«استانا وپەرانىڭ» جەتەكشى ءسوليسى ءالفيا كارىموۆا يتاليادا ۆ.ا.موتسارتتىڭ «دون جۋان» وپەراسىنىڭ تۇساۋكەسەرىنە قاتىسپاق. جارقىراعان كولوراتۋرالىق سوپرانو يەسى 31 قاڭتار جانە 2, 6 اقپان كۇندەرى «كارلو فەليچە» تەاترى ساحناسىندا دوننا اننا پارتياسىن العاش رەت ورىندايدى.
قازىردىڭ وزىندە ءانشى مۇندا كۇندەلىكتى دايىندىق جۇمىستارىنا ويداعىداي كىرىسىپ كەتتى. ول بۇل ءرولدى ۇلكەن جاۋاپكەرشىلىكپەن ورىنداپ شىعۋدى ماقسات تۇتىپ وتىر. ءويتكەنى, الەمدىك دەڭگەيدەگى ورىنداۋشىلاردىڭ ءوزىن ابدىراتپاي قويمايتىن پارتيانى ول العاش رەت ورىنداماق, سونىمەن قاتار, ول – ادەمى, درامالىق كۇردەلى اريالارعا جانە نازىك تە سازدى بىرقاتار انسامبلدىك كورىنىستەرگە تولى بولماق. «ءاربىر جاڭا ساحنالىق بەينە ارقاشان حيكايالارعا, كۇتپەگەن وقيعالارعا, مەيرامدارعا تولى, سوندىقتان قاجىماس ەڭبەكتى تالاپ ەتەدى», – دەدى ءا.كارىموۆا گاسترولدىك ساپار الدىنداعى سۇحباتىندا.
– سوليسكە, ۆوكالشىعا دايىن كۇيىندە ەشتەڭە وڭايلىقپەن تيە بەرمەيدى. باستى پارتيالاردى ورىنداۋ ءۇشىن وعان قانشاما ۋاقىت, ۇزدىكسىز جاتتىعۋ كەرەك. ولاي بولماعان جاعدايدا ادامنىڭ كاسىبي تۇرعىدا دامۋى, ءوسۋى, بەلگىلى ءبىر جەتىستىكتەردى يەلەنۋى استە مۇمكىن ەمەس. موتسارتتى شىرقاۋ وتە كۇردەلى, مۇندا داۋىستىڭ ىرعاقتالا توگىلۋى, اسپاپتارعا ىلەسە الۋى, ەكپىندى يگەرۋ, ۆوكال پوزيتسياسىن ءدال قويۋ ءجانە ءجۇز پايىز داۋىستى يگەرە الۋ سياقتى شەبەرلىكتەر اۋاداي قاجەت, – دەدى اڭگىمە بارىسىندا ول.
ءبىر ەرەكشەلىگى, قويۋشى روزەتتا كۋككيدىڭ نۇسقاسىنا ساي وپەرا جەلىسى 1980-جىلدارداعى امەريكاعا اۋىستىرىلدى. ەڭ يننوۆاتسيالىق يتاليالىق وپەرانىڭ زاماناۋي رەجيسسەرلەرىنىڭ جارقىن دا باتىل سپەكتاكلى اسا زور كورنەكى اسەر بەرەدى. دون جۋان – سانقوي دا دۋماندى باردىڭ جۇلدىزى, سوندىقتان ول اينالاسىنداعى ءاربىر نازىك جاراتىلىس يەلەرىنىڭ جۇرەگىن تەز جاۋلاپ الۋعا تىرىسادى. ال, ءالفيا كارىموۆانىڭ كەيىپكەرى دوننا اننا ايەلقۇمار دون جۋاندى ەلىكتىرگەن تالعامپاز بيكەش. قويىلىمداعى كوپتەگەن قىزىقتى ەلەمەنتتەرگە, تاڭعالارلىقتاي تاپقىر يدەيالار مەن اسەرلى شەشىمدەرگە قاراپ, وپەرانىڭ جەكە كوزقاراستى ءبىلدىرەتىن نۇسقا ەكەنىن ءتۇسىنۋ قيىن ەمەس.
ايتا كەتۋ كەرەك, دون جۋان پارتياسىن ميكەلە پاتتي ورىندايدى, لەپورەللو – لۋچانو لەوني, كوماندور – گرەم برودبەنت, دون وتتاۆيو – پاتريك ۆوگەل, دوننا ەلۆيرا – راففاەللا لۋپيناچچي, تسەرلينا – ليليا گامبەريني, مازەتتو ءرولى روبەرتو مايەتتا ەنشىسىنە بۇيىرماق. 31 قاڭتاردا وپەراعا ماەسترو كريستوف پوپپەن, ال 2 جانە 6 اقپاندا پابل اسسانتە ديريجەرلىك ەتەدى دەپ كۇتىلۋدە.
قارشىعا كۇلەن.