وبلىستىق ءماسليحاتتىڭ بەسىنشى شاقىرىلعان كەزەكتەن تىس سەسسياسىندا حالىق قالاۋلىلارى قوعامدىق كەڭەستىڭ قۇرامىن, ونىڭ ەرەجەسىن بەكىتتى. وتكەن جىلدىڭ قاراشاسىندا ەلباسى قول قويعان «قوعامدىق كەڭەستەر تۋرالى» زاڭعا سايكەس, قوعامدىق كەڭەسكە وڭىردەن 17 ادام مۇشە بولدى.
ولاردىڭ قاتارىندا ءۇش شەنەۋنىك قانا بار, قالعاندارى ارداگەرلەر, اۋىل شارۋاشىلىعىن ۇيىمداستىرۋشىلار, ۇكىمەتتىك ەمەس ۇيىم مۇشەلەرى, بەلسەندى ازاماتتار.
قوعامدىق كەڭەستىڭ توراعاسى بولىپ, بەلگىلى اۋىل شارۋاشىلىعىن ۇيىمداستىرۋشى, قازاقستاننىڭ ەڭبەك ەرى سايران بۇقانوۆ سايلاندى. ونىڭ حاتشىلىعىنا حالىق قالاۋلىلارى قازاقستان حالقى اسسامبلەياسىنىڭ مۇشەسى ۆالەري ۆيشنيچەنكونى لايىق دەپ تاپتى. تاياۋ كۇندەرى قوعامدىق كەڭەس مۇشەلەرىنىڭ وبلىس اكىمىمەن العاشقى كەزدەسۋى بولادى. ودان كەيىن مۇنداي كەزدەسۋ ىرعاقتى ءوتىپ تۇرادى, ويتكەنى, وبلىستاعى ماڭىزدى ماسەلەلەردىڭ بارلىعى الدىمەن قوعامدىق كەڭەس مۇشەلەرىمەن اقىلداسىپ, شەشىلەدى.
– بۇل ەلىمىزدە دەموكراتيانى دامىتۋداعى ماڭىزدى قادام دەر ەدىم. قوعامدىق كەڭەس جاريالىلىق, مولدىرلىك ۇستانىمىندا جۇمىس ىستەيتىن. ول حالىق پەن اتقارۋشى بيلىك اراسىن جاقىنداتا تۇسەدى, – دەيدى وبلىستىق ءماسليحاتتىڭ حاتشىسى سايلاۋبەك ەسجانوۆ.
جەرگىلىكتى اتقارۋشى بيلىكتىڭ حالىق الدىنداعى جاۋاپكەرشىلىگىن ءوز ەركىمەن قوعامدىق كەڭەسكە كىرگەن ونىڭ ءاربىر مۇشەسى تەڭ بولىسەتىن بولادى.
ءنازيرا جارىمبەتوۆا,
«ەگەمەن قازاقستان».
قوستاناي.