اقپاننىڭ 5-ىنەن 6-سىنا قاراعان ءتۇنى قىتاي – يران جۇك كونتەينەرلىك پويىزى الماتى وبلىسى, الاكول اۋدانىندا ورنالاسقان «قازاقستان تەمىر جولى» اكتسيونەرلىك قوعامى» ۇلتتىق كومپانياسىنىڭ «دوستىق» فيليالى ستانساسىنىڭ شەكارالىق وتكەلى ارقىلى ءوتتى. بۇل – جوعارىدا اتالعان ەكى ەل اراسىنا قازاقستان اۋماعى ارقىلى ءبىرىنشى بولىپ وتكەن حالىقارالىق پويىز. ول 41 كونتەينەرلىك ۆاگوننان تۇرادى.
«بۇل پويىز ءبىزدىڭ ستانسادا نەبارى 5 ساعات قانا ايالداعاندىقتان, قىسقا مەرزىمدىك بولىپ سانالادى. جالپى, قازاقستان اۋماعى ارقىلى قىتاي حالىق رەسپۋبليكاسىنان ەۋروپاعا 2014 جىلى 225 كونتەينەرلىك ۆاگون, 2015 جىلى 448 كونتەينەرلىك ۆاگون وتكەن ەدى. سونىمەن قاتار, بىلتىر قىتايدان گرۋزياعا – 2, ازەربايجانعا – 1, تۇرىكمەنستان – 2, تۇركياعا 1 كونتەينەرلىك جۇك ۆاگوندارى تىركەلگەن پويىزدار ءوتتى. مۇنىڭ بارلىعى قازاقستانداعى تىنىشتىق پەن بەيبىت ءومىردىڭ كورىنىسى دەپ سانايمىز. جۇمىس جەتىستىگىن سالىستىرمالى تۇردە الساق, بىلتىر قاڭتار ايىندا قىتايدان ەۋروپاعا 20 كونتەينەرلىك جۇك پويىزى وتسە, بيىل ول كورسەتكىش ءوسىپ, 30 كونتەينەرلىك جۇك پويىزى ءوتتى», دەدى «قازاقستان تەمىر جولى» اق» ۇك «دوستىق» فيليالىنىڭ ديرەكتورى نۇرعالي ءىلياسوۆ.
نۇربول الدىباەۆ,
«ەگەمەن قازاقستان».
الماتى وبلىسى,
الاكول اۋدانى.