قازاقستاندا ۇيالى بايلانىس قۇرىلعىلارىن ۆەريفيكاتسيالاۋ پروتسەسىن مەملەكەتتىك كومپانياعا بەرۋ جوسپارلانىپ وتىر. ءتيىستى نورماتيۆتىك وزگەرىستەر قازىرگى ۋاقىتتا ءماجىلىس قاراۋىندا. بۇل تۋرالى جاساندى ينتەللەكت جانە تسيفرلىق دامۋ ءبىرىنشى ۆيتسە-ءمينيسترى روستيسلاۆ كونياشكين مالىمدەدى, دەپ حابارلايدى Egemen.kz.
بۇعان دەيىن سمارتفونداردى تىركەۋ قىزمەتىن «ATS Mediafon KZ» جەكە كومپانياسى اتقارىپ كەلگەن بولاتىن. ءتىپتى 2025 جىلدىڭ ماۋسىم ايىندا مينيسترلىك بۇل نارىققا بىرنەشە كوممەرتسيالىق ۇيىمدى تارتۋدى جوسپارلاعان ەدى. الايدا ۇكىمەت دەڭگەيىندە بۇل سالانى مەملەكەتتىك مونوپولياعا وتكىزۋ تۋرالى شەشىم قابىلداندى.
روستيسلاۆ كونياشكيننىڭ ايتۋىنشا, بۇل قىزمەتتى مەملەكەتتىك ۇيىمنىڭ قۇزىرىنا بەرۋ ماسەلەسى جان-جاقتى تالقىلانعان.
«نورماتيۆتىك وزگەرىستەر ماجىلىستە قارالىپ جاتىر. ەگەر ولار ماقۇلدانسا, بۇل جۇمىسپەن مەملەكەتتىك كومپانيا اينالىسادى», دەدى ۆيتسە-مينيستر ۇكىمەتتە وتكەن بريفينگتە.
اسكەردە تەلەفون قولدانۋ ءتارتىبى جەڭىلدەيدى
2025 جىلى مينيسترلىك بۇل پروتسەستى بيزنەسكە بەرۋدى «ۇتىمدى» دەپ ساناعان بولاتىن. ول كەزدە بيۋدجەت قاراجاتىن ۇنەمدەۋ جانە مەحانيزمدى جەدەل ەنگىزۋ ماقساتى العا قويىلعان ەدى. بىراق ۆەريفيكاتسيا جۇيەسى ەنگىزىلگەننەن بەرى قازاقستاندىقتار تاراپىنان كوپتەگەن ارىز-شاعىمدار ءتۇستى:
شەتەلدەن اكەلىنگەن قۇرىلعىلاردى تىركەۋ كەزىندەگى كەدەرگىلەر; اسىرەسە رەسەي, قىرعىزستان جانە وزبەكستاننان كەلگەن سمارتفونداردى ۆەريفيكاتسيالاۋداعى تەحنيكالىق قيىندىقتار.ەندى بۇل ماسەلەلەر مەملەكەتتىك باقىلاۋ ارقىلى شەشىلەدى دەپ كۇتىلەدى. زاڭنامالىق وزگەرىستەر قابىلدانعان جاعدايدا, تىركەۋ پروتسەسىنىڭ اشىقتىعى مەن ساپاسى مەملەكەتتىڭ تىكەلەي جاۋاپكەرشىلىگىندە بولادى.