدىردى. ناتيجەسى دە جامان ەمەس. قازىرگى تاڭدا ورتالىقتا 75 وقۋشى سىناققا قىزۋ دايىندالۋدا.
ال قازالى تەمىرجول اۋرۋحاناسى تولىقتاي جاڭا مەديتسينالىق قۇرالدارمەن جابدىقتالدى. سونداي-اق, قارماقشى اۋدانىندا زاماناۋي تالاپقا ساي اۆتوبەكەتتىڭ قۇرىلىسى جۇرگىزىلۋدە. ونىڭ قاسىنان تالاپقا ساي جاڭا بازار سالىنادى. كۇزدى كۇندەرى ديقاندار جاز بويعى ەڭبەكتەرىن ەش دەلدالسىز وسىندا اكەپ ساتۋعا تەگىن ورىن بەرىلەتىن بولادى. سونىمەن قاتار, اۋداندا يندۋستريالدى ايماققا ينفراقۇرىلىم تارتۋ جۇمىستارى قارقىندى. بۇل جۇمىستار مامىر ايىنىڭ اياعىندا تولىق اياقتالادى. ءوندىرىس ايماعىنا قازىردىڭ وزىندە 10-نان استام جوباعا ارنالعان زاۋىتتار سالۋعا جەرگىلىكتى كاسىپكەرلەر نيەت تانىتىپ وتىر.
ال سىرداريا اۋدانىندا اۋىز سۋ ماسەلەسى تولىق شەشىمىن تاپقان. ءتىپتى تەرەڭوزەكتە كارىز جۇيەسى تارتىلىپ, وبلىس بويىنشا كوممۋنالدىق ماسەلەلەرى تولىق شەشىمىن تاپقان العاشقى اۋدان. 2015 جىلدىڭ قورىتىندىسى بويىنشا كوممۋنالدىق تولەمدەرگە دە قارىزسىز شىققان.
«جەر بەتىندە بولىپ جاتقان بارلىق جاعداي بىزگە دە اسەر ەتپەي قويمايدى. جاڭا زاماننىڭ جاڭا شاقىرتۋلارىنا جاۋاپ بەرەتىن بولۋىمىز قاجەت. ول ءۇشىن جاڭا تەحنولوگيالاردىڭ مەڭگەرىپ, جۇدىرىقتاي جۇمىلا جۇمىس جاساۋىمىز كەرەك. جىلىنا 200-گە جۋىق ستۋدەنتتەرىمىزدى رەسەيدىڭ ەسەبىنەن كورشى ەلدىڭ ماڭدايالدى وقۋ ورىندارىندا ءبىلىم الۋدا. ءبىر-ەكى جىلدىڭ كولەمىندە الدىڭعى لەكتەگى ستۋدەنتتەر ەلگە مامان بولىپ ورالادى», – دەدى ايماق باسشىسى قىرىمبەك كوشەرباەۆ.
ايتا كەتەيىك, بارلىق اۋدانداردا ءىسساپاردا بولعان وبلىس اكىمى تۇرعىنداردىڭ وتىنىشتەرى مەن كوتەرگەن ماسەلەلەرى كەزەڭ-كەزەڭىمەن شەشىلەتىنىن جەتكىزدى.
تالعات رايىمبەك.
دەرەك, سۋرەت: وبلىس اكىمدىگىنىڭ ءباسپاسوز قىزمەتى.