جىل سايىن 28 ساۋىردە اتاپ وتىلەتىن دۇنيەجۇزىلىك ەڭبەكتى قورعاۋ كۇنى جۇمىسكەرلەردىڭ قۇقىقتارىن قورعاۋ مەن قاۋىپسىز ەڭبەك جاعدايلارىن قامتاماسىز ەتۋگە نازار اۋدارۋدى كوزدەيدى. قازاقستاندا وندىرىستىك جاراقاتتانۋ دەڭگەيى تومەندەپ كەلەدى. سوڭعى بەس جىلدا وندىرىستە زارداپ شەككەندەر سانى 8,3%-عا ازايعان. بۇل – ەڭبەك قاۋىپسىزدىگىن كۇشەيتۋ باعىتىندا قابىلدانعان جۇيەلى شارالاردىڭ ناتيجەسى, دەپ جازادى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ەلىمىزدە جىل سايىن وندىرىستە 1 000-نان استام جازاتايىم وقيعا تىركەلەدى, ونىڭ شامامەن 200-ءى قايعىلى جاعدايمەن اياقتالادى. سالالار ىشىندە ەڭ جوعارى كورسەتكىش تاۋ-كەن مەتاللۋرگيا كەشەنىنە تيەسىلى – 17-18%, ال قۇرىلىس سالاسىندا 10-12% دەڭگەيىندە.
اقسۋ فەرروقورىتپا زاۋىتىندا جۇمىسشى قازا تاپتى
قازىرگى تاڭدا شامامەن 500 مىڭعا جۋىق ادام زياندى جانە قاۋىپتى جاعدايدا ەڭبەك ەتەدى, 100 مىڭنان استامى اۋىر دەنە ەڭبەگىمەن اينالىسادى. جىل سايىن 650-700 مىڭعا جۋىق جۇمىسكەرگە وسىنداي ەڭبەك جاعدايى ءۇشىن وتەماقى تولەنەدى.
قاۋىپسىز ەڭبەك جاعدايلارىن قامتاماسىز ەتۋ ءۇشىن 3 000-نان استام كاسىپورىندا ەڭبەكتى قورعاۋ ستاندارتتارى ەنگىزىلگەن. 2019 جىلدان بەرى «نولدىك جاراقاتتانۋ» (Vision Zero) تۇجىرىمداماسىنا 600-دەن استام كاسىپورىن قوسىلدى. سونداي-اق 300-دەن استام كاسىپورىندا قاۋىپسىزدىكتى باقىلاۋدىڭ مودەلى ەنگىزىلدى.
پاۆلوداردا جەر وپىرىلىپ, ەكى جۇمىسشى قازا تاپتى
جۇمىسكەرلەردى الەۋمەتتىك قورعاۋ ماقساتىندا 2024 جىلعى 1 قاڭتاردان باستاپ ارنايى الەۋمەتتىك تولەم قاراستىرىلعان. ونى 55 جاسقا تولعان جانە كەمىندە 7 جىل كاسىپتىك زەينەتاقى جارنالارى تولەنگەن ازاماتتار الا الادى.
ەلىمىزدە 2030 جىلعا دەيىنگى قاۋىپسىز ەڭبەك تۇجىرىمداماسى جۇزەگە اسىرىلىپ جاتىر. ونىڭ اياسىندا كاسىپورىنداردىڭ تسيفرلىق كارتاسى مەن ەڭبەك تاۋەكەلدەرىنىڭ تسيفرلىق كارتاسى ىسكە قوسىلىپ, ەڭبەك قاۋىپسىزدىگىن ناقتى ۋاقىت رەجيمىندە باقىلاۋعا مۇمكىندىك بەرىلدى. سونىمەن قاتار جاساندى ينتەللەكتكە نەگىزدەلگەن قۇرالدار ەنگىزىلىپ, تاۋەكەلدەردى الدىن الا انىقتاۋ جۇيەسى دامىپ كەلەدى.
ورلوۆ شاحتاسىندا جۇمىسشى قازا تاپتى