قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الماتى ءبولىمشەسىندە «زاڭگەرلەر ءادىل سايلاۋ ءۇشىن» رەسپۋبليكالىق قوعامدىق بىرلەستىگىنىڭ وكىلدەرى ەلىمىزدە ناۋرىز ايىندا وتەتىن سايلاۋعا قاتىستى وزدەرىنىڭ جاڭا ايماقتىق فيليالىن اشقاندىعىن مالىمدەدى.
اتالعان قوعامدىق بىرلەستىكتىڭ توراعاسى, د.قوناەۆ اتىنداعى ەۋرازيالىق زاڭ اكادەمياسىنىڭ رەكتورى ءومىرالى قوپاباەۆ جۋىردا استانا قالاسىندا پارلامەنت ءماجىلىسىنىڭ جانە جەرگىلىكتى ءماسليxاتتاردىڭ سايلاۋلارىنا بايلانىستى قازاقستاندا سايلاۋ بارىسىن بايقاۋ جونىندەگى رەسپۋبليكالىق كوميسسيا ءوز جۇمىسىن باستاعانىن جانە وعان ەلىمىزگە تانىمال ساياساتكەرلەر, ساراپشىلار, جۋرناليستەر مەن ۇكىمەتتىك ەمەس ۇيىمدار وكىلدەرى قاتىستىرىلىپ وتىرعانىن مالىمدەدى.
– سايلاۋدىڭ اشىق ءارى زاڭ تالابىنا ساي ءوتۋىن قامتاماسىز ەتەتىن كوميسسيانىڭ باستى ماقساتى – سايلاۋدى بايقاۋ. مىندەتىمىز – سايلاۋشىلارمەن سويلەسىپ, ولاردى ساياسي ناۋقانعا دايىنداۋ. ءبىز xالىقپەن عانا ەمەس, شەتەلدەن كەلگەن بايقاۋشىلارمەن, ءاربىر پارتيا وكىلىمەن جۇمىس ىستەيتىن بولامىز. بۇل كوميسسيانىڭ قۇرامىنا ەلگە بەلگىلى ازاماتتار كىرگەن, – دەي كەلە, ءومىرالى قاجىباي ۇلى ءوزى توراعالىق ەتەتىن قوعامدىق بىرلەستىكتىڭ جاڭا فيليالى تۋرالى دا مالىمەت بەرىپ, ونىڭ اتقاراتىن مىندەتتەرىن جۋرناليستەرگە تانىستىرىپ ءوتتى.
«زاڭگەرلەر ءادىل سايلاۋ ءۇشىن» رەسپۋبليكالىق قوعامدىق بىرلەستىگىنىڭ الماتى قالاسىندا جانە وبلىسىندا اشىلعان سايلاۋالدى شتابتارى تاۋلىك بويى جۇمىس ىستەيدى جانە بايقاۋشىلار سايلاۋشىلاردىڭ مىندەتتەرى مەن قۇقىقتارى تۋرالى مالىمەت بەرىپ, زاڭ اياسىندا سايلاۋدىڭ دەموكراتيالىق تالاپتارعا ساي ءوتۋىن قامتاماسىز ەتەدى.
قانات ەسكەندىر,
«ەگەمەن قازاقستان».
الماتى.