پرەزيدەنت جانىنداعى ورتالىق كوممۋنيكاتسيالار قىزمەتىنىڭ الماتىداعى وكىلدىگىندە مەملەكەت باسشىسىنىڭ «ۇلت جوسپارى – قازاقستاندىق ارمانعا باستايتىن جول» اتتى ماقالاسىندا ايتىلعان وزەكتى ماسەلەلەرگە قاتىستى وتاندىق ساراپشىلار ءباسپاسوز بريفينگىن وتكىزدى.
بۇقارالىق اقپارات قۇرالدارى وكىلدەرىمەن بولعان كەزدەسۋگە پرەزيدەنت جانىنداعى ستراتەگيالىق زەرتتەۋلەر ينستيتۋتىنىڭ الماتىداعى وكىلدىگىنىڭ جەتەكشىسى, ساياسي عىلىمدار كانديداتى ءمادينا نۇرعاليەۆا مەن فيلوسوفيا, ساياساتتانۋ جانە ءدىنتانۋ ينستيتۋتى ديرەكتورىنىڭ عىلىمي جۇمىستار جونىندەگى ورىنباسارى, فيلوسوفيا عىلىمدارىنىڭ دوكتورى, پروفەسسور سەرىك نۇرمۇراتوۆ قاتىستى.
مەملەكەتتىڭ دامۋى جانە قوعامنىڭ رۋحاني-مادەني ىلگەرى باسۋى ءۇشىن ۇرپاق تاربيەسى مەن قوعامدى رۋحاني ساۋاتتاندىرۋدىڭ ماڭىزدى ەكەنىن اتاپ وتكەن س.نۇرمۇراتوۆ قازاق حالقىنا ۇلتتىق يدەيانىڭ اۋاداي قاجەت ەكەندىگىنە توقتالىپ, الەمنىڭ وركەنيەتتى ەلدەردىڭ ساياسي-رۋحاني دامۋ تەحنولوگيالارىنان كوپتەگەن مىسالدار كەلتىردى.
– ەلباسى نۇرسۇلتان نازارباەۆ جۋىردا جاريالاعان «ۇلت جوسپارى – قازاقستاندىق ارمانعا باستايتىن جول» اتتى باعدارلاماسىندا ءوزىنىڭ بۇدان بۇرىنعى جولداۋىندا ايتىلعان نەگىزگى ويلارىن تەرەڭىرەك قوزعاپ, ەلىمىزدىڭ ستراتەگيالىق ماڭىزدى باعىتىن اشىپ بەردى. جولداۋدا ۇسىنىلعان ماڭىزدى 5 رەفورما تىكەلەي ءومىرىمىزدىڭ ءاربىر سالاسىنا اسا قاجەتتى تۇجىرىمدار ەكەندىگى ناقتى كورىنىس تاپقان.
الەمدى جايلاعان داعدارىستىڭ ىقپالىندا ءتۇرلى ۇدەرىستەر ءجۇرىپ جاتىر. ەكونوميكا, ساياسات, ءدىن ءماسەلەسىندە تۋىنداعان تۇسىنىسپەۋشىلىكتەردەن قازاقستان قوعامىن ساقتاپ قالۋ ءۇشىن تىڭ يدەيالار, دامۋ تەتىگى كەرەك بولدى. مىنە, مەملەكەت باسشىسى وسىنداي ادامزاتتىڭ دامۋىنا وراسان زور ىقپال ەتەتىن يدەيانى «ۇلت جوسپارى» دەگەن ۇعىمنىڭ ىشىنە سىيدىرىپ وتىر, – دەدى پروفەسسور سەرىك نۇرمۇراتوۆ.
ۇلتتىق قۇندىلىقتاردى ءوركەنيەتتىك قۇندىلىقتارمەن قاتار دامىتا وتىرىپ, قوعامنىڭ ساياسي, قۇقىقتىق ساۋاتىن ارتتىرۋعا ەرەكشە ءمان بەرىلۋ جۇمىسى ەلىمىزدە دۇرىس جولعا قويىلىپ وتىرعاندىعىن ءسوز ەتكەن ستراتەگيالىق زەرتتەۋلەر ينستيتۋتىنىڭ الماتىداعى وكىلدىگىنىڭ جەتەكشىسى م.نۇرعاليەۆا جۋرناليستەر مەن ەلىمىزدىڭ وزگە وڭىرلەرىنەن تىكەلەي ەفيردە قويىلعان سۇراقتارعا ەكونوميكالىق جانە قۇقىقتىق ءماسەلەلەر ورايىندا جاۋاپ بەرىپ وتىردى.
– ەلباسى ۇسىنعان يدەيالاردا ءبىزدىڭ قوعامعا اسا قاجەتتى ينستيتۋتتىق جۇيەلەردى جاڭعىرتۋ تالابى العا قويىلعان. وسىنىڭ ىشىندە قازاقستاندىق قوعام ءۇشىن جاۋاپكەرشىلىگى جوعارى سالانىڭ ءبىرى – سوت جۇيەسى. سوت جۇيەسىنە قوعامعا پايدالى وزگەرىستەر ەنگىزە وتىرىپ, ونىڭ قۇرامىندا كەزدەسەتىن سوت ءىسىن جۇرگىزۋشى ماماندار بىلىكتىلىگىن سارالاۋ, سىبايلاستىق كورىنىس تاباتىن تۇستاردى بولدىرماۋ, ماماندىققا ساي سۇرانىستىڭ ازدىعى سەكىلدى كەمشىلىكتەردى بولدىرماۋ. مىنە, مەملەكەت باسشىسىنىڭ حالىققا ۇسىنعان يدەياسىندا ۇلت دامۋىن ىلگەرى باستىراتىن اسا ماڭىزدى ستراتەگيالىق قادامدار ناقتى قامتىلىپ وتىر. وسىعان وراي بۇدان بىلايعى جەردە سوت جۇيەسىنە ماماندار تارتۋ جۇمىسى قاتاڭ تالاپتارعا ساي جۇرگىزىلەتىن بولادى. سونىمەن قاتار, قۇقىق قورعاۋ سالاسىنا دا جاعىمدى وزگەرىستەر ەنگىزىلۋدە. اتاپ ايتساق, جەرگىلىكتى پوليتسيا قىزمەتىن جانداندىرۋ ماسەلەسى دە بۇگىنگى تاڭدا قوعام دامۋى ءۇشىن ماڭىزدى ءرول اتقاراتىن الەۋمەتتىك-ساياسي قۇرال. بۇل ەكى ينستيتۋتتىق جۇيە قوعامنىڭ قۇقىق قورعاۋ سالاسىنا دەگەن سەنىمىن ارتتىرىپ, ەل تۇراقتىلىعىن قامتاماسىز ەتەتىن نەگىزگى كىلتى دەپ سەنىمدى تۇردە ايتۋعا بولادى, – دەدى ءمادينا نۇرعاليەۆا.
ورتالىق كوممۋنيكاتسيالار قىزمەتىنىڭ الماتىداعى وكىلدىگىندە وتكەن ءباسپاسوز بريفينگىنە قاتىسقان ماماندار ساياسات, قۇقىق قورعاۋ, رۋحاني جانە ءدىني قاتىناستارعا قاتىستى ەلىمىزدىڭ وزگە دە وڭىرلەرىنەن تىكەلەي ەفير ارقىلى قويىلعان سۇراقتارعا جاۋاپ بەردى.
قانات ەسكەندىر,
«ەگەمەن قازاقستان».
الماتى.