وڭتۇستىكتە ەلباسىنىڭ قولداۋىمەن وليمپيادالىق سپورت كەشەندەرى سالىندى
وتكەن جىل وڭتۇستىك سپورتشىلارى ءۇشىن اقجولتاي جىل بولدى. وبلىس سپورتشىلارى قازاقستان چەمپيوناتتارى مەن بىرىنشىلىكتەرىندە 388 التىن, 374 كۇمىس, 337 قولا مەدال جەڭىپ الدى. بۇل كورسەتكىش 2013 جىلمەن سالىستىرعاندا 57 مەدالعا ارتىق.
ءبىر جىلدا بوكستان الەم چەمپيونى ءبىرجان جاقىپوۆ باستاپ 9 الەم چەمپيونى دايىندالدى.
بۇل ءبىر وبلىس ءۇشىن جاقسى جەتىستىك. ءبىز وڭتۇستىك قازاقستان وبلىسى دەنەشىنىقتىرۋ جانە سپورت باسقارماسىنىڭ باسشىسى الىبەك نۇرتاەۆقا جولىعىپ, ءبىراز ساۋالدارىمىزعا جاۋاپ العان ەدىك.
– ەلباسىمىز سپورتقا ۇلكەن ءمان بەرەدى, – دەدى الىبەك نۇرباي ۇلى.
– مەملەكەت ءانۇرانى مەن بايراعىن ەكى جاعدايدا, مەملەكەت باسشىسى شەتەلگە رەسمي ساپارمەن بارعاندا جانە سپورتشىلارىمىز حالىقارالىق سىنداردا توپ جارعاندا وينالادى, كوتەرىلەدى دەيدى. الگىندە ءسىز ايتقان مەدالدار جيىنتىعىن وڭتۇستىكپەن عانا بايلانىستىرۋعا بولمايدى. قازاقستاننىڭ ءارتۇرلى سپورت جارىستارىندا جەتكەن جەتىستىكتەرىندە التىن قۇرساق وڭتۇستىكتىڭ دە ماڭدايتەرىنىڭ وتەۋى بار.
– تۇسىنىڭكىرەمەدىك. تاراتىپ ايتساڭ دۇرىس بولار ەدى.
– بۇرىن وليمپيادالىق باعدارلاماعا ەنەتىن سپورت تۇرىنەن جاتتىعاتىن سپورتشىلارىمىز «بىزگە وقۋ-جاتتىعۋ جيىنىن وتكىزۋگە قازاقستاندا جاعداي جوق» دەپ شەتەلگە شىعانداپ كەتەتىن. سىلتاۋ بەلگىلى. قىستا جاتتىعاتىن جەڭىل اتلەتيكا مانەجى جوق. جابىق سۋ باسسەينى جوق. وبلىستىق كەشەندى جوعارى سپورت شەبەرلىگى مەكتەبىنىڭ وقۋ اتۋدان قىسقى زالى جوق. ارناۋلى قوندىرعىلار جەتىسپەيدى. ەسكەك ەسۋ سپورتىنان بازالار جوق. كوركەم گيمناستيكا كەشەنى جوق.
وسىلاي تىزە بەرسەڭ ون ساۋساق ازدىق قىلادى. سەنەسىز بە, وسىنىڭ ءبارى وڭتۇستىكتە بار. ەلباسىنىڭ قولداۋىمەن وبلىس اكىمى اسقار مىرزاحمەتوۆ اينالدىرعان بەس-التى جىلدىڭ ىشىندە ۇلكەن سپورتتى ورىستەتەتىن بارلىق سپورت كەشەندەرىن ىسكە قوستى. ال, بۇدان قازاقستان مەملەكەتى كوپ جاعدايدا ۇتتى. ءبىر مىسالدى ەسىڭىزگە تۇسىرەيىن. اتلانتا وليمپياداسىنىڭ چەمپيونى بەسسايىسشى الەكساندر پارىگين سيدنەي وليمپياداسىنىڭ الدىندا سپورت مينيسترلىگىنىڭ الدىنا شارت قويدى, «ماعان قازاقستاندا تولىققاندى جاتتىعۋ جاساۋعا جاعداي جوق. سوندىقتان وقۋ-جاتتىعۋ جيىنىن امەريكادا وتكىزەمىن. ونداعى بار شىعىنىمدى كوتەرەسىڭدەر, مەنىڭ جانە جاتتىقتىرۋشىمنىڭ ستيپەنديا, ەڭبەكاقىمىزدى ۋاقىتىلى اۋدارىپ وتىراسىڭدار. سوندا عانا مەدالعا ۋادە بەرە الامىن. ايتپەسە, كەلىسىمشارت ۇزىلەدى». قازاقستان حالقىنىڭ سانى ميللياردتاردان مول اسىپ جىعىلاتىن قىتاي نەمەسە ءۇندىستان ەمەس. وليمپيادا چەمپيونى دالادا جاتقان جوق. شارتتارىنا كوندى. قازاقستان اقشاسى اعىل-تەگىل امەريكاداعى سپورت كەشەندەرىنە قۇيىلىپ جاتتى.
