قازاقستان تمد ەلدەرى اراسىندا ازاماتتاردىڭ ورتاشا ايلىق تابىس دەڭگەيى بويىنشا كوشباسشىلار قاتارىنا ەندى. ال الەمدىك رەيتينگتە 197 ەلدىڭ ىشىندە 77-ورىنعا جايعاستى, دەپ حابارلايدى Egemen.kz.
CEOWORLD حالىقارالىق ونلاين-اناليتيكالىق پورتالدىڭ زەرتتەۋىنە سايكەس, ەلىمىز تمد ەلدەرىنىڭ ءبىرشاماسىن, سونداي-اق ءۇندىستان, گرۋزيا, مولدوۆا, ۋكراينا, يندونەزيا مەن تۇركيا سياقتى مەملەكەتتەردى باسىپ وزعان.
اتالعان رەيتينگ ەسەپتەۋلەرىندە بارلىق سالىقتار مەن مىندەتتى تولەمدەر ۇستالعاننان كەيىنگى ورتاشا جالاقى دەڭگەيى نەگىزگە الىنعان.
زەرتتەۋ ناتيجەسىندە ەڭ جوعارى ورتاشا ايلىق جالاقى شۆەيتساريادا تىركەلگەن. وندا بۇل كورسەتكىش 8 218 دوللاردى قۇراعان. ودان كەيىن ليۋكسەمبۋرگ پەن اقش ورنالاسقان.
سونداي-اق العاشقى وندىققا يسلانديا, نورۆەگيا, دانيا, كانادا, يرلانديا, نيدەرلاند جانە سينگاپۋر كىرگەن.
قازاقستاندا قانداي اسكەري قىزمەتشىلەرگە ءۇش ەسە جالاقى بەرىلەدى؟
ال تمد ەلدەرى ىشىندە ءبىرىنشى ورىندى رەسەي يەلەنىپ, الەمدىك رەيتينگتە 32-ورىنعا تۇراقتاعان. مۇندا ورتاشا جالاقى كولەمى 2 266 دوللاردى قۇراعان. قازاقستان بۇل كورسەتكىش بويىنشا ەكىنشى ورىندا تۇر. ەلىمىزدىڭ ورتاشا تازا ايلىق تابىس 780 دوللار دەڭگەيىندە كورسەتىلگەن. ودان كەيىن بەلارۋس, ارمەنيا, ازەربايجان, وزبەكستان, قىرعىزستان مەن تاجىكستان ورنالاسقان.
زەرتتەۋ بويىنشا ەڭ تومەن ورتاشا جالاقى پالەستينادا تىركەلگەن. سونداي-اق لەسوتو, انگولا, مالاۆي مەن مالي, سولتۇستىك كورەيا ەلدەرىندە دە تابىس دەڭگەيى تومەن ەكەنى بايقالعان.
ەسكە سالا كەتەيىك, بۇعان دەيىن ۇلتتىق ەكونوميكا ءمينيسترىنىڭ ءبىرىنشى ورىنباسارى ازامات ءامرين ءۇش جىلدا ەلىمىزدە بيۋدجەت سالاسىنداعى 1,2 ملن ازاماتتىڭ جالاقىسى وسكەندىگىن مالىمدەگەن ەدى.