ەلىمىزدە 103 سۋارۋ كانالى اۆتوماتتاندىرىلىپ, 60 مىڭ گەكتاردان استام اۋىل شارۋاشىلىعى جەرلەرىن سۋمەن قامتاماسىز ەتۋ جوسپارلانىپ وتىر, دەپ حابارلايدى Egemen.kz.
بۇل تۋرالى ەكولوگيالىق تەحنولوگيالار سالاسىندا جۇمىس ىستەيتىن قىتايلىق كومپانيانىڭ ۆيتسە-پرەزيدەنتى دجەنني ۆان Jibek Joly ارناسىنا بەرگەن سۇحباتىندا مالىمدەدى.
جوبا اياسىندا بۇرىن جاڭعىرتىلعان 270 سۋ نىسانىنا دا تسيفرلىق تەحنولوگيالار ەنگىزىلۋدە. بۇل سۋ رەسۋرستارىن ءتيىمدى باسقارۋعا جانە اۋىل شارۋاشىلىعىنداعى شىعىندى ازايتۋعا مۇمكىندىك بەرەدى.
وڭتۇستىك وڭىرلەردە 65 مىڭ گەكتار جەردى سۋاراتىن كانالدار تسيفرلاندىرىلادى
مامانداردىڭ باعالاۋىنشا, الداعى ءتورت جىل ىشىندە بۇل باستاما 1 ميلليون گەكتاردان استام جەردى سۋ ۇنەمدەۋ تەحنولوگيالارىمەن قامتۋعا جاعداي جاسايدى. سونىمەن قاتار جىلىنا شامامەن 2 ملرد تەكشە مەتر سۋ ۇنەمدەلەدى دەپ كۇتىلۋدە.
قازاقستان ۇكىمەتى ەكولوگيا جانە سۋ رەسۋرستارىن ۇنەمدەۋ ماسەلەسىنە ەرەكشە كوڭىل ءبولىپ وتىر. ساراپشىلاردىڭ ايتۋىنشا, مۇنداي جوبالار اۋىل شارۋاشىلىعىنىڭ تۇراقتى دامۋىنا جانە سۋ تاپشىلىعىن ازايتۋعا ىقپال ەتەدى.