استانا. 19 قاڭتار. قازاقستاندىق فريستايلشى يۋليا گالىشەۆا الەم كۋبوگىنا دايىندالىپ جاتىر. بۇل تۋرالى egemen.kz ءتىلشىسى حابارالدى.
يۋليا گالىشەۆا 5 قاڭتاردان بەرى اقش-تىڭ ۆەرمونت شتاتى كيللينگتون قالاسىندا ءوتىپ جاتقان وقۋ-جاتتىعۋ جيىنىنا قاتىسۋدا. وسى جەردەن ول كانادانىڭ ۆال سەنت-كوم قالاسىندا فريستايلدان وتەتىن الەم كۋبوگىنىڭ كەزەكتى كەزەڭىنە بارادى. جارىس 23 قاڭتاردا وتەدى.
وقۋ-جاتتىعۋ جيىنىنا قازاقستان سپورتشىلارىنان باسقا جاپونيا, رەسەي, گەرمانيانىڭ فريستايلشىلارى دا قاتىسۋدا.
كيللينگتون قالاسىندا تاۋ شاڭعىسى كۋرورتى ورنالاسقان. ول دۇنيەجۇزىندەگى تاۋ شاڭعى سپورتىنا قولايلى جاقسى جەرلەردىڭ ءبىرى بولىپ سانالادى. بۇل جەردە الەمنىڭ ءار تۇكپىرىنەن كەلگەن سپورتشىلار جىل ون ەكى اي دايىندالىپ, Killington Mountain School سپورت مەكتەبىندە سنوۋبورد, فريستايل, تاۋ شاڭعىسى مەن تەلەمارك سپورت تۇرلەرىنەن وقۋ-جاتتىعۋ جيىندارىن وتكىزەدى.
وسىعان دەيىن فريستايلدان الەم كۋبوگىنىڭ العاشقى كەزەڭى عانا ءوتتى. ول بىلتىر 13 جەلتوقساندا فينليانديانىڭ رۋكا قالاسىندا بولدى. ال ەكىنشى كەزەڭ 14-16 قاڭتار ارالىعىندا اقش-تىڭ لەيك-پلەسيد قالاسىندا ءوتۋى ءتيىس بولاتىن. الايدا, قاردىڭ بولماۋىنان جارىس كەيىنگە شەگەرىلدى. ەندى يۋليا گالىشەۆا كانادادا وتەتىن جارىسقا قاتىسىپ, ودان كەيىن وسى ەلدىڭ كالگاري قالاسىندا جالاۋى جەلبىرەيتىن تاعى ءبىر باسەكەدە باق سىناسادى. كالگاريدەگى جارىس 30 قاڭتاردا وتەدى. سودان كەيىن 4-6 اقپان ارالىعىندا اقش-تىڭ دير ۆاللەي قالاسىندا وتەتىن كەزەڭگە قاتىسادى. گالىشەۆا اقپان-ناۋرىز ايلارىندا جاپونيا مەن رەسەيدە بولاتىن جارىستارعا دا قاتىسامىن دەپ وتىر.
داستان كەنجالين.
دەرەك, سۋرەت: egemen.kz