كەشە پرەزيدەنت جانىنداعى ورتالىق كوممۋنيكاتسيالار قىزمەتىندە «كاسىبي مەملەكەتتىك اپپارات. مانساپتىق مودەلگە ءوتۋ» تاقىرىبىندا بريفينگ ءوتتى. وعان مەملەكەتتىك قىزمەت ىستەرى مينيسترلىگى مەملەكەتتىك قىزمەت دەپارتامەنتىنىڭ ديرەكتورى ءالي كومەكباەۆ پەن «نازارباەۆ ۋنيۆەرسيتەت» مەملەكەتتىك ساياسات جوعارى مەكتەبىنىڭ دەكانى ۆەنگ تات حۋەي قاتىستى.
بريفينگتە ءبىرىنشى كەزەكتە ءسوز العان ءالي كومەكباەۆ ەلباسى نۇرسۇلتان نازارباەۆتىڭ مەملەكەتتىك اپپاراتتى كاسىبيلەندىرۋگە باعىتتالعان تاپسىرماسىن جۇزەگە اسىرۋ بويىنشا مينيسترلىك تاراپىنان اتقارىلىپ جاتقان جۇمىستارعا توقتالا كەلىپ, وسى جىلدىڭ 1 قاڭتارىنان باستاپ كۇشىنە ەنگەن «مەملەكەتتىك قىزمەت تۋرالى» زاڭعا سايكەس قابىلدانعان اكتىلەر مەن جاڭا تاسىلدەر جونىندە ايتىپ ءوتتى.
«مەملەكەتتىك قىزمەتتىڭ جاڭا مانساپتىق مودەلى بويىنشا مەملەكەتتىك ورگان قىزمەتكەرلەرى اراسىندا جوعارى بوس لاۋازىمعا تەك ىشكى كونكۋرسپەن, ال تومەنگى لاۋازىمدارعا جالپى كونكۋرس ارقىلى عانا تاعايىندالادى. وتكەن جىلى مينيسترلىكتەردە, ولاردىڭ ۆەدومستۆولارىندا جانە جەرگىلىكتى اتقارۋشى ورگانداردا ورتا ەسەپپەن 828 ازامات اشىق بايقاۋسىز ىشكى اۋىسۋ ءتارتىبى ارقىلى قىزمەتكە ورنالاسقان. ال قازىر جاڭا تالاپ بويىنشا قىزمەتكە مۇنداي تاسىلمەن تاعايىنداۋعا جول بەرىلمەيدى», – دەدى ءا.كومەكباەۆ. سونداي-اق, ول بۇل مودەلدىڭ مەملەكەتتىك جاس قىزمەتشىلەردىڭ پسيحولوگيالىق تۇرعىدا بەيىمدەلۋىنە ءارى ونىڭ كاسىبيلىگىنىڭ ارتۋىنا, بولاشاققا سەنىممەن قاراۋىنا جانە مەملەكەتتىك قىزمەت اياسىندا ۇزاق مەرزىمدى مانساپتىق ءوسۋدى جوسپارلاۋىنا وڭ ىقپالىن تيگىزەتىنىن جەتكىزدى.
سونىمەن قاتار, سپيكەر بارلىق مەملەكەتتىك قىزمەتشىلەردىڭ جەكە جوسپارى بەكىتىلىپ, سوعان سايكەس اتقارعان جۇمىسى توقسان سايىن جانە جىل قورىتىندىسى بويىنشا باعالانىپ وتىراتىنىن ءمالىمدەدى. ونىڭ سوزىنە قاراعاندا, ءاربىر مەملەكەتتىك قىزمەتشىنىڭ ءوز كاسىپتىك مىندەتىن قالاي اتقارعانى, ەڭبەك ءتارتىبى مەن ادەپ قاعيدالارىن ساقتاۋى, بەلسەندىلىگى, جۇمىسقا دەگەن ىنتا-ىقىلاسى جونىندەگى باعانى ءبىر عانا لاۋازىمدى تۇلعا ەمەس, بارلىق ارىپتەستەرى بەرەتىن بولادى. ناقتىلاي ايتقاندا, «ب» كورپۋسىنداعى قىزمەتشىلەردى باعالاۋعا تىكەلەي باسشىسى, باعىنىستى قىزمەتكەرلەر جانە ارىپتەستەرى قاتىسادى. بۇدان ءبىز باسشىنى باعالاۋدا ودان جوعارى تۇرعان لاۋازىم يەسىنىڭ پىكىرى عانا ەمەس, سونداي-اق, ارىپتەستەرى مەن قول استىنداعى باعىنىستى قىزمەتكەرلەردىڭ دە پىكىرلەرى ەسكەرىلەتىنىن ۇعامىز. شىن مانىندە, بۇل ءتاسىل ءبىزدىڭ ەلىمىزدە العاش رەت قولدانىلىپ وتىر.