ال, ءتورت جىل شەتەلدە جاتتىققان الەكساندر پارىگين سيدنەيدە چەمپيون تۇرماق جۇلدەگەرلەردىڭ دە شاڭىن كورگەن جوق. وليمپيادانىڭ قولا جۇلدەگەرى, ونسايىسشى دميتري كارپوۆ تا «مەدالعا تالاسامىن» دەپ ۋادە بەرگەن. شەتەلدە دايىندالعان. وليمپيادا تۇگىلى دوحادا وتكەن ازيا ويىندارىندا مارەدەن اتتانعان ون سپورتشىنىڭ سوڭىندا قالىپ كەتتى.
مۇنداي مىسالدار سپورتتىڭ كوپ تۇرىنەن كەلتىرۋگە بولادى. ال, الگى پارىگين مەن كارپوۆ سياقتىلاردى امەريكاعا اتتاندىرماي-اق سونداعى جاتتىعۋلار پروتسەسىن وتكىزۋىنە وڭتۇستىك بۇگىندە بارلىق مۇمكىندىكتەردى جاسايدى. بەس سايىس, ون سايىسقا نە كەرەك, ءبارى بار. قىستا سۋعا تۇسسەم قاتىپ قالامىن دەسە جابىق سۋ سپورت كەشەنى بار. دالادا جاۋرايمىن دەسە جابىق جەڭىل اتلەتيكا مانەجى بار. اتقا شابام دەسە اسانباي اسقاروۆ اتىنداعى يپپودروم دايىن. تاۋدا دايىندالامىن, تىنىسىمدى اشامىن دەسە وندا دا سپورت كەشەندەرى بار. شىمبۇلاق سەكىلدى «تاۋ سامالى» بازاسىنان بولەك ۋاقىتىندا كورنەكتى مەملەكەت قايراتكەرى اسانباي اسقاروۆ ۋىعىن قاداپ كەتكەن «قاسقاسۋ» تاۋ شاڭعىسى بازاسىندا بۇگىندە قىزۋ جۇمىس ءجۇرىپ جاتىر.
سپورتشىلار وسىنىڭ ءبارىن ەلباسى جانە وبلىس اكىمىنىڭ اتىمەن بايلانىستىرادى. ارينە, وسى كەزەڭدەردە وبلىستىق سپورت, دەنە تاربيەسىن باسقارعان ازاماتتاردىڭ دا ۇلكەن قاجىرلى ەڭبەگى بار. وسىنداي جۇمىستاردىڭ ارقاسىندا وڭتۇستىك ۇلكەن سپورتتا قازاقستانداعى تاڭداۋلى سپورت بازاسىنا اينالدى.
ال, نەگە وڭتۇستىكتە دەگەنگە كەلسەك, ءبىزدىڭ سولتۇستىك, باتىس, شىعىس ايماقتارىمىزدىڭ تابيعاتى قاتالداۋ, قىستا الاپات ايازى, قارعا ادىم جەردى كورسەتپەيتىن جاياۋ بوراسىنى بار.
