وڭتۇستىك كورەيانىڭ بۇرىنعى ءبىرىنشى حانىمى كيم گون حي اپەللياتسيالىق سوت ۇكىمىمەن 4 جىلعا باس بوستاندىعىنان ايىرىلدى. سوت ونى اكتسيا باعاسىن قولدان كوتەرۋ جانە پارا الۋ ءىسى بويىنشا كىنالى دەپ تانىدى, دەپ جازادى Egemen.kz.
سەۋلدە وتكەن سوت وتىرىسىندا اپەللياتسيالىق القا كيمنىڭ از ساۋدالاناتىن اكتسيالاردىڭ باعاسىن بىرنەشە ترەيدەرمەن بىرگە جاساندى تۇردە وسىرۋگە قاتىسقانىن انىقتادى. وسىلايشا, تومەنگى سوتتىڭ ونى بۇل ايىپ بويىنشا اقتاعان شەشىمى كۇشىن جويدى.
سونداي-اق سوت كيمنىڭ ءدىني ۇيىمنان جالپى قۇنى شامامەن 80 ملن ۆون (54 257 دوللار) بولاتىن ەكى Chanel سومكەسى مەن Graff القاسىن قابىلداعانىن دالەلدەدى. تەرگەۋ دەرەگىنشە, شىركەۋ بۇل سىيلىقتاردى شەتەلدەگى بيزنەسىنە ساياسي قولداۋ الۋ ماقساتىندا ۇسىنعان.
سوت توراعاسى ۇكىمدى جاريالاي وتىرىپ: «كيم ءبىرىنشى حانىم رەتىندەگى ىقپالىن پايدالانىپ, پارا الدى. ول مەملەكەتتىك باسقارۋدىڭ اشىقتىعىنا دەگەن سەنىمدى السىرەتىپ, قوعامدا جىك تۋدىردى», دەدى.
سونىمەن قاتار سوت 70 ملن ۆون ايىپپۇل سالىپ, القانى تاركىلەۋ تۋرالى شەشىم شىعاردى.
وڭتۇستىك كورەيادا بولعان ميتينگتە ءبىر ادام مەرت بولدى
ايتا كەتەيىك, كيم بۇعان دەيىن قاڭتار ايىندا پارا الۋ بويىنشا 20 ايعا سوتتالعان, الايدا وزگە ايىپتاردان اقتالعان ەدى. اپەللياتسيالىق سوت ونىڭ سايلاۋ زاڭىن بۇزباعانى تۋرالى شەشىمدى وزگەرىسسىز قالدىردى.
كيم 2024 جىلعى تامىزدان بەرى قاماۋدا وتىر. ول وزىنە تاعىلعان ايىپتاردىڭ بارلىعىن جوققا شىعارىپ, ادۆوكاتتارى بۇل ۇكىمگە جوعارعى سوتقا شاعىم تۇسىرەتىنىن مالىمدەدى.
وڭتۇستىك كورەيانىڭ ەكس-پرەزيدەنتى ءومىر بويىنا باس بوستاندىعىنان ايىرىلدى
بۇل ءىس بۇرىنعى پرەزيدەنت يۋن سوك ءيولدىڭ 2024 جىلى قىسقا مەرزىمگە اسكەري جاعداي ەنگىزۋىنەن كەيىن تۋىنداعان جانجالدارمەن بايلانىستى. بيلىكتەن شەتتەتىلگەن يۋن بيىل اقپاندا ب ۇلىك ۇيىمداستىردى دەگەن ايىپپەن ءومىر بويىنا باس بوستاندىعىنان ايىرىلعان. ونىڭ بىرنەشە سەرىگى دە سوت الدىندا جاۋاپ بەرىپ جاتىر. ال بۇرىنعى پرەمەر-مينيستر حان دوك سۋ يۋننىڭ جوسپارىنا كوز جۇما قارادى دەپ تانىلىپ, 23 جىلعا سوتتالدى.