ودان ءارى دەپارتامەنت ديرەكتورى تەستىلەۋدى ۇيىمداستىرۋ ەرەجەسىنە قاتىستى بىرقاتار ماسەلەلەردى اتاپ ءوتتى. «تەستىلەۋدى ۇيىمداستىرۋ ەرەجەسىنە وزگەرىستەر مەن قوسىمشالار ەنگىزىلدى. ەندى تەستىلەۋدەن ءوتۋ جالپى جينالعان بالداردىڭ جيىنتىعىمەن ەسەپتەلەتىن بولادى. بۇل تۇستا, ءاربىر نورماتيۆتىك-قۇقىقتىق اكتىلەردى بىلۋگە بايلانىستى تەستىلەۋدىڭ شەكتى ءمانى تومەندەتىلدى. بۇل ءوز كەزەگىندە مامان جەتىسپەۋشىلىگىن وڭتايلى شەشۋگە ءوز ىقپالىن تيگىزەدى», – دەدى ءا.كومەكباەۆ. ونىڭ ايتۋىنشا, اسىرەسە, بۇل قادام اۋىلدىق جانە اۋداندىق جەرلەردەگى مامان جەتىسپەۋشىلىگىنە قاتىستى ماسەلەلەردى شەشۋدە وزىندىك ماڭىزعا يە.
سونداي-اق, سپيكەر اتالعان زاڭ اياسىندا ماماندارعا وزدەرىنىڭ قارىم-قابىلەتتەرىن دالەلدەۋگە مول مۇمكىندىك بەرىلگەنىن اتاپ كورسەتتى. «مەملەكەتتىك اكىمشىلىك قىزمەتكە جاڭادان ورنالاسقان مەملەكەتتىك قىزمەتشىلەردىڭ اتقاراتىن لاۋازىمدارىنا لايىقتى ەكەنىن تەكسەرۋ ماقساتىندا ءۇش اي سىناق مەرزىمى بەلگىلەنەدى. مەملەكەتتىك قىزمەتشى سىناق مەرزىمىندە قاناعاتتانارلىقسىز ناتيجە كورسەتكەن جاعدايدا, وعان تاعى دا ءۇش اي مۇمكىندىك بەرىلەدى. ويتكەنى, قىزمەتكە جاڭادان كەلگەن مامان العاشقى ءۇش ايدا ءتۇرلى سەبەپتەرمەن ءوزىن ءوزى دالەلدەي الماي قالۋى مۇمكىن. سوندىقتان, وعان تاعى دا قوسىمشا ۋاقىت ۇسىنىلادى. بۇل ءوز كەزەگىندە كادرلىق تۇراقسىزدىق دەڭگەيىن ءتومەندەتەدى», – دەدى ءا.كومەكباەۆ.
بۇعان قوسا, دەپارتامەنت ديرەكتورى كونكۋرستى زاڭ شەڭبەرىندە ءادىل ءارى اشىق وتكىزۋ ماقساتىندا 5 كۇندىك مەرزىمى بار اپەللياتسيا قاراستىرىلعانىن, مينيسترلىكتە جانە اۋماقتىق دەپارتامەنتتەردە ۇمىتكەرلەردىڭ شاعىمىن قاراۋ مەن قۇقىقتارىن قورعاۋ باعىتىنداعى اپەللياتسيالىق كوميسسيالار قۇرىلاتىنىن, ونىڭ قۇرامىنا تاۋەلسىز باقىلاۋشىلار رەتىندە قوعامدىق ۇيىمداردىڭ جانە بۇقارالىق اقپارات قۇرالدارىنىڭ وكىلدەرى كىرە الاتىنىن ءمالىم ەتتى.
جيىندا «نازارباەۆ ۋنيۆەرسيتەت» مەملەكەتتىك ساياسات جوعارى مەكتەبىنىڭ دەكانى ۆەنگ تات حۋەي قازاقستاننىڭ مەملەكەتتىك قىزمەتتى رەفورمالاۋدا ءتيىمدى ادىستەر قولدانىپ وتىرعانىن ايتتى. «قازاقستان حالىقارالىق تاجىريبەلەردى ەنگىزۋ ارقىلى مەملەكەتتىك قىزمەت سالاسىن رەفورمالاۋدىڭ وتە ءتيىمدى شەشىمدەرىنە جۇگىنۋدە. ءبىزدىڭ مەملەكەتتىك ساياسات جوعارى مەكتەبى اتالعان رەفورمالاردى ءجىتى قاداعالاۋدا. ءبىز مەملەكەتتىك قىزمەت ىستەرى مينيسترلىگىمەن بىرگە بۇل ۇردىسكە ءوزىمىزدىڭ ۇلەسىمىزدى قوسىپ كەلەمىز», – دەدى ول. ونىڭ ايتۋىنشا, مەملەكەتتىك ساياسات جوعارى مەكتەبى حالىقارالىق سەرىكتەستەرىمەن بىرگە ءتۇرلى سەمينارلار وتكىزىپ, قازاقستاننىڭ مەملەكەتتىك قىزمەت سالاسىن رەفورمالاۋىنا قاجەتتى ەڭ وزىق الەمدىك تاجىريبەلەردى جيناقتاۋعا وزىندىك سەپتىگىن تيگىزگەن. سونداي-اق, ول اتالعان مەكتەپتىڭ مەملەكەتتىك قىزمەت سالاسىن رەفورمالاۋدا جاقسى ناتيجەلەرگە قول جەتكىزگەن اقش, سينگاپۋر, ەكونوميكالىق ىنتىماقتاستىق جانە دامۋ ۇيىمى ەلدەرىمەن تىعىز بايلانىستا جۇمىس ىستەپ وتىرعانىن جەتكىزدى.
جولدىباي بازار,
«ەگەمەن قازاقستان».