قازاقستان وقۋشىلارى ەۋروپانىڭ جاڭا ءبىلىم بايگەسىندە توپ جارىپ, ەل مەرەيىن اسقاقتاتتى. 23-29 ءساۋىر ارالىعىندا ليتۆا رەسپۋبليكاسىنىڭ ۆيلنيۋس قالاسىندا العاش رەت وتكەن European Mathematical Olympiad حالىقارالىق دوداسىندا ۇلتتىق قۇراما كوماندالىق ەسەپتە 1-ورىن يەلەندى. بەدەلدى ءبىلىم سايىسىنا 19 ەلدەن 21 كوماندا, جالپى 126 وقۋشى قاتىسقان, دەپ جازادى Egemen.kz.
اۋقىمدى وليمپياداعا البانيا, ارمەنيا, بولگاريا, ەستونيا, فينليانديا, فرانتسيا, گرۋزيا, يسلانديا, يرلانديا, قازاقستان, كوسوۆو, لاتۆيا, ليتۆا, سولتۇستىك ماكەدونيا, نورۆەگيا, پولشا, سلوۆەنيا, شۆەيتساريا جانە ۋكراينا ەلدەرىنىڭ دارىندى جاستارى جينالدى. وسىنداي تارتىستى باسەكەدە قازاقستان قۇراماسى 3 التىن جانە 2 كۇمىس مەدال جەڭىپ الىپ, ايقىن باسىمدىق تانىتتى.
بۇل ناتيجە – ەلىمىزدىڭ ءبىلىم بەرۋ جۇيەسىنىڭ ساپاسى مەن جاس بۋىننىڭ زياتكەرلىك الەۋەتىنىڭ جوعارى ەكەنىن كورسەتەتىن ماڭىزدى جەتىستىك. حالىقارالىق دەڭگەيدەگى بۇل جەڭىس قازاقستان وقۋشىلارىنىڭ ماتەماتيكالىق دايارلىعى مىقتى ەكەنىن تاعى ءبىر مارتە ايعاقتادى.
روبوتوتەحنيكا دوداسى: قازاقستان وقۋشىلارى ەكى بىردەي باستى ماراپاتقا يە بولدى
جەكەلەي سىندا ابسوليۋت جەڭىمپاز اتانعان – استانا قالاسىنداعى Spectrum International School-دىڭ 12-سىنىپ وقۋشىسى مارعۇلان شارەل. سونداي-اق التىن مەدالدى الماتى قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى ەلدار ۋسەنوۆ پەن Haileybury مەكتەبىنىڭ 11-سىنىپ وقۋشىسى ەريك ليم يەلەندى.
كۇمىس جۇلدەنى Nurorda مەكتەبىنىڭ 11-سىنىپ وقۋشىسى ەراسىل التىنبەك پەن وسى ءبىلىم ورداسىنىڭ 10-سىنىپ وقۋشىسى انۋار اعىباەۆ قانجىعاسىنا بايلادى.
قازاقستاندىق وقۋشى سينگاپۋردا وتكەن روبوتوتەحنيكا چەمپيوناتىندا كۇمىس جۇلدە يەلەندى
ۇلتتىق قۇرامانى جارىسقا دايىنداعان جەتەكشىلەر – قازاقستان-بريتان تەحنيكالىق ۋنيۆەرسيتەتىنىڭ 4-كۋرس ستۋدەنتى ياروسلاۆ گالبەرگ جانە الماتى قالاسىنداعى №165 مامانداندىرىلعان ليتسەيىنىڭ ماتەماتيكا ءپانى مۇعالىمى اسحات ابدىكۋلوۆ.