وڭتۇستىكتىڭ ءجونى بولەك, قىسى قىسقا, كەرەك دەسەڭىز كوپتەگەن جاڭا جىلداردى قارسىز, جىلى جاڭبىرمەن قارسى الىپ ءجۇرمىز. ماسەلەن, كورشى رەسەي سپورتشىلارىن تۇسىنۋگە بولادى. جىلى جاقتارعا, تۇركيا, اراب امىرلىگى, كاتار مەملەكەتتەرىنە ءجيى بارادى. ونداعى بار تابيعات وڭتۇستىكتە دە بار. ەلباسىنىڭ قولداۋىمەن وليمپيادا باعدارلاماسىنا كىرەتىن بارلىق سپورتتىڭ دەرلىك بازالارى سالىنعانىن جوعارىدا ايتتىق. ونىڭ ۇستىنە تاعام ارزان. دارۋمەندىك جەمىستەر مول. تاعى قوسىپ ايتايىن. لوندون وليمپياداسىنىڭ الدىندا داڭقتى اۋىر اتلەتىمىز يليا يلين ءبىزدىڭ تولە بي اۋدانىنداعى تاۋ بوكتەرىندە ورنالاسقان «بايشەشەك» سپورت-ساۋىقتىرۋ ورتالىعىندا ءبىر ايعا جۋىق جاتتىعۋ جاسادى. اتقا ءمىندى, قىمىز ءىشتى, قازى-قارتا جەدى.
– ءوزىڭ ايتقانداي, باتىرلاردىڭ باتىرى, چەمپيونداردىڭ چەمپيونى قاجىمۇقاننىڭ ءاز جامباسى ماڭگىلىك جايىنا تيگەن وڭتۇستىك سپورتىندا دا تالاي مارقاسقالار بار. سيدنەي وليمپياداسىندا الەم مىقتىلارىنىڭ پىسىن باسقان, التىن, كۇمىستەن ولجا سالعان بەكزات, مۇحتارحاننىڭ ءىزىن باسقان ءبىرجان جاقىپوۆ وڭتۇستىك تاريحىندا بوكستان العاشقى الەم چەمپيونى بولىپ, تاريح پاراعىنا ەسىمىن التىن ارىپپەن جازدى. وڭتۇستىك تاعى قانداي اقبەرەندەرىمەن ماقتانا الادى؟
– بۇرناعى جىلى ەلىمىز بويىنشا وڭتۇستىك قازاقستان وبلىسى «ەڭ ۇزدىك سپورتتىق ايماق» نوميناتسياسىنا يە بولدى. مادەنيەت جانە سپورت مينيسترلىگىنىڭ «پاراليمپيادالىق سپورتتىڭ دامۋىنا ۇلەس قوسقانى ءۇشىن العىس حاتىمەن ماراپاتتالدىق.
مۇنداي ايتۋلى تابىستار جەكە ادامنىڭ باستاماسىمەن عانا ەمەس, كوپشىلىكپەن كەلەدى. سوندىقتان, سپورت سالاسىندا جۇرگەن بارشا وڭتۇستىكقازاقستاندىقتاردىڭ ورتاق جەڭىسى دەپ بىلەمىن.
جەكەلەگەن سپورتشىلارعا كەلسەك, الەم چەمپيونى ءبىرجان جاقىپوۆتان بولەك اۋىر اتلەت جازيرا جاپپارقۇل قازاق قىزدارى اراسىنان تۇڭعىش رەت اۋىر اتلەتيكادان الەم چەمپيوناتىنىڭ كۇمىس مەدالىن جەڭىپ الدى. وزدەرىڭىز دە بايقاعان بولارسىزدار, سەرپە كوتەرۋدە زىلتەمىردى توبەسىنەن اسىرعان جازيرا قۋانىشتان تولقىپ تۇرىپ تاكتيكالىق قاتە جىبەرىپ الدى. زىلتەمىردى ءسال ءتۇسىرىپ بارىپ تاستاۋدىڭ ورنىنا كوتەرىپ تۇرىپ الاقانىن اشىپ جىبەردى. ايتپەسە, التىندى بولىپ تا قالار ما ەدىك. ايتسە دە قازاقتىڭ وسى قايسار قىزىندا وليمپيادا ويىندارى چەمپيونىنىڭ كۇش-قايراتى بار. جاۋىنگەرلىك سامبودان ارمان وسپانوۆ دەگەن باۋىرىمىز توپ جارىپ ءجۇر. ەكى دۇركىن الەم چەمپيونى. سامبودان تۇڭعىش الەم چەمپيونى ساۋلە عابدۋللينادان