قوستاناي. 26 قاڭتار. قوستاناي وبلىسىنىڭ اكىمى ارحيمەد مۇحامبەتوۆ «قازپوشتا» اكتسيونەرلىك قوعامىنىڭ سەگىز اۋدانداعى بولىمشەلەرىنە كولىك كىلتىن تابىس ەتتى. بۇل تۋرالى egemen.kz ءتىلشىسى حابارلادى.
پوشتانىڭ حالىققا كورسەتەتىن قىزمەتى قاشان دا ماڭىزدى بولىپ كەلدى. بۇل كۇندە ونىڭ وزەكتىلىگى بۇرىنعىدان دا ارتا تۇسكەن دەسەك بولادى. وبلىستاعى ءالى ينتەرنەت جەتە قويماعان ەلدى مەكەندەرگە پوشتا كۇندەلىكتى حات-حابار, مەرزىمدى باسىلىمدارمەن قاتار, جۇرتشىلىقتىڭ جاردەماقىسىن, قارتتاردىڭ زەينەتاقىسىن جانە مەملەكەتتىك ورگاندار ءۇشىن رەسمي قۇجاتتاردى دا جەتكىزىپ بەرەدى. سوندىقتان ۋاقىت تالابىنا ساي جۇمىس ىستەۋ ءۇشىن پوشتا بولىمشەلەرىنە زاماناۋي كولىكتەردىڭ قاجەتتىگى ءبىلىنىپ وتىر. كەشە وبلىس اكىمى ارحيمەد مۇحامبەتوۆ «قازپوشتا» اكتسيونەرلىك قوعامى وبلىستىق فيليالىنىڭ سەگىز اۋدانداعى بولىمشەلەرىنە جۇردەك كولىك كىلتىن تابىس ەتتى.
وبلىس اكىمى ارحيمەد مۇحامبەتوۆ: «بۇگىنگى شارا حالىققا ەڭ قاجەت قىزمەتتى جاقسارتۋ ءۇشىن جاسالىپ وتىر. وبلىستا 1300 ادام حالىققا پوشتالىق, قارجىلىق, اگەنتتىك قىزمەت كورسەتەدى. بۇگىنگە دەيىن ولارعا 93 اۆتوكولىك تابىس ەتىلسە, بۇگىن 22 ماشينا سولاردىڭ قاتارىنا قوسىلىپ وتىر. ولار اۋداندارعا, قالالارعا 110 مىڭ دانا مەرزىمدى باسىلىمداردى, 150 مىڭ ادام الاتىن جاردەماقى مەن زەينەتاقىلاردى ۋاقىتىسىندا جەتكىزۋدى قامتاماسىز ەتەدى», – دەدى.
مەڭدىعارا اۋداندىق پوشتا بولىمشەسىنىڭ باسشىسى الماگۇل قايىپجانوۆا: «قازىر ءبىزدىڭ بولىمشە مەڭدىعارا جانە ۇزىنكول اۋداندارىنداعى ەلدى مەكەندەرگە قىزمەت كورسەتەدى. اۋىلدار كەرىك, الىس ورنالاسقان. جول قاتىناسى قيىن. ال مىنا كولىكتەر جول قيىندىعىن جەڭىلدەتە تۇسەدى», – دەدى. «قازپوشتا» اكتسيونەرلىك قوعامى قوستاناي وبلىستىق فيليالى باسشىسىنىڭ مىندەتىن اتقارۋشى شىنداۋلەت مولداحمەتوۆتىڭ ايتۋىنا قاراعاندا, جانگەلدين, امانگەلدى, قامىستى سەكىلدى تىم شالعاي اۋداندارعا بۇرىن 7-8 كۇندە ءبىر رەت جەتكىزىلەتىن پوشتا قازىر ءۇش كۇنگە دەيىن قىسقارتىلعان. پوشتا قىزمەتكەرلەرى مىنەتىن Ivego كولىگى قوستانايدا قۇراستىرىلعان.
ءنازيرا جارىمبەتوۆا.
دەرەك, سۋرەت: egemen.kz.