كەيىن ونشاقتى جىل قىزدارىمىز التىننان ولجا سالماپ ەدى. گاۋھار تۇرماحانوۆا دەگەن قارىنداسىمىز قازاقستانعا ەكىنشى التىندى اكەلدى. ەسكەك ەسۋ سپورتىندا ازيادا ەشكىمگە دەس بەرمەي تۇرعان اعايىندى ەمەليانوۆتار, شاحماتشى قىزدارىمىز گ ۇلىسحان ناقباەۆا مەن گۇلميرا داۋلەتوۆا, دزيۋدودان الەم چەمپيوناتىنىڭ كۇمىس جۇلدەگەرى ديدار حامزا, حالىقارالىق تۋرنيرلەردە تالاي مارتە جەڭىمپاز بولعان دزيۋدوشى سامات ەسەن, لوندون وليمپياداسىنا قاتىسقان تاەكۆوندوشى نۇرسۇلتان ماماەۆ, قازاقستان بوكس قۇراماسىنىڭ مۇشەلەرى قايرات ەراليەۆ, زاكير سافيۋللين سياقتى سپورتشىلارىمىزبەن ماقتانا الامىز. وق اتۋ سپورتىنان راشيد يۋنۋسمەتوۆ باستاعان سۇرمەرگەندەرىمىز دە وليمپيادانىڭ دۋىن كوردى. وليمپيادا ويىندارىنان كەيىنگى ساپتا تۇراتىن, ءتورت جىلدا ءبىر كەلەتىن جازعى ازيا ويىندارى بىلتىر كورەي ەلىنىڭ ينچحون قالاسىندا ءوتىپ, قازاقستان بيىك شىڭداردى باعىندىردى دەۋگە بولادى. ازۋلى قىتاي, وڭتۇستىك كورەي, جاپونيا ەلدەرىنەن كەيىن كوماندالىق ەسەپتە ءتورتىنشى ورىنعا تۇراقتاۋدى ۇلكەن جەتىستىك دەپ سانايمىن. قورجىنىمىزدى مەدالعا تولتىرۋعا وڭتۇستىكتىڭ سپورتشىلارىنىڭ قوسقان ۇلەسى وراسان بولدى. جازعى ازيا ويىندارىنا ءبىزدىڭ وبلىستان 62 سپورتشى قاتىسىپ, ونىڭ 32-ءسى ولجالى ورالدى. 32-ءنىڭ توعىزى التىن, التاۋى كۇمىس بولسا, قولانىڭ سانى ون جەتى. اتالمىش دودادا بايداركا جانە كانوە ەسۋدەن الدىنا جان سالماعان اعايىندى ميحايل جانە تيموفەي ەمەليانوۆتاردىڭ, الەكساندر ەمەليانوۆ پەن ەۆگەني الەكسەەۆتىڭ ونەرىنە بارشا جۇرت ءتانتى بولدى. بۇل سپورت تۇرىنەن وڭتۇستىكتىڭ ەسكەكشىلەرى ۇلتتىق قۇرامانىڭ 90 پايىزىن قۇراعانىن ايتا كەتكەن ءجون. سونداي-اق, بوكستان ءبىرجان جاقىپ پەن قايرات ەراليەۆ جۇلدەگەر بولدى. ال قىزدار اراسىنان بىلعارى قولعاپ شەبەرى جاينا شەكەربەكوۆا كۇمىس القا تاعىندى. ول فينالدا الەمنىڭ بەس دۇركىن چەمپيونىمەن تەڭ دارەجەدە بوكستاستى.
سوندىقتان, ريو -دە - جانەيرودا قۇداي قالاسا, جەرگە قاراماسپىز.
– مەملەكەت باسشىسى وتانداستارىمىزدىڭ كەم دەگەندە وتىز پايىزىن بۇقارالىق سپورتقا تارتۋ ماسەلەسىن ۇكىمەتكە جۇكتەدى. ايماق باسشىلارىنا تاپسىرما بەردى. وڭتۇستىكتە حالىق كوپ, سپورت كەشەندەرى قانشالىقتى ساي, بۇقاراعا دەنەشىنىقتىرۋمەن اينالىساتىنداي جاعداي قانشالىقتى تۋعىزىلىپ جاتىر؟
– باسقارما ءوز جۇمىسىن بۇقارالىق دەنەشىنىقتىرۋ-ساۋىقتىرۋ نەگىزگى وبلىستىق ءىس-شارالارى مەن رەسپۋبليكالىق, حالىقارالىق جارىستاردىڭ كۇنتىزبەلىك جوسپارىنا سايكەس جۇرگىزەدى.
2014 جىلدىڭ قورىتىندىسى بويىنشا وبلىستا 80 مەملەكەتتىك مەنشىكتەگى سپورت مەكەمەلەرى مەن كاسىپورىندارى تىركەلگەن بولسا, ونىڭ ىشىندە: 18 وبلىستىق, 13-ءى شىمكەنت قالالىق, 39 قالالىق جانە اۋداندىق بالالار مەن جاسوسپىرىمدەر سپورت مەكتەپتەرى. سونىمەن قاتار, 8 وبلىستىق جانە 1 اۋداندىق مەملەكەتتىك كوممۋنالدىق قازىنالىق كاسىپورىندارى جانە 1 اكتسيونەرلىك قوعامى جۇمىس اتقارۋدا.
جوعارىدا اتالعان سپورت مەكەمەلەرىندە 1565 جاتتىقتىرۋشى قىزمەت اتقارىپ, 52848 سپورتشى تۇراقتى شۇعىلدانادى. وتكەن جىلدىڭ قورىتىندىسى بويىنشا وبلىستا 5023 سپورت نىساندارى تىركەلگەن. ونىڭ ىشىندە: 22 ستاديون, 1 سپورت سارايى, 13 سپورتتىق قۇرىلعىلار كەشەنى, 3 قۇراما كوماندالاردىڭ وقۋ-جاتتىعۋ ورتالىعى, 24 سپورت كەشەنى, 12 سپورت مانەجى, 1 شاڭعى بازاسى, 1 ەسكەك ەسۋ سپورتى بازاسى, 204 اتقىشتار ءتيرى, 1 اتۋ الاڭى, 1 حوككەي كورتى, 34 تەننيس كورتى, 3 يپپودروم, 28 ءجۇزۋ باسسەينى, 879 سپورت زالى جۇمىس ىستەيدى.
بۇل كورسەتكىشتى 2013 جىلمەن سالىستىرعاندا, سپورت نىساندارى سانى 91 بىرلىككە ارتىپ وتىر.
2014 جىلى وبلىستىق, جەرگىلىكتى بيۋدجەت ەسەبىنەن جانە بيزنەستىڭ الەۋمەتتىك جاۋاپكەرشىلىگى اياسىندا وبلىس اۋماعىندا بىرقاتار جاڭا سپورت نىساندار مەن ويىن الاڭشالارى سالىنىپ, پايدالانۋعا بەرىلدى. اتاپ ايتساق, وبلىستىق بيۋدجەت ەسەبىنەن – شىمكەنت قالاسىندا «كەشەندى جوعارى سپورت شەبەرلىگى مەكتەبىنىڭ عيماراتى مەن سپورت كەشەنى», تۇركىستان قالاسىندا ءجۇزۋ باسسەينى, تۇلكىباس اۋدانىندا سپورت كەشەنى سالىنىپ, شاردارا قالاسىنداعى №2 بالالار مەن جاسوسپىرىمدەر سپورت مەكتەبىندە قايتا قۇرۋ جۇمىستارى جۇرگىزىلدى.
جەرگىلىكتى بيۋدجەت ەسەبىنەن شىمكەنت قالاسىنىڭ №1 سپورت مەكتەبىنە كۇردەلى جوندەۋ جۇمىستارى, ماقتاارال اۋدانى, اتاكەنت اۋىلىندا ورنالاسقان ورتالىق ستاديوندى قايتا جوندەۋ جۇمىستارى وتكىزىلىپ, قاسىنا قوسىمشا جاساندى فۋتبول الاڭى سالىنىپ, پايدالانۋعا بەرىلسە, تۇلكىباس اۋدانى ت.رىسقۇلوۆ اۋىلىندا جاساندى كىشى فۋتبول الاڭى سالىندى.
بيزنەستىڭ الەۋمەتتىك جاۋاپكەرشىلىگى اياسىندا دەمەۋشىلەر ەسەبىنەن قازاقستان رەسپۋبليكاسى بوكس فەدەراتسياسىنىڭ قولداۋىمەن تۇركىستان قالاسىندا سپورتتىق ساۋىقتىرۋ كەشەنى, جاساندى توسەنىشپەن جابىق 3 كىشى فۋتبول الاڭى, ماقتاارال اۋدانىندا جاساندى كىشى فۋتبول الاڭى, سايرام اۋدانىندا 5 جابىق فۋتبول الاڭى, تۇلكىباس اۋدانىندا فۋتبول, ۆولەيبول, باسكەتبول الاڭشالارى سالىنىپ, پايدالانۋعا بەرىلدى.
سونداي-اق, قازىرگى ۋاقىتتا تولەبي اۋدانىندا ەسكەك ەسۋ سپورت تۇرلەرى ءۇشىن وقۋ-جاتتىعۋ بازاسى مەن شىمكەنت قالاسى «ءنۇرسات» مولتەكاۋدانىندا كوركەم گيمناستيكا سپورت ءتۇرى ءۇشىن سپورت كەشەنى قۇرىلىستارىنىڭ جۇمىستارى جۇرگىزىلۋدە. اتالعان نىساندار وسى جىلى پايدالانۋعا بەرىلەدى.
دەنەشىنىقتىرۋ جانە سپورتپەن جۇيەلى تۇردە شۇعىلدانۋشىلار سانى وبلىسىمىزدا جىل سايىن ارتۋدا.
وبلىس تۇرعىندارى اراسىندا سالاماتتى ءومىر سالتىن ناسيحاتتاۋمەن قاتار, بۇقارالىق سپورتتى دامىتۋ ماقساتىندا 2014 جىلى 3026 بۇقارالىق سپورتتىق ءىس-شارالار وتكىزىلىپ, وعان 329,5 مىڭنان استام ادام قاتىستى. ونىڭ ىشىندە اۋىلدى جەرلەردە 2211 سپورتتىق ءىس-شارالار وتكىزىلىپ, وعان 224,3 مىڭنان استام ادام قامتىلعان. بۇل كورسەتكىش 2013 جىلمەن سالىستىرعاندا, 425 سپورتتىق ءىس-شاراعا ارتىق وتكىزىلگەن. مۇمكىندىگى شەكتەۋلى ازاماتتارعا دا سپورتپەن شۇعىلدانۋعا جاعداي جاسالعان.
– اڭگىمەنىڭ القيسساسىندا, وبلىستاعى وليمپيادا ويىندارىنا لايىقتالعان سپورت كەشەندەرىنىڭ ەلباسىنىڭ تاپسىرماسىمەن سالىنعانىن ايتتىڭ. ءوزىڭ بىلەتىندەي, قازاقستان حالقى اسسامبلەياسىنىڭ باستاماسىمەن پرەزيدەنت سايلاۋى كەزەكتەن تىس وتكەلى جاتىر. سپورتشى اعايىندار بۇل ماسەلەگە قالاي قارايدى؟
– نۇرسۇلتان نازارباەۆ كەشەگى ەسىك كوزىندەگى قازاقتى تورگە شىعارعان ەرەن ساياساتكەر, عاسىر مويىنداعان تۇلعا, قازاقستان وركەنيەتتى, باسەكەگە قابىلەتتى وتىز ەلدىڭ قاتارىنا ەنۋدىڭ بارلىق العىشارتتارىن جاسادى. دۇنيەنى مۇحيتتىڭ الىپ تولقىندارىنداي ساپىرعان داعدارىس قازاقستانعا ونشالىقتى اسەر ەتە قويعان جوق. ەلباسىنىڭ تاپسىرماسىمەن دەر كەزىندە قولعا الىنعان ۇزاق مەرزىمدى باعدارلامالار ەلىمىزدى تالاي داعدارىس قىسپاعىنان شىعارىپ كەلەدى. وركەنيەتتى ەلدەردىڭ پرەزيدەنتتەرى ءبىزدىڭ ەلباسىمىزبەن تەڭ دارەجەدە سويلەسىپ, پىكىرىمەن ساناسادى. بۇدان ارتىق نە كەرەك.
ءبىز سپورتتىق جيىندارىمىزدا وسى ماسەلەلەردى ايتىپ وتىرامىز. سپورتشىلارىمىز تاڭداۋىن جاساپ قويعان. بارلىعىمىز نۇرسۇلتان ءابىش ۇلىنىڭ ماڭايىنا توپتاسىپ, ەكونوميكالىق قيىندىقتاردى بىرگە ەڭسەرۋىمىز كەرەك. سوندا عانا العا قويعان ماقساتتارىمىزعا ايقىن جەتەمىز.
اڭگىمەلەسكەن